Ɓangingol 6 - Aadi keyri: linjiila iisaa almasiihu

Peɗooɗe jeɗɗi Haala fettugol feɗoode arandeere: jaalogal

¹ Oon wakkati, ƴeew-mi non njii-mi Njawdiri ndii fettii wootere e peɗooɗe jeɗɗi ɗee. Nan-mi wootere e kuɗɗe nay guurɗe ɗee ana iidina daande mum no gidaango nii, ana wiya: —War gaa!

² Ƴeew-mi, njii-mi puccu daneejo. Baɗɗiiɗo mo oo ana jogii laaɲal, o hokkaa tenngaade laamu, o yaari no jaalotooɗo nii o jaaloto duu.

Haala fettugol feɗoode ɗiɗoɓere: barondiral

³ Nde Njawdiri ndii fettunoo feɗoode ɗiɗoɓere ndee, nan-mi huunde ɗiɗoɓere ndee ana wiya: —War gaa!

⁴ Non puccu goɗɗo boɗeejo yalti. Baɗɗiiɗo mo oo hokkaa kaafaawi mawki, o hokkaa baawɗe yalla omo itta jam e aduna oo, faa yimɓe mbarondira.

Haala fettugol feɗoode tatoɓere: tiiɗalla

⁵ Nde Njawdiri ndii fettunoo feɗoode tatoɓere ndee, nan-mi huunde wuurnde tatoɓere ndee ana wiya: —War gaa! Njii-mi puccu ɓaleejo. Baɗɗiiɗo mo oo ana jogii peesorgal e junngo mum.

⁶ Nan-mi ko wa'i no daande neɗɗo iwii hakkunde kuɗɗe nay guurɗe ɗee, ana wiya: —Munnabi alkama naa munnabiije tati gawri waarata e njoɓdi golle ɲalooma. Kaa pati mursee nebam ɗam e peguujam ɗam.

Haala fettugol feɗoode nayoɓere: maayde

⁷ Nde Njawdiri ndii fettunoo feɗoode nayoɓere ndee, nan-mi daande huunde wuurnde nayoɓere ndee, ana wiya: —War gaa!

⁸ Ƴeew-mi, njii-mi puccu oolo. Baɗɗiiɗo mo oo ana wiyee Maayde, laakaraa ana jokki e makko. Ɓe ndokkaa baawɗe dow nayoɓere aduna oo faa ɓe mbarda yimɓe kaafaawi e yolbere e albalaawuuji e daabaaji ladde.

Haala fettugol feɗoode joyoɓere: wardaaɓe saabe seedaaku mum'en

⁹ Nde Njawdiri ndii fettunoo feɗoode joyoɓere ndee, njii-mi to ley ittirde sadaka too yonkiiji wardanooɓe saabe konngol Laamɗo ngol e seedaaku mo ɓe ceettii oo.

¹⁰ Ɓe eewnii faa toowi, ɓe mbii: —Joomiraaɗo ceniiɗo goongirante, faa mande ndoomu-ɗaa sarde yimɓe wonɓe e aduna oo ɓee faa njoɓto-ɗaa ƴiiƴam amen ɗam?

¹¹ Gooto e maɓɓe fuu hokkaa saaya ndaneewa, ɓe mbiyaa ɓe powta seeɗa tafon, faa adadu sakiraaɓe maɓɓe, gollidiiɓe maɓɓe fodanaaɓe wareede no maɓɓe nii ɓee, kiɓɓa.

Haala fettugol feɗoode jeegoɓere: ɲalooma mawɗo

¹² Nden njii-mi Njawdiri ndii fettii feɗoode jeegoɓere ndee. Non leydi dimmbii dimmbagol manngol, naange ngee ɓawliri no kaasa ɓaleewa nii, lewru nduu fuu wojjiri no ƴiiƴam nii,

¹³ koode kammu ɗee caami e leydi no ɓiɓɓe ibbe kecce caamirta so henndu mawndu wibbii.

¹⁴ Kammu oo iwi, taggiraa no daago taggirtee nii, kaaƴe e duuɗe fuu ɗoofaa iwde e nokkuuje mum'en.

¹⁵ Nden kaanankooɓe aduna e yimɓe tedduɓe e hooreeɓe sordaasi'en e arsukunte'en e jom'en semmbe e rimɓe e riimayɓe fuu cuuɗii e loowi kaaƴe, kaɲum e hakkunde kaaƴe.

¹⁶ Hedde eɓe mbiya loowi kaaƴe ɗii e kaaƴe ɗee: —Caamee e amen! Cuuɗon min e gite jooɗiiɗo dow bimmbeere laamu ndee oo, kaɲum e tikkere Njawdiri ndii!

¹⁷ Sabi ɲalooma mawɗo tikkere maɓɓe ndee yottiima, homo waawi daɗude?