1 Joni 1 - AI VOLA TABU

A WASE I. —Sa tukuni Jisu ko Joni ni sa vu ni bula, e na vuku ni da sa veivinakati kei na Kalou e na vukuna, 1-10.

¹ KO ya sa tu mai nai vakatekivu, o koya keitou a rogoca, o koya keitou a raica e na mata i keitou, o koya keitou a vakaraica sara, ia ka tara na liga i keitou, e na vuku ni Vosa ni bula; (

² ka sa vakaraitaki na vu-ni-bula, a keitou a raica, ka dautukuna, ka vakatakila vei kemudou na vu-ni-bula tawa mudu, o koya ka tiko vata kei Tamana, a sa qai vakaraitaki mai vei keda;)

³ a ya keitou a raica ka rogoca, keitou sa tukuna vei kemudou, mo dou veiwekani kina kei keitou; ia keitou sa veiwekani kei na Tamada, kei na Luvena ko Jisu Karisito.

⁴ Ia keitou sa vola na veika o qo vei kemudou, me vakayacori sara kina na nomudou marau.

⁵ Ia o qo nai tukutuku keitou a rogoca maivei koya, a sa tukuna vei kemudou, ni sa rarama na Kalou, a sa sega sara na butobuto vei koya.

⁶ Kevaka eda sa kaya eda sa veiwekani kaya, a sa ia nai valavala butobuto, eda sa lasu ga, ka sa sega ni ia na vosa dina:

⁷ ia kevaka eda sa ia nai valavala rarama, me vaka sa tu e na rarama ko koya, eda sa qai veiwekani kaya, a sa vakasavasavataki keda mai na ca kecega na dra i Jisu Karisito na Luvena.

⁸ Kevaka eda sa kaya sa sega ni tu vei keda na ca, eda sa vakaisini keda, a sa sega ni tu vei keda na dina.

⁹ Kevaka eda sa vakatusa na nodai valavala ca, sa yalodina ka yalododonu ko koya me bokoca na nodai valavala ca, ka vakasavasavataki keda mai na ka kecega sa tawa dodonu.

¹⁰ Kevaka eda sa kaya eda a sega ni valavala ca, eda sa vakalasui koya, a sa sega ni tu vei keda na nona vosa.