Ɓangingol 7 - Aadi keyri: linjiila iisaa almasiihu

Haala yimɓe 144 000 waɗaaɓe maande Laamɗo

¹ Caggal ɗum, njii-mi malaa'ika'en nayon ana ndarii e paale nay ɗee. Ɓe cakkii kenuuli aduna nay ɗii, pati mbifa wanaa e leydi wanaa e geeci wanaa fay e lekki.

² Njii-mi kasen malaa'ika goɗɗo iwruɗo funnaange ana jogii gaɗirgal maande Laamɗo guurɗo oo ngal. O eewnii daande toownde faade e malaa'ika'en nayon hokkaaɓe baawɗe torrude leydi e geeci.

³ O wii ɓe: —Pati mbonnee leydi ndii e geeci oo e leɗɗe ɗee tafon, faa nde keɓu-ɗen waɗude maandeeji e tiiɗe maccuɓe Laamɗo meeɗen ɓee.

⁴ Non nan-mi adadu waɗaaɓe maande e dow tiiɗe mum'en ɓee: eɓe mbaara e ujunaaji teemedere e ujunaaji capanɗe nayon e ujunaaji nayon (144 000) iwɓe e cuuɗi Israa'iilankooɓe ɓee ɗii fuu:

⁵ iwɓe e Yahuuda yo ujunaaji sappo e ɗiɗon (12 000), iwɓe e Ruuben, ujunaaji sappo e ɗiɗon (12 000), iwɓe e Gada, ujunaaji sappo e ɗiɗon (12 000),

⁶ iwɓe e Asiira, ujunaaji sappo e ɗiɗon (12 000), iwɓe e Naftali, ujunaaji sappo e ɗiɗon (12 000), iwɓe e Manaasa, ujunaaji sappo e ɗiɗon (12 000),

⁷ iwɓe e Simeyon, ujunaaji sappo e ɗiɗon (12 000), iwɓe e Lewi, ujunaaji sappo e ɗiɗon (12 000), iwɓe e Isakar, ujunaaji sappo e ɗiɗon (12 000),

⁸ iwɓe e Jebulon, ujunaaji sappo e ɗiɗon (12 000), iwɓe e Yuusufu, ujunaaji sappo e ɗiɗon (12 000), iwɓe e Beɲamin duu, ujunaaji sappo e ɗiɗon (12 000), cuuɗi baaba ɗii fuu ngaɗanaama maande.

No yimɓe leɲi fuu njettirta Laamɗo

⁹ Caggal ɗum, ƴeew-mi, njii-mi jamaa keewɗo mo limataako iwɗo e yimɓe leɲol fuu e suudu baaba fuu e jaaleɲol fuu e ɗemngal fuu ana darii yeeso bimmbeere laamu ndee e Njawdiri ndii. Eɓe ɓoornii saayaaji daneeji, caɓe tamarooje ana e juuɗe maɓɓe.

¹⁰ Eɓe ilina, eɓe mbiya: —Kisindam ɗam to Laamɗo men jooɗiiɗo dow bimmbeere laamu ndee iwrata, kaɲum e Njawdiri ndii.

¹¹ Malaa'ika'en ɓee fuu pilii bimmbeere ndee, mawɓe ɓee e kuɗɗe nay guurɗe ɗee fuu kippii e leydi ana cujidana Laamɗo,

¹² ana mbiya: «Aamiina! Jettooje e darja e hakkilantaaku e jaarooje e teddungal e baawɗe e semmbe, fuu ngoodanii Laamɗo meeɗen faa abada!»

¹³ Non gooto e mawɓe ɓee lamndii kam: —Hoɓe ngoni ɓee yimɓe ɓoorniiɓe saayaaji daneeji? Hoto ɓe iwi?

¹⁴ Mbii-moo-mi: —Moobbo, aan woni annduɗo. O jaɓɓitii o wii kam: —Kamɓe ngoni iwɓe e torra mawɗo tawi eɓe ndeenii. Ɓe loonnii saayaaji maɓɓe, ɓe ndawninirii ɗum'en ƴiiƴam Njawdiri ndii.

¹⁵ Ɗum saabii so ɓe keddoto yeeso bimmbeere laamu Laamɗo ndee, ɓe ndewa mo jemma e ɲalooma ley suudu makko seniindu nduu, kasen duu, jooɗiiɗo e bimmbeere laamu ndee oo huuran e maɓɓe hukkum mum.

¹⁶ Ɓe njolbataa, ɓe ɗomɗataa, naange tappataa ɓe, fay nguleefi ngooti yottataako ɓe.

¹⁷ Sabi Njawdiri ngonndi e hakkunde bimmbeere laamu ndii duran ɓe, juurna ɓe e cewle ndiyam ndokkoojam nguurndam. Laamɗo soccan gonɗi gite maɓɓe fuu.