1 Samuela 20 - AI VOLA TABU

Sa dro mai Nayoci ko Tavita, a sa laʼki bose kei Jonacani e na ka me bula kina, a sa vakabulai koya ko Jonacani: erau sa veiyalayalati, 1-42.

¹ A SA dro ko Tavita mai Nayoci mai Rama, ka lako, ka kaya vei Jonacani, A cava kaʼu a cakava? a cava na noqu cala, ka cava na noqui valavala ca e na mata i tamamu, sa qara tiko kina ko koya na noqu bula?

² A sa kaya ko koya vei koya, Me yawa sara; o na sega ni mate: raica, ko tamaqu, ena sega ni kitaka e dua na ka levu se dua na ka lailai, ka sega ni tukuna vei au; ia me vunia vei au e na vuku ni cava na ka o qo ko tamaqu? ena sega ni vakakina.

³ A sa vosavavakini tale ko Tavita, ka kaya, Sa kila vakaidina ko tamamu niʼu sa kune loloma e matamu: a sa kaya ko koya, Me kakua ni kila o qo ko Jonacani, de rarawa ko koya: ia ka sa vaka na kena dina ni sa bula ko Jiova, ka sa bula na yalomu, sa dua ga na kalawa na noqu veiyawaki kei na mate.

⁴ A sa kaya vei Tavita ko Jonacani, A ka kecega sa kaya na yalomu, au na kitaka ga vei iko.

⁵ A sa kaya vei Jonacani ko Tavita, Raica, ena vula vou e na mataka, ia e dodonu ni keirau tiko kei na tui me kana; ia mo laivi au mada meʼu laʼki vuni au e na veiwere, me yaco mada nai katolu ni yakavi.

⁶ Kevaka sa bau tarogi au ko tamamu, mo kaya, Sa vakamasuti au matua ko Tavita me bau cici ki Pecileema na nona koro; ni sa dua nai soro vakayabaki kivei ira na mataqali taucoko.

⁷ Kevaka sa mani kaya, Sa vinaka; sa na vinaka na nomu tamata: ia kevaka sa cudru vakalevu ko koya, mo kila ni sa nakita na ca ko koya.

⁸ Ia ko na qai caka vinaka vei au na nomu tamata, ni ko sa kitaka oti na nomu tamata me daru veiyalayalati e na yaca i Jiova: ia kevaka sa tu vei au nai valavala ca mo vakamatei au ko iko ga: ia ko na kauti au vei tamamu e na vuku ni cava?

⁹ A sa kaya ko Jonacani, Me yawa sara vei iko meʼu sega ni tukuna vei iko, kevaka kaʼu a kila deivaki, ni sa nakita ko tamaqu me kitaka na ka ca vei iko.

¹⁰ A sa kaya vei Jonacani ko Tavita, O cei ena tukuna vei au? se na vakaevei ke sa vosa vakacudrucudruya vei iko ko tamamu?

¹¹ A sa kaya vei Tavita ko Jonacani, Daru lako yani ki na were. A rau sa lako ruarua yani ki na were.

¹² A sa kaya vei Tavita ko Jonacani, Ko Jiova na nodra Kalou na Isireli, niʼu sa vakataroga na loma i tamaqu e na gau-ni-siga vakaoqo e na sabogibogi, se na bogi rua, ka, raica, kevaka sa dua na ka vinaka vei Tavita, kevaka kaʼu sa sega ni talaki vei iko, ka vakatakila vei iko,

¹³ me cakacaka vakakina vei Jonacani ko Jiova, ka vakaikuritaka: ia kevaka sa via cakava vei iko na ka ca ko tamaqu, au na qai vakatakila vei iko, ka talai iko yani, mo lako e na vakacegu: ia me tiko kei iko ko Jiova, me vaka ka tiko kei tamaqu.

¹⁴ Ia mo kakua ni caka vinaka vei au walega e na vuku i Jiova niʼu sa bula tiko, meʼu kakua ni mate:

¹⁵ ia me kakua talega ni mudu na nomu loloma vei ira na noqu lewe-ni-vale ka tawa mudu: ia me kakua, ni sa muduka tani oti ko Jiova na meca kecega i Tavita mai na dela i vuravura.

¹⁶ A sa veiyalayalati ko Jonacani kei na lewe-ni-vale i Tavita, ka vakane, Me taroga ko Jiova vei ira na meca i Tavita.

¹⁷ A sa kitaki Tavita ko Jonacani me ia tale na vosavavakini e na vuku ni sa lomani koya; ni sa lomani koya me vaka sa lomana na yalona.

¹⁸ Sa qai kaya vei Tavita ko Jonacani, Ena vula vou e na mataka: ia ko na tarogi ga, ni na lala na nomui tikotiko.

¹⁹ Ia ni ko sa wawa ka bogi tolu, mo kusarawa sobu, ka lako ki na tikina ko a vuni iko kina e na siga sa ia kina na ka, ia mo tikoga mai na vatu ko Eseli.

²⁰ Ia kaʼu na vanataka e tolu na gasau ki na dua na kena yasana, me vaka kaʼu sa via vana e dua na ka.

