Ibraninkooɓe 1 - Fulfulde Burkina Dewtere Laamɗo Amaana Keso

No Laamɗo haaldiri adunaaru e Ɓiyum

¹ Gilla arande Laamɗo haalaniino maamiraaɓe meeɗen wakkatiiji keewɗi e sifaaji keewɗi, haaldanii ɓe e kunnduɗe annabaaɓe.

² Ammaa e ley nyalaaɗe cakitiiɗe ɗe o haaldanii en e Ɓiyiiko mo o tagiri adunaaru ndu fuu. O waɗi ɗum donoowo huunde fuu.

³ Ɓiyiiko oon na yaynira teddeengal Laamɗo. Alhaali makko ina foti e Laamɗo jaati. Imo heɓindorii huunde fuu e konngol makko jogiingol semmbe. Caggal ko o tilii laaɓinde hakkeeji yimɓe ɗuum, o jooɗii gere nyaamo Laamɗo jom manngu to dow kammu toon.

⁴ Ndelle ɓiɗɗo oon laatake ɓurɗo maleyka'en manngu, hono no innde nde Laamɗo hokki mo ndeen ɓurdi inɗe maɓɓe faa waawaa fonndideede.

Haala Ɓiɗɗo ɓurɗo maleyka'en

⁵ Si goonga, fay gooto e maleyka'en ɓeen Laamɗo wi'aay: «Wo a ɓiyam, hannden mi laatake Baaba maa.» Naa katin: «Miin, mi laatanto o Baaba, kanko du o laatanoo kam Ɓiɗɗo.»

⁶ Katin du, nde o ɓadinoo nulude afo ardiiɗo oon ley adunaaru ndeen, o wi'i: «Maleyka'en Laamɗo fuu cujidana ɗum.»

⁷ Laamɗo wi'ii dow maleyka'en ɓeen: «O waɗi maleyka'en makko keni, o waɗi maccuɓe makko ɗemle yiite.»

⁸ Ammaa dow Ɓiɗɗo oon, o wi'i: «Laamu maa, aan Laamɗo, heddoto faa abada abadin! Potal woni sawru ndu laamortoɗaa.

⁹ Aɗa yiɗi fonnditaare, aɗa wanyi oonyaare. Saabe ɗuum, Laamɗo Joomiraaɗo maa suɓii ma joori nebbam kaanankaaku dow maaɗa, hokki ma seyo ɓurngo ngo banndiraaɓe maa fuu.»

¹⁰ O wi'i katin: «Aan Joomiraaɗo, illa fuɗɗoode a joƴƴinii adunaaru, e juuɗe maa tagirɗaa kammuuli ɗiin.

¹¹ Kanji ɗi timman. Aan kaa, a heddoto. Ɗi fuu ɗi kiiɗɗiran hono kaddule ni.

¹² A sowiran ɗi hono saaya, ɗi mbattitorto no neɗɗo wattitirta saayaaji muuɗum ni. Aan kaa, a waylitataako, nguurndam maa du walaa timmoode.»

¹³ Fay nde wootere, Laamɗo wi'aay gooto e maleyka'en: «Jooɗa gere nyaamo am, faa mi waɗa njaaɓaa wayɓe ma.»

¹⁴ Ɗume woni maleyka'en? Ɓe fuu wo ɓe ruuhuuji gollanooji Laamɗo ɗi o nulata faa ngollana heɓooɓe kisindam ɓeen.