1 Joni 3 - AI VOLA TABU

Sa tukuna ko koya na loloma ni Kalou ni sa vakabauti keda tale me da luvena, kei na nodrai valavala na luve ni Kalou, 1-24.

¹ RAICA na kena levu ni loloma sa ia vei keda na Tamada, me da vakatokai kina me luve ni Kalou: o koya o qo sa sega ni kilai keda kina ko ira na kai vuravura, e na vuku ni ra a sega ni kilai koya.

² Oi kemudou sa lomani, eda sa qai luve ni Kalou, a sa sega ni rairai se da na vakaevei emuri: o qo ga eda sa kila, ni na rairai mai ko koya, eda na tautauvata kaya; ni da na raica na matana dina.

³ Ia na tamata yadua sa tu nai nuinui o qo vei koya, sa vakasavasavataki koya, me vaka sa savasava ko koya.

⁴ O koya yadua sa valavala ca sa talaidredre ki na vunau: ia sai valavala ca o qo me talaidredre ki na vunau.

⁵ Ia dou sa kila ni ka vakaraitaki ko koya me kauta tani na nodai valavala ca; a sa sega na nonai valavala ca.

⁶ 0 koya sa tu dei vata kaya sa sega ni valavala ca; o koya sa valavala ca lako sa sega ni raici koya, se kilai koya.

⁷ Oi kemudou na luvequ lomani, me kakua ni vakacalai kemudou e dua: o koya sa valavala dodonu sa dodonu ga, me vaka sa dodonu ko koya.

⁸ A luve ni tevoro ko koya sa valavala ca tiko; ni sa valavala ca na tevoro mai nai vakatekivu. E na vuku ni ka o qo sa vakaraitaki kina na Luve ni Kalou, me vaqeavutaka na cakacaka ni tevoro.

⁹ Sa sega ni valavala ca ko koya yadua sa vakasucumi koya ko na Kalou; ni sa tu e lomana na sorena: a sa sega ni ia rawa nai valavala ca ko koya, e na vuku ni ka vakasucumi koya ko na Kalou.

¹⁰ E na ka o qo sa rairai kina ko ira na luvena na Kalou, kei ira na luvena na tevoro: sa sega ni luve ni Kalou ko koya yadua sa sega ni ia tiko nai valavala dodonu, sei koya sa sega ni lomana na wekana.

¹¹ Ni sai koya ga o qo nai vakaro dou a rogoca mai nai vakatekivu, me da veilomani:

¹² me kakua ni vakataki Keni, a luvena na vu-ni-ca, o koya sa vakamatea na tacina. A sa vakamatei koya e na vuku ni cava? E na vuku ni sa ca na nonai valavala, a sa dodonu na nei tacina.

¹³ Kakua ni kidacala, oi kemudou na wekaqu, kevaka sa cati kemudou ko ira na kai vuravura.

¹⁴ Eda sa kila ni da sa lako tani mai na mate ki na bula, ni da sa lomani ira na veiwekani. O koya sa sega ni lomana na wekana sa tiko ga e na mate.

¹⁵ Na daulaba ko koya yadua sa cata na wekana: ia dou sa kila ni sa sega sara na daulaba sa tiko e na lomana na bula tawa mudu.

¹⁶ E na ka o qo eda sa kunea kina na loloma, ni sa virino ko koya na nona bula e na vukuda: e dodonu me da virino na bula koi keda talega e na vukudra na veiwekani.

¹⁷ Ia ko koya sa nona nai yau ni vuravura o qo, a sa raica na wekana ni sa dravudravua, a sa sogota na lomana vua, sa tiko vakacava e na lomana na loloma vua na Kalou?

¹⁸ Oi kemudou na luvequ lomani, me da kakua ni loloma e na vosa, se e na yameda; e na cakacaka ga kei na lomadina.

¹⁹ Ia na ka o qo eda sa kila kina ni da sa mai na dina; eda na vakadinadinataka talega kina na yaloda e matana.

²⁰ Io, kevaka sa beitaka vei keda na ca na yaloda, sa uasivi cake e na yaloda na Kalou, a sa kila na ka kecega.

²¹ Oi kemudou sa lomani, kevaka sa sega ni beitaka vei keda na ca na yaloda, eda sa qai vosa doudou rawa vua na Kalou.

²² Ia na ka kecega eda sa kerea, eda sa rawata maivei koya, ni da sa muria na nona vunau, ka kitaka na veika sa vinaka e matana.

²³ Ia na nona vunau o qo, Me da vakabauta na yaca ni Luvena ko Jisu Karisito, ka veilomani, me vaka sa vakarota vei keda ko koya.

²⁴ Ia ka sa tu dei vei koya ko koya sa muria na nona vunau, a sa tu sara vua ko koya. Ia na ka o qo eda sa kila kina ni sa tiko e na lomada ko koya, e na vuku ga ni Yalo sa solia mai vei keda ko koya.