1 Pita 5 - AI VOLA TABU

Sa ia ko koya nai vakaro vei ira nai talatala qase, kei ira nai talatala cauravou, kei ira na tamata kece, a sa tinia na nonai vola, 1-14.

¹ AU sa vakarota vei ira nai talatala qase era tiko vei kemudou, niʼu sa qase koi au talega, ka sa dautukutuku e na ka ka vosota ko Karisito, ka sai taukei talega ni ukuuku ena vakaraitaki mai e na gauna maimuri:

² dou vakania na qele-ni-sipi ni Kalou era sa tiko vei kemudou, ka dou ia na vakatawa, kakua ga e na loma e vosota, ka e na loma ga e vinakata; kakua ga e na vuku ni yau vakasisila, e na loma ga e rekitaka;

³ ia dou kakua ni vaka dou sa veitaliataka na veivotavota, ka mo dou nodrai vakarau ga na qele ni sipi.

⁴ Ia ni na rairai mai nai Vakatawa levu, dou na rawata kina nai sala vakaiukuuku ena sega ni malai rawa.

⁵ Oi kemudou talega na cauravou, dou vakamalumalumutaki kemudou vei ira na qase. Io, dou dui vakamalumalumutaki kemudou vakai kemudou, ka dou vakaisulu e na yalomalumalumu: ni sa vorati ira na qaciqacia na Kalou, a sa solia nai solisoli loloma vei ira na yalomalumalumu.

⁶ O koya o qo mo dou qai vakamalumalumutaki kemudou e ruku ni liga kaukauwa ni Kalou, me laveti kemudou cake ko koya e na gauna sa lokuci:

⁷ ka dou biuta vei koya na nomudou lomaocaoca kecega, ni sa daunanumi kemudou ko koya.

⁸ Dou yalomatua, dou vakatawa: e na vuku ni sa veilakoyaki na nomudou meca ua tevoro, me vaka na laioni sa tagi, a sa vakasaqara e so me tiloma:

⁹ dou vorati koya ni dou sa tu dei e na vakabauta, ni dou sa kila sa vakayacori na ka rarawa vakakina vei ira na wekamudou era sa tiko lako e vuravura o qo.

¹⁰ Ia na Kalou sa dauia na loloma kecega, o koya sa kacivi keda ki na nonai ukuuku taw a mudu e na vuku i Karisito Jisu, ni dou sa vakararawataki mada e na gauna e so, me qai qisi kemudou mo dou vakavinakataki, mo dou vakataudeitaki, mo dou vakaukauwataki, mo dou tauyavutaki.

¹¹ Me nona na vakarokoroko kei na lewa e na gauna kece ka tawa mudu. Emeni.

¹² Au sa vola vakalailai ka ia nai vakaro, a sa kauta vei kemudou ko Silivenu, o koya kaʼu sa vakasama e wekada dina, ia kaʼu sa vakadinadina ni sa loloma dina ni Kalou dou sa tu dei kina.

¹³ Sa loloma yani vei kemudou nai vavakoso lewe ni soro mai Papiloni, era sa digitaki tu vata kei kemudou; sa vakakina ko Marika na luvequ.

¹⁴ Dou veicavuti loloma, ka ia na veiregu ni loloma. Me tu ga na vakacegu vei kemudou kecega sa tu vata kei Karisito Jisu. Emeni.