Ibraninkooɓe 2 - Aadi keyri: linjiila iisaa almasiihu

Haala kisindam mawɗam

¹ Ndennoo, eɗen kaani wattude hakkillaaji men sanne e ko nan-ɗen koo, pati en cerindo goonga so majjoyen.

² Nelal Laamɗo ngal malaa'ika'en ɓee njottini ngal yo goonga, luuttuɓe naa yedduɓe mo fuu, keɓii jukkungo ngo kaandi.

³ Hono ndaɗirten enen so en njeebiima hono ɗam kisindam mawɗam? Ɗam kisindam, Joomiraaɗo men jaati ardinoo haalde haala majjam, kasen duu hettininooɓe mo ɓee cellini haala makko.

⁴ Laamɗo ɓeydi e dow seedaaku maɓɓe oo kasen maandeeji e taagumansaaji e kaayɗe mawɗe, kaɲum e dokke Ruuhu Ceniiɗo ɗe o fecciri muuyɗe makko ɗee.

Haala ɗowuɗo en faade e kisindam

⁵ E ley ɗum, wanaa malaa'ika'en ɓee Laamɗo hokki laamaade aduna garoowo mo kaalaten haala mum oo.

⁶ Mo o hokki laamaade oo – won ɗo Binndi ɗii ceettii, mbii: «Koɗum fuu yimɓe ngoni sako aɗa waɗana ɗum'en hakkille? Koɗum ɓiɓɓe aadama ngoni sako aɗa hayba ɗum'en?

⁷ A lo'inii ɓe wakkatiiwel seeɗa e ley malaa'ika'en, a filkii ɓe pilki darja e teddungal,

⁸ a waɗii huunde fuu e ley hawju maɓɓe.» So wiyaama Laamɗo waɗii huunde fuu ley hawju maɓɓe, ɗum ana holla o lamminii ɗum'en huunde fuu, fay huunde heddaaki ko ɗowtanaaki ɓe. Kaa so goonga, wanaa kulle ɗee fuu ɗowtanii ɓe tafon.

⁹ Ko njii-ɗen koo yo Iisaa leyɗinkiniiɗo ley malaa'ika'en wakkatiiwel seeɗa, jooni omo filkaa darja e teddungal saabe ko o yii torra maayde koo. Hono non, saabe hinnee Laamɗo, o maayanii yimɓe fuu.

¹⁰ E ley ɗum, ana haani taguɗo huunde fuu mo huunde fuu woodani, anniyiiɗo naannude yimɓe heewɓe e darja mum oo, waɗii Iisaa buuwuɗo laawol kisindam oo kiɓɓuɗo, o hiɓɓinirii ɗum torraaji.

¹¹ Sabi Iisaa cennoowo goonɗinɓe oo kaɲum e sennaaɓe ɓee yo iwdi ngootiri, o yaagortaako noddirde ɓe sakiraaɓe.

¹² Omo wiya Laamɗo: «Mi haalanan sakiraaɓe am ɓee innde maa ndee, mi manete hakkunde kawrital maɓɓe.»

¹³ O wii kasen: «Mi fawan jikke am e Laamɗo.» Kasen duu o wii: «Miɗo nii, miin e koreeji ɗi Laamɗo hokki kam ɗii.»

¹⁴ Hono non, nde wonnoo ɗii koreeji yo tew e ƴiiƴam, Iisaa duu reentii e majji ndiin mbaadi faa o jaaloo laamiiɗo maayde oo, ɗum woni Ibiliisa. O jaaloroo ɗum maayde makko

¹⁵ faa o rimɗina worrunooɓe hono maccuɓe saabe kulol maayde ɓee – kulol ngol nanngunoo ɓe e ley nguurndam maɓɓe fuu.

¹⁶ Sabi eɗen taƴori wanaa malaa'ika'en o wari wallude. Ko o wari wallude dee, iwdi Ibarahiima.

¹⁷ Ndennoo ana wajibii o nannda e sakiraaɓe makko ɓee e huunde fuu, yalla omo laatanoo ɓe Jottinoowo Sadaka Mawɗo jom yurmeende koolniiɗo e golle Laamɗo. Ɗum o waɗi yalla o ittana ɓe e jukkungo ngo ɓe kaandi saabe luutti maɓɓe.

¹⁸ Nde wonnoo kanko e hoore makko o torraama nde Ibiliisa tewti seytaade mo ndee, saabe ɗum, omo waawi faabaade woɓɓe tewteteeɓe faa ceytee ɓee duu.