²¹ Ia, raica, au na tala na cauravou, ka vakane, Mo laʼki qara na veigasau. Kevaka kaʼu sa kaya vakadodonu vua na cauravou, Raica, sa no vaka kike maivei iko na veigasau, mo kauta; mo qai lako mai: ni sa vei iko na vinaka, ka sega na ca; me vaka sa bula ko Jiova.

²² Ia kevaka kaʼu sa kaya vakaoqo vua na cauravou, Raica, sa no yani vaka kiliu vei iko na veigasau; mo lako yani; ni sa talai iko yani ko Jiova.

²³ Ia e na vuku ni ka edaru sa veivosakitaka, raica, me lewai kedaru kina ko Jiova, ka tawa mudu.

²⁴ A sa vuni koya mai na were ko Tavita; ia ni sa yaco na vula vou, sa tiko sobu na tui me kania na kakana.

²⁵ A sa tiko na tui e nonai tikotiko, me vaka sa daukitaka, io, e nonai tikotiko e voleka ki na lalaga: a sa tu cake ko Jonacani, a sa tiko voleka kivei Saula ko Epineri, a sa lala na tikina nei Tavita.

²⁶ A sa sega na ka e vosataka ko Saula e na siga ko ya: e na vuku ni sa nanuma, Sa yaco beka vua c dua na ka, sa sega kina ni savasava; sa sega vakaidina ni savasava ko koya.

²⁷ Ia e na sabogibogi, sai karua ni siga ni vula, sa lala na tikina nei Tavita: a sa kaya ko Saula vei Jonacani na luvena, A cava e sega kina ni lako mai na luve i Isei me kana, e na noa se edaidai o qo?

²⁸ A sa kaya vei Saula ko Jonacani, Sa masuti au matua ko Tavita me lako ki Pecileema:

²⁹ a sa kaya ko koya, Mo laivi au mada meʼu lako; ni sa dua nai soro sa ia ko iratou na neitou mataqali e na koro ko ya; a sa vakarota vei au ko tuakaqu: ia o qo, kevaka kaʼu sa kune loloma e matamu, mo laivi au mada meʼu laʼki raici iratou na wekaqu. O koya o qo sa sega kina ni lako mai ko koya ki nai kanakana ni tui.

³⁰ A sa cudru mai ko Saula vei Jonacani, a sa kaya vua, O iko na luve ni alewa yalovakatani ka talaidredre, au sa sega beka ni kila ni ko sa digitaki koya na luve i Isei mo vakamaduataki kina, me vakamaduataki talega kina ko tinamu ni sa luvawale?

³¹ ia e na veisiga kecega ena bula kina na luve i Isei e na dela ni vanua, ko na sega ni vakataudeitaki, se na nomu matanitu: ia o qo, mo talaki me kauti koya mai vei au, ni sa donu me mate ko koya.

³² A sa vosa ko Jonacani vei Saula na tamana, ka kaya vua, Me vakamatei ko koya e na vuku ni cava? a cava sa cakava?

³³ A sa viria vua ko Saula na moto me cokai koya: a sa kila kina ko Jonacani ni sa nakita ko tamana me vakamatei Tavita.

³⁴ A sa tu cake ko Jonacani mai nai kanakana ni sa waqawaqa na cudru, ka sega ni kana e nai karua ni siga ni vula; ni sa rarawa na lomana e na vuku i Tavita, e na vuku ni sa vakalialiai koya ko tamana.

³⁵ Ia e na sabogibogi sa lako yani ki na were ko Jonacani me vaka erau a lokuca kei Tavita, a sa vata kaya e dua na cauravou lailai.

³⁶ A sa kaya ko koya vua na nona cauravou, Mo cici mada, mo qara na veigasau kaʼu sa vanataka. Sa cici na cauravou, a sa vanataka ko koya e dua na gasau me laʼki sivi koya.

³⁷ Ia ni sa yacova na tikina sa vanataka kina ko Jonacani na gasau, sa kaci vua na cauravou ko Jonacani, ka kaya, Sa sega li ni no vaka kiliu vei iko na gasau?

³⁸ A sa kaci vua na cauravou ko Jonacani, Mo kusarawa, mo vakasauri, kakua ni tu. A sa kumuna vata na veigasau na cauravou i Jonacani, ka lako mai vua na nona turaga.

³⁹ A sa sega ni kila e dua na ka ko koya na cauravou: o Jonacani ga kei Tavita erau a kila na ka ko ya.

⁴⁰ A sa solia ko Jonacani na nonai yaragi vei koya na nona cauravou, a sa kaya vua, Mo lako, mo kauta ki na koro.

⁴¹ Ni sa lako yani na cauravou, sa tu cake ko Tavita mai na yasana sa donuya na ceva, a sa bale vakatobocu ki na qele, ka cuva vakatolu: a rau sa veireguci, ka vei-tagicaki, a sa uasivi cake ko Tavita.

⁴² A sa kaya vei Tavita ko Jonacani, Mo lako vakacegu ga, ni daru sa vosavavakini vata e na yaca i Jiova, ka vakane, Me lewai kedaru ko Jiova, kei na noqu kawa kei na nomu kawa ka tawa mudu. A sa ia ko koya ka lako yani: a sa lako ki na koro ko Jonacani.