Ibraninkooɓe 8 - Fulfulde Burkina Dewtere Laamɗo Amaana Keso

No Iisaa laatorii curoowo ley amaana ɓurɗo woodde oon

¹ E ley ko kaaleten ɗuum, inan haala ɓurka manngu: eɗen ngoodi Almaami Mawɗo, oon woni jooɗiiɗo gere nyaamo jooɗorgal Jom manngu dow kammu.

² Imo golla golle makko e ley nokkuure seniinde. Ɗum woni hukum goongaajo mo Joomiraaɗo darni, wanaa mo neɗɗo darni.

³ Almaami fuu ina suɓoraa faa yottina to Laamɗo sadakaaji nyaamri e kirsamaaji. Ɗum le, tilay Iisaa laatantooɗo en Almaami Mawɗo oon du heɓa huunde faa yottina.

⁴ Sini to leydi ga o wonnoo fu, o laatataako almaami, sabo dey, ina woodi almaami'en waddooɓe dokke kawrooje e Tawreeta Muusaa.

⁵ To almaami'en ɓeen ngollata toon na holla en ko woni dow kammu. Nokku maɓɓe oon wo sifa tan. Nde Muusaa ɓadinoo darnude hukum seedaaku oon ndeen, Laamɗo sappani mo, wi'i: «Tinnoɗaa, ngaɗiraa huunde fuu dow sifa mo kollumaami dow waamnde oon.»

⁶ Ammaa joonin, Almasiihu halfinaama gollal dewal ɓurngal ngal maɓɓe ngaal woodde, sabo wo curanoowo yimɓe ley amaana ɓurɗo woodde oon. Amaana oon waldaa e arandeejo oon, o yowaama dow haalaaji gonɗi e amaana ɓurɗi woodde.

⁷ Sini amaana arandeejo oon laatakeno kiɓɓuɗo fu, walaa fuu ko ɗiɗaɓo nafata.

⁸ Ammaa Laamɗo wo felu yimɓe muuɗum, wi'i: «Miin Joomiraaɗo miɗo wi'a nyalaaɗe ina ngara ɗe ngaɗammi amaana keso e yimɓe Israa'iila e yimɓe Yahuudiya.

⁹ O nanndataa e amaana mo ngaɗidinnoomi e maamiraaɓe maɓɓe nde ɗowunoomi ɗum'en faa mi wurtina ɗum'en leydi Misira ndeen. Ko kamɓe e ko'e maɓɓe ɓe mbonni amaana am ɗuum, miin du mi tottitake ɓe. Noon mbiimi, miin Joomiraaɗo.»

¹⁰ Joomiraaɗo wi'i: «Inan amaana mo ngaɗidammi e Israa'iilankooɓe caggal balɗe ɗeen: Mi wattan jamirooje am e hakkillooji maɓɓe, mi winnda ɗe e ɓerɗe maɓɓe, mi laatoo Laamɗo maɓɓe, ɓe laatoo yimɓe am.

¹¹ Katin walaa fuu ko neɗɗo tindina gondo muuɗum, maa sakiike mum faa wi'a ɗum: ‹Hey, anndu Joomiraaɗo›, sabo yimɓe fuu anndan kam, gilla lo'uɓe faa e tedduɓe.

¹² Sabo mi yaafoto lutti maɓɓe, mi ittan hakkeeji maɓɓe e hakkillo am fey.»

¹³ Ko o haali kabaaru amaana keso oon ɗuum, o hiiɗɗini amaana arandeejo oon. Joonin kaa, ko naywi faa nyoofii ɗuum ɓadake lallineede.