1 Pita 1 - AI VOLA TABU

A WASE I. —Sa vakavinavinaka ko Petero e na vukudra na tamata lotu dina, 1-9. Sa tukuna ni ra a parofisaitaka na lotu i Jisu ko ira na parofita eliu, 10-12. Sa vakarota vei ira me ra gumatua e nai valavala vinaka, ni ra sa qai sucu tale, 13-25.

¹ OI au ko Petero, nai apositolo i Jisu Karisito, kivei ira era tiko vakavulagi ni ra sa dui se ki Ponito, ki Kalatia, ki Kapatosia, ki Esia, kei Picinia,

² era sa digitaki tu me vaka na nona lewa eliu na Kalou ko Tamada, me ra vakasavasavataki e na Yalo, me ra talairawarawa kina me ra kureitaki talega e na dra i Jisu Karisito: Me vakalevutaki vei kemudou na loloma, kei na vakacegu.

³ Me ia na vakavinavinaka vua na Kalou, na Tama ni noda Turaga ko Jisu Karisito, o koya sa vakasikavi keda tale me noda nai nuinui bulabula me vaka na nona loloma levu e na vuku ni sa tu cake tale mai na mate ko Jisu Karisito,

⁴ me da taukena kina nai votavota sa tawa ca rawa, a sa tawa dukadukali, a sa tawa malai mai, sa maroroi mai lomalagi me nomudou,

⁵ oi kemudou sa maroroi e na kaukauwa ni Kalou e na vuku ni vakabauta ki na bula sa vakarau tu me vakarairaitaki e na gauna emuri.

⁶ Ia sa ka o qo dou sa reki vakalevu kina, ia e na gauna lailai ga o qo, ke sa yaga, dou sa vakararawataki e na dauvere e vakavuqa:

⁷ me kune kina na veivakatovolei ni nomudou vakabauta, ni sa talei vakalevu ko ya ka sa talei vakalailai na koula sa caca rawa, ia ka sa vakatovolei e na buka-waqa, me ka ni vakavinavinaka, kei na vakarokoroko, kei na dokai, ni na rairai mai ko Jisu Karisito:

⁸ o koya dou a sega ni raica, ia dou sa lomana ga; o koya, ni dou sa sega ni kunea edaidai, dou sa vakabauta ga, ka reki e na reki e sega ni cavu rawa ka vinaka sara:

⁹ ni dou sa rawata nai vakataotioti ni nomudou vakabauta, io, na bula ni yalomudou.

¹⁰ A bula o qo era sa taroga ko ira na parofita ka vakasaqara matua, o ira era sa parofisaitaka na loloma ena nomudou:

¹¹ ni ra sa vakasaqara se cava, se vakaevei na gauna sa vakatakila vei ira ko na Yalo i Karisito sa tiko e na lomadra, ni sa tukuna mada eliu na rarawa i Karisito kei na ka vinaka sara ena qai muri mai.

¹² A sa vakatakilai vei ira, ni sa sega walega e na vukudra, ia e na vukuda era sa yaco me rai talatala e na veika sa qai tukuna mai vei kemudou ko ira era sa vunautaka vei kemudou nai tukutuku-vinaka, vata kei na Yalo Tabu sa talai mai lomalagi; a veika o qo era sa gadreva ko ira na agilose me ra wanonova.

¹³ O koya o qo mo dou qai vauca na wa ni tolo ni lomamudou, dou yalomatua, ka vakanuinui tiko me yaco mada nai vakataotioti, mo dou rawata kina na loloma ena kau mai vei kemudou ni na rairai mai ko Jisu Karisito;

¹⁴ me vaka na gone e dautalairawarawa, dou kakua ni vakatauvatani kemudou kei na gadreva ca eliu ni dou a lialia:

¹⁵ ia ni sa yalosavasava ko koya sa kacivi kemudou, dou yalosavasava koi kemudou talega e nai valavala kecega;

¹⁶ ni sa volai, Dou yalosavasava; niʼu sa yalosavasava koi au.

¹⁷ Ia kevaka dou sa masu, me vaka sa Tamamudou, vei koya sa lewai ira yadua me vaka na ka era a cakava, ka sega ni ia vakatani, me sa ia e na rere na nomudoui valavala, e na gauna dou sa vulagi tu kina;

¹⁸ ni dou sa kila ni dou a sega ni voli e na veika e caca wale, e na siliva se na koula, mai na nomudoui valavala sesewa dou sa rawata maivei ira na nomudou qase;

¹⁹ e na dra talei ga i Karisito, me vaka na lami sa tawa ca se buca:

²⁰ o koya sa lesi eliu sa qai tauyavutaki emuri ko vuravura, a sa qai vakaraitaki e na gauna emuri o qo e na vukumudou,

²¹ ia sai koya dou sa vakabauta kina na Kalou, o koya ka vakaturi koya cake tale mai na mate, ka solia vua nai ukuuku; me sai koya ga na Kalou dou sa vakabauta ka vakanuinui kina.

²² Dou vakasavasavataka na yalomudou ni dou sa talairawarawa ki nai vakavuvuli dina e na vuku ni Yalo, mo dou lomani ira kina na veiwekani e na loloma tawa lasu, ia dou veilomani vakai kemudou e na yalosavasava kei na lomakatakata:

²³ ni dou sa sucu tale, sa sega e na sila e vuca rawa, o qori ga sa tawa vuca rawa, e na vosa ni Kalou, a ya sa bula ka tu dei ka tawa mudu.

²⁴ Ni sa vaka na co na tamata kecega, a sa vaka na se ni co nai ukuuku kecega ni tamata. Sa daumalai na co, a sa mira na sena:

²⁵ ia na vosa ni Kalou sa tu dei ka tawa mudu. Ia o qori na vosa sa vunautaki vei kemudou mei tukutuku-vinaka.