Ibraninkooɓe 1 - Aadi keyri: linjiila iisaa almasiihu

No Laamɗo haaldiri e men Ɓiyum

¹ Laamɗo haaldiino e njaatiraaɓe men gila ko ɓooyi cili keewɗi e sifaaji keewɗi, o haaldiri e maɓɓe annabaaɓe.

² Kaa e ley ɗee ɲalaaɗe cakitotooɗe o haaldirii e men Ɓiyiiko mo o tagiri aduna oo fuu, mo o waɗi donoowo huunde fuu oo.

³ Kaɲum woni jalbugol annoora teddeengal Laamɗo, kaɲum nanndi e Laamɗo jaati, omo tammborii huunde fuu konngol makko jogiingol semmbe. Caggal nde o tilii laɓɓinde luutti yimɓe ɗii ndee, o jooɗii ɲaamo Laamɗo Toowɗo oo to dow kammu too.

⁴ Ɗum ɓurni mo malaa'ika'en teddude fotude e innde nde Laamɗo hokki mo ɓurnde inɗe maɓɓe ɗee.

Haala Ɓiɗɗo ɓurɗo malaa'ika'en

⁵ Fay gooto e malaa'ika'en ɓee Laamɗo wiyaali: «Aan a Ɓiyam, hannde laatii-mi baam maa.» Naa kasen: «Mi laatoo Baaba mum, laatoo Ɓiyam.»

⁶ Kasen duu, nde o nelata hammadiijo makko oo e aduna oo ndee, o wii: «Yo malaa'ika'en Laamɗo fuu cujidana ɗum.»

⁷ Laamɗo wii banngal malaa'ika'en ɓee: «O waɗii malaa'ika'en makko kenuuli, o waɗii kaadime'en makko lewle yiite.»

⁸ Kaa banngal Ɓiɗɗo oo, mo wii: «Laamu maa, aan Laamɗo, woodan faa abada abadin! Fooccitaare yo tuugorde laamu maa.

⁹ Aɗa yiɗi fooccitaare, aɗa waɲi ooɲaare, saabe ɗum, Laamɗo Joomiraaɗo maa suɓori maa, hokku maa seyo ɓurngo ngo wondiiɓe maa ngoo.»

¹⁰ O wii kasen: «Gila e fuɗɗoode, Joomiraaɗo, aan tabintini leydi, juuɗe maa tagir-ɗaa kammuuji ɗii,

¹¹ kanji ɗi timman, kaa aan, a heddoto, ɗi fuu ɗi kiiɗɗiran no kaddule nii,

¹² a sowiran ɗi no saaya nii, ɗi mbattitoroo no neɗɗo wattitortoo e saayaaji mum nii. Kaa aan, a wattitataako, nguurndam maa duu timmataa.»

¹³ Fay nde wootere, Laamɗo wiyaali gooto e malaa'ika'en: «Jooɗa ɲaamo am, faa mi waɗa njaɓɓaa wayɓe maa.»

¹⁴ Malaa'ika'en ɓee fuu yo ruuhuuji gollanooji Laamɗo, ɗi mo nelata faa ngollana heɓooɓe kisindam ɓee.