Marku 5 - Aadi keyri: linjiila iisaa almasiihu

No Iisaa selliniri laddaaɗo

¹ Caggal ɗum, ɓe njottii oo too bannge e weendu nduu, e leydi Gerasankooɓe.

² Nde Iisaa yalti laana kaa ndee, laddaaɗo iwri ley janaale, hawri e makko.

³ Ley janaale ɗee o jooɗinoo, fay gooto waawaa haɓɓude mo, sabi fay calali kaɓɓataa mo.

⁴ Sabi heewii ko o humti tonngooɗe e calali, o taƴan calali, o hela geƴƴelle. Fay gooto waawaa nanngirde mo semmbe.

⁵ Ɲannde fuu, jemma e ɲalooma ley janaale e baamle kaaƴe o woni, omo wulla omo fiitoroo kaaƴe.

⁶ O soynii Iisaa, o dogani ɗum, o sujidani ɗum,

⁷ o wulli faa toowi, o wii: —Iisaa Ɓii Laamɗo Toowɗo, koɗum njiɗ-ɗaa waɗude kam? Mi surdii ma saabe Laamɗo, pati torram!

⁸ Walaa ko o wiiri non sinaa Iisaa wii mo: —Seyɗaani, yaltu e makko.

⁹ Iisaa lamndii mo, wii: —Hono mbiyete-ɗaa? O jaabii, o wii: —Miɗo wiyee jamaa, sabi miɗen keewi.

¹⁰ O ɲaagii ɗum sanne, o ndaardi ɗum pati yaltina seyɗaani'en ɓee leydi ndii.

¹¹ Sewre girooji mawnde ana durannoo ɗon e hoore waamnde haayre.

¹² Seyɗaani'en ɓee ndaardi mo o duŋanoo ɗum'en naata e ley girooji ɗii.

¹³ O duŋanii ɓe ɗum. Seyɗaani'en ɓee njalti, naati e girooji ɗii. Sewre ndee fuu diiri iwi daande waamnde haayre too, naatoyi ley weendu nduu, yoolii. Eɗi poti ujunaaji ɗiɗi.

¹⁴ Durooɓe ɓee ndogi njantanoyii ngeenndi ndii e seraaji mum ko hewtii ɗum'en koo. Yimɓe ɓee njehi ƴeewoyde ko waɗi koo,

¹⁵ ɓe ngari e Iisaa. Nde ɓe njii gorko laddanooɗo oo ana jooɗii ana ɓoornii kaddule, yeeɗɗitii ndee, kulol nanngi ɓe.

¹⁶ Tawaaɓe ɗon ɓee njantanii ɓe ko hewtinoo laddaaɗo oo e girooji ɗii.

¹⁷ Ɓe ndaardi Iisaa yalta leydi maɓɓe ndii.

¹⁸ Nde o naattata laana kaa ndee, laddanooɗo oo ndaardi mo o acca jokka e makko.

¹⁹ O salanii oon, o wii ɗum: —Hootu suudu maa e koreeji maa, kumpitaa ɓe ko Joomiraaɗo waɗan maa e no o yurmori maa.

²⁰ O yehi omo haala e leydi ndi geelle sappo ndii ko Iisaa waɗani mo. Ɓe fuu ɓe kaaynaa.

No Iisaa wuurtiniri ɓii Jayrus e no selliniri debbo ɲawɗo

²¹ Nde Iisaa naati e laana wirfitii oo too bannge weendu nduu ndee, jamaa keewɗo filii mo kasen dow fonngo ɗoo.

²² Nden gooto e hooreeɓe suudu waajordu biyeteeɗo Jayrus wari. O yii Iisaa tan, o diccii yeeso mum,

²³ o ɲaagii ɗum o haali faa heewi, o wii: —Ɓiyam debbo ana haɓana yonki. War faw junngo maa e makko, yalla omo sella, o wuura!

²⁴ Iisaa yaadi e makko, jamaa keewɗo jokki e mum faa ana ɓilla ɗum.

²⁵ Debbo mo tuundi mum taƴataa ko waarata e duuɓi sappo e ɗiɗi ana wonnoo ton.

²⁶ O tampii hen sanne, o yehii to sawrooɓe heewɓe faa junngo makko laaɓi. Ko ɓuri ɗum fuu o yiyaali hen sami, ɲaw oo ɓeydoto jaati.

^27-28 O nani haala Iisaa ana haalee, o naati e jamaa oo. Sabi o miilii: «So mi memii saaya makko tan, mi sellan.» O iwri caggal mum, o memi saaya mum.

²⁹ Ɗon e ɗon tuundi makko taƴi, o maati e calɗi makko o sellii.

³⁰ Oon wakkati fuu, Iisaa maati won semmbe iwi e mum, yeeccitii hakkunde jamaa oo, wii: —Homo memi saaya am?

³¹ Taalibaaɓe makko ɓee mbii mo: —A yii jamaa annii ɓillu maa, aɗa lamndoo: «Homo memi kam?»

³² Kaa o darii omo tewta memɗo mo oo.

³³ Debbo oo ana siɲɲa no foti hulde sabi ana anndi ko waɗi, wari, diccii yeeso makko, haalani mo goonga.

³⁴ Iisaa wii mo: —Banndam debbo, goonɗinal maa danndii ma. Yaa e jam! A sellii e ɲaw maa oo!

³⁵ O tilaaki haalde, faa won iwruɓe to suudu Jayrus hooreejo waajordu oo, mbii ɗum: —Ɓiya oo heddaaki. Fotaa ko tampinaa Moobbo oo hankasen!

³⁶ Kaa Iisaa tippitii haala maɓɓe, wii Jayrus: —Pati hul, hoolam tan!

³⁷ O ɗalaali fay gooto yaada e makko so wanaa Piyeer e Yaakuuba e Yuhanna miɲii Yaakuuba oo.

³⁸ Ɓe njottii suudu hooreejo waajordu nduu oo. O tawi ɗon dooyoore, yimɓe ana mboya, ana conkina semmbe.

³⁹ Nde o naatunoo ndee, o wii ɓe: —Ko woni ɗii bojji e ɗii ɲonaali? Suka oo maayaali, o ɗaaniiɗo tan.

⁴⁰ Ɓe puuytini haala makko. Non o yaltini ɓe fuu, o naatidi e baaba suka oo e inna mum e taalibaaɓe taton ɓee suudu to suka oo lelii too.

⁴¹ O nanngi junngo mum, o wii: —Talita kuumii! (Ɗum woni: «Suka debbo, imma!»)

⁴² Suka oo immii ɗon e ɗon, ana yaha. Duuɓi makko yo sappo e ɗiɗi. Yimɓe ɓee kaaynaa sanne.

⁴³ Iisaa yaggini ɓe pati ɓe anndina ɗum fay gooto. O wii ɓe ndokka suka oo ko ɲaama.