1 Samuela 16 - AI VOLA TABU

Sa talai ko Saula me lumuti Tavita, 1-13. Sa vakararawataki Saula ko Jiova; a sa lakovi kina ko Tavita me qiriqiri, a sa vinaka kina ko Saula, 14-23.

¹ A SA kaya kina ko Jiova vei Samueli, Sa na bogi vica mada ni ko sa tagicaki Saula tiko, ni kaʼu sa biuti koya me kakua ni nodra tui na Isireli? mo vakasinaita mada e na waiwai na nomu tavaya, ka lako, au na talai iko vei Isei na kai Pecileema: niʼu sa kunea vei au e dua vei ira na luvena me tui.

² A sa kaya ko Samueli, Au na lako vakaevei? ni sa rogoca ko Saula, ena qai vakamatei au. A sa kaya ko Jiova, Mo kauta kei iko e dua na luvena alewa ni karavau, ka kaya, Au sa lako me ia nai soro vei Jiova.

³ Ia mo kacivi Isei ki nai soro, ia kaʼu na vakatakila vei iko na ka mo cakava: ia ko na lumuti koya vei au kaʼu na cavuta vei iko.

⁴ A sa kitaka ko Samueli na ka ka kaya ko Jiova, a sa lako yani ki Pecileema. A ra sa kusarawa na qase ni koro me laʼki tavaki koya, a ra sa kaya, O sa lako vakacegu mai, se segai?

⁵ A sa kaya ko koya, E na vakacegu; au sa lako mai me ia nai soro vei Jiova: dou vakasavasavataki kemudou, me da lako vata me ia nai soro. A sa vakarautaki Isei ko koya kei iratou na luvena, ka kacivi iratou ki nai soro.

⁶ Ia ni ratou sa lako mai, sa raici Iliapi ko koya, ka kaya, Sa tu vakaidina beka e na mata i Jiova na nona lumuti.

⁷ A sa kaya ko Jiova vei Samueli, Mo kakua ni raica na matana, se na kena balavu; niʼu sa sega ni digitaki koya: ni sa sega ni vaka sa raica ko ira na tamata; ni sa raica na ka etaudaku ko ira na tamata, ia sa raica na yalo ko Jiova.

⁸ A sa kacivi Epinatapi ko Isei, ka cakava me lako e na mata i Samueli. A sa kaya ko koya, O qo talega, sa sega ni digitaka ko Jiova.

⁹ Sa qai cakavi Sama ko Isei me lako. A sa kaya ko koya, O qo talega, sa sega ni digitaka ko Jiova.

¹⁰ A sa cakavi iratou na luvena tagane e lewe vitu ko Isei me ratou lako voli e na mata i Samueli. A sa kaya vei Isei ko Samueli, Sa sega ni digitaki iratou o qo ko Jiova.

¹¹ A sa kaya vei Isei ko Samueli, Sa oti mai ko iratou na luvemu, se segai? A sa kaya ko koya, Sa vo ga e dua, o koya sa gone, ka, raica, sa vakatawa na sipi ko koya. A sa kaya vei Isei ko Samueli, Mo talaki mada me kauti koya mai; ni datou na sega ni tiko sobu ka me lako mada mai ko koya.

¹² A sa talaki, ka kauti koya mai. A sa damudamu ko koya, a sa matavinaka, ka vinaka na kena rairai. A sa kaya ko Jiova, Mo ia, mo lumuti koya, ni sai koya ga o qo.

¹³ A sa taura ko Samueli na tavaya waiwai, a sa lumuti koya e na kedra maliwa na tuakana: a sa daucurumi Tavita na Yalo i Jiova mai na siga ko ya. A sa ia ko Samueli, ka lako yani ki Rama.

¹⁴ Ia sa lako tani na Yalo i Jiova vei Saula, a sa dauvakarerei koya e dua na yalo ca maivei Jiova.

¹⁵ A sa kaya vei Saula ko ira era sa qaravi koya tiko, Raica, sa dauvakarerei iko e dua na yalo ca mai vua na Kalou:

¹⁶ me vosa mada na neitou turaga vei ira na nomu tamata era sa dautiko e matamu, me ra qara e dua na tamata sa vuku e na qiri api: ia ni sa yacovi iko na yalo ca mai vua na Kalou, ena qiriqiri ko koya e na ligana, ko na qai vinaka kina.

¹⁷ A sa kaya ko Saula vei ira era sa qaravi koya tiko, Dou raica mada mai vei au e dua na tamata sa dau-qiriqiri vakavinaka, ka kauta mai vei au.

¹⁸ A sa vosa mai e dua vei ira na cauravou, ka kaya, Raica, kaʼu sa kunea e dua na luve i Isei na kai Pecileema, sa daukila na qiriqiri, a tamata kaukauwa ka qaqa, kei na tamatai valu, ka vuku e na vosa, a sa tamata vatukai vinaka, a sa tiko kaya ko Jiova.

¹⁹ A sa tala ko Saula e so nai talatala vei Isei, ka vaka, Mo talai Tavita mai vei au, o koya na luvemu sa tiko kei na sipi.

²⁰ A sa kauta ko Isei e dua na asa sa cola madrai, ka dua na tavaya waini, ka dua na luve ni koti, a sa tala me kauta ko Tavita na luvena kivei Saula.

²¹ A sa lako mai kivei Saula ko Tavita, ka tu e na matana; a sa kune loloma vakalevu vua, a sa yaco mei koya sa daucola na nonai yaragi.

²² A sa talaki vei Isei ko Saula, ka kaya, Me tu mada ga e na mataqu ko Tavita; ni sa kune loloma e mataqu.

²³ Ia ni sa tauvi Saula na yalo mai vua na Kalou, sa taura ko Tavita na api, ka qiria e na ligana: a sa cegu mai ko Saula, a sa vinaka ko koya, a sa lako tani na yalo ca vei koya.