Matta 17 - Aadi keyri: linjiila iisaa almasiihu

No noone Iisaa waylitorii

¹ Balɗe jeegom caggal mum, Iisaa yaadi e Piyeer e rimdaaɓe ɗiɗon Yaakuuba e Yuhanna, o teeldoyi e mum'en dow waamnde haayre toownde.

² Noone makko waylitii yeeso maɓɓe. Yeeso makko ana jalba no naange nii, kaddule makko ndawni far hono fooyre.

³ Muusaa e Iliyaasa ɓanngani ɓe, ana kaalda e makko.

⁴ Piyeer wii Iisaa: —Moobbo, gonal amen ɗoo ana moƴƴi. Ɗal mi darna ɗoo buguuji tati: aan wooturu, Muusaa wooturu, Iliyaasa wooturu.

⁵ O tilaaki haalde, faa luurde jalboore suddi ɓe. Daande iwi ley luurde ndee, wii: —Oo ɗoo yo Ɓiyam mo korsin-mi, mo cuɓii-mi. Kettindee mo!

⁶ Nde taalibaaɓe ɓee nani nden daande ndee, ɓe caami ɓe kippii e leydi, ɓe kuli sanne.

⁷ Iisaa ɓattitii ɓe, memi ɓe, wii: —Immee, pati kulee.

⁸ E ley ɗum, ɓe kunci gite, ɓe njiyaali fay gooto so wanaa Iisaa tan.

⁹ E ley ko ɓe njippotoo waamnde haayre ndee koo, Iisaa daalii ɓe, wii: —Pati kaalanee fay gooto ko njii-ɗon koo faa wakkati nde Ɓii Neɗɗo oo immitii e hakkunde maayɓe fuu.

¹⁰ Caggal ɗum, taalibaaɓe ɓee lamndii mo, mbii: —Koɗum waɗi so dunkee'en Sariya ɓee ana mbiya annabi Iliyaasa haani adaade Almasiihu warde?

¹¹ O jaabii ɓe, o wii: —Goonga, Iliyaasa adotoo warde moƴƴintina kulle ɗee fuu.

¹² Kaa miɗo wiya on: Iliyaasa ƴaɓɓike, ɓe annditaali ɗum, ɓe ngollii ɗum ko ɓe muuyi fuu. Hono non ɓe torrirta Ɓii Neɗɗo oo duu.

¹³ Taalibaaɓe ɓee paami ko o haalata haala Iliyaasa koo, haala Yaayaa mo lootogal batisima o haalani ɗum'en.

No Iisaa selliniri kirikiraaɗo

¹⁴ Nde ɓe ngarti e jamaa oo ndee, gorko gooto ɓattitii mo, diccii yeeso makko,

¹⁵ wii: —Moobbo, yurma ɓiyam gorko! O kirikiraaɗo omo tampi sanne, wakkatiiji omo saama e yiite naa e ndiyam.

¹⁶ Mi naɓii mo to taalibaaɓe maa ɓee kaa ɓe ndonkii sellinde mo.

¹⁷ O ɓattitii, o wii: —Hey yimɓe jamaanu bonɗo ɓe nganaa goonɗinɓe! Faa mande tilotoo-mi e mon? Faa mande keddotoo-mi muɲande on? Ngaddanee kam cukalel ngel ɗoo!

¹⁸ O jahii e ladde ndee, nde yalti e suka oo, o selli ɗon e ɗon.

¹⁹ Caggal ɗum, taalibaaɓe ɓee teeldi e makko, lamndii mo, mbii: —Koɗum waɗi so min ndonki ittude ndee ladde?

²⁰ Iisaa jaabii ɓe, wii: —Saabe oɗon pamɗi goonɗinal waɗi ɗum. Miɗo haalana on goonga: so goonɗinal mooɗon fotii fay no ngeeƴu buyaage nii, so on mbii ndee ɗoo waamnde haayre: «Sottu ɗoo, njahaa too», nde sottan. Fay huunde on ndonkataa waɗude. [

²¹ ]

No Iisaa sapporii kasen maayde mum e wuurtugol mum

²² No ɓe njiilortoo e ley Galili nii, Iisaa wii ɓe: —Ɓii Neɗɗo oo waɗete e juuɗe yimɓe,

²³ ɓe mbara mo, kaa e ley ɲalaande majjum tataɓere, o immitoto. Taalibaaɓe ɓee cuŋli sanne.

Haala yoɓugol usuru Suudu Dewal Mawndu

²⁴ Nde Iisaa e taalibaaɓe mum njottinoo Kafarnahum ndee, nanngooɓe usuru Suudu Dewal Mawndu ɓee ɓattii Piyeer, mbii ɗum: —Tama moobbo mooɗon oo ana yoɓa usuru Suudu Dewal Mawndu?

²⁵ Piyeer jaabii, wii: —Omo yoɓa. Ko Piyeer naati galle oo koo, fade mum heɓude haala, Iisaa wii: —Simon, koɗum woni miilo maa e ɗum? Kaanankooɓe aduna ɓee, homo ɓe nduuɲata? Homo ɓe njoɓinta lampo? Dugule'en naa honaaɓe?

²⁶ Piyeer jaabii, wii: —Honaaɓe ɓee. Iisaa wii mo: —Ndennoo, dugule'en ɓee kaanaa yoɓude.

²⁷ Kaa noo, en njiɗaa mettinde ɓerɗe ɓee yimɓe. Yaa to weendu too, tippo-ɗaa yammbuure maa e ley ndiyam ɗam. Liingu fuu adiiɗo moɗude nde pooɗaa, ƴeŋŋinaa ɗum aaraa hunduko mum, a tawan hen kaalisi daneejo kiɓɓinoowo usuru meeɗen. Ittaa njoɓanaa en, enen ɗiɗon.