Ɓangingol 18 - Fulfulde Burkina Dewtere Laamɗo Amaana Keso

No Baabiila halkirtee

¹ Caggal ɗuum, nji'umi maleyka goɗɗo keewɗo baawɗe ina ƴuura dow kammu ina jippoo. Darja makko jalbini adunaaru.

² O ƴeewnii faa toowi, o wi'i: «Baabiila halkii! Baabiila ngalluure mawnde ndeen halkii! Nde laatake joonnde ginnaaji, suuɗorde ruuhuuji tuunuɗi fuu e foondu tuunundu wanyaandu fuu!

³ Sabo leyɗe ɗeen fuu culirii cabijam, caamii saabe fijirde mayre nyaaɗunde. Kaanankooɓe adunaaru ɓeen njeenii e mayre. Luumotooɓe e adunaaru ɓeen fuu keɓii jawdi saabe danyal mayre keewngal faa wittii ngaal.»

⁴ Ndeen nanumi daande wonnde ƴuuri dow kammu, ina wi'a: —Onon yimɓe am, njaltee e mayre! Faa taa on kawtu e mayre hakkeeji, faa taa masiibaaji mayre kewta on!

⁵ Sabo hakkeeji mayre ɗuuɗi, ɗi njowundurii faa ɗi njottake kammu, Laamɗo du yeggitaay golleeji mayre bonɗi ɗiin.

⁶ Ngaɗee nde hono no nde waɗiri on ni! Njoɓtoɗon nde kile ɗiɗi e ko nde waɗi on! Ko nde siiwani on ley horde mayre ɗuum, ciiwanee nde kile ɗiɗi!

⁷ Torron nde, kebbinon mettorgal mayre faa haddi no nde teddiniri hoore mayre, faa fota e no nde wuurdi mbelirka. Sabo inde wi'a e ɓernde mayre: «Inan miɗo jooɗii, wo mi kaananke debbo, mi wanaa debbo mo gorum maayi, abada mettorgal cuddu hewtataa kam.»

⁸ Saabe no nde worri noon, masiibaaji mayre caaman dow mayre: maayde e mettorgal e rafo. Nde wuldete yiite, sabo Laamɗo Joomiraaɗo carotooɗo nde wo Jom semmbe.

Haala woyeede Baabiila

⁹ Kaanankooɓe adunaaru wonduɓe e mayre jeenu de kawti e mayre danyal ɓeen nji'an cuurki ngulu mayre. Wakkati oon, ɓe mboyan, ɓe piiran ɓerɗe maɓɓe mettorgal.

¹⁰ Ɓe ndaroto to toowti, sabo iɓe kula jukkungo mayre. Iɓe mbi'a: —Yoo yoy! Yoo yoy! Baabiila, ngalluure mawnde nde, ngalluure jogiinde semmbe nde! Nde jukkaama wakkati gooto tan!

¹¹ Luumotooɓe e adunaaru ɓeen mboyan, cunanto nde, sabo fay gooto soodataa gineeji maɓɓe katin.

¹² Gineeji maɓɓe wo kaŋŋe e cardi e kaaƴe dime e kaaƴe luulu e kaddule ɗaatuɗe e kaddule ciiɗe e kaddule hariiri tiiɗuɗe e kaddule boɗeeje e leɗɗe uurooje goɗɗe e gineeji moƴƴiniraaɗi nyiiƴe nyiibi e gineeji moƴƴiniraaɗi leɗɗe tiiɗuɗe coggu e jamɗe boɗeeje e jamɗe ɓaleeje e hayre wi'eteende marba.

¹³ Gineeji maɓɓe katin wo funngooji belnirɗi e uurnirɗi e gowe e nebbam uurɗam e uurdi miira e uurdi cuurtinteendi e cabijam e nebbam ɓiɓɓe jaytun e conndi alkama e aawdi alkama e na'i e baali e pucci e torkooji e maccuɓe e yonkiiji yimɓe.

¹⁴ Luumotooɓe ɓeen mbi'i ngalluure ndeen: —Ko njiɗunoɗaa heɓude fuu woɗɗake ma: keewal mbelirka maa e dawla maa fuu halkii, a hewtataa ɗum abada katin.

¹⁵ Luumotooɓe heɓuɓe jawdi e mayre ɓeen ndaroto to toowti, sabo ina kula jukkungo mayre. Ɓe mboyan, ɓe cunoto,

¹⁶ ɓe mbi'an: —Yoo yoy! Yoo yoy! Ngalluure mawnde nyaaƴiroore kaddule ɗaatuɗe e kaddule ciiɗe e kaddule boɗeeje, soɗortoonde kaŋŋe e kaaƴe dime e kaaƴe luulu!

¹⁷ E ley wakkati gooto tan, jawdi ndiin fuu halkaa! Dawranooɓe laanaaji ndiyam e yahooɓe ley majji e dogginooɓe ɓeen, kam e heɓooɓe neema muɓɓen e luumagol dow maayo ɓeen, ɓe fuu ɓe toowtan ɓe ndaroo.

¹⁸ Wakkati mo ɓe nji'ata cuurki ngulu mayre, ɓe mbullan, ɓe mbi'a: —Ngalluure ndeye nanndunoo e ngalluure mawnde nde?

¹⁹ Ɓe ndufan leydi dow ko'e maɓɓe no ɓe poti metteede. Ɓe mboyan, ɓe cunoo, ɓe mbulla, ɓe mbi'a: —Yoo yoy! Yoo yoy! Ngalluure mawnde ndeen, nde keewal danyal muuɗum hokki jogiiɓe laanaaji e ley maayo fuu jawdi, e ley wakkati gooto tan, nde halkii!

²⁰ Kammu, welta e halkeede mayre! Seniiɓe e nulaaɓe e annabaaɓe, onon du mbeltee! Sabo Laamɗo sarake nde ko nde waɗi on ɗuum!

²¹ Wakkati oon, maleyka jom semmbe hooƴi kaaƴal nanndungal e niisirde mawnde, de faɗɗiri ɗum semmbe ley maayo, wi'i: —Nii Baabiila ngalluure mawnde ndeen faɗɗirtee, nde yi'ataake abada katin!

²² Katin du, fay gooto nanataa ley mayre kolli hoɗooɓe gaaci naa yimooɓe naa fuufooɓe cereeli e barguuji. Golloowo nyeenyuɗo fay gooto yi'ataake katin e ley mayre. Duko unduɗe nanataake katin e ley mayre.

²³ Annoora lampal yaynataa ley mayre katin. Sawtu ɓaŋuɗo e ɓaŋaaɗo nanataake e mayre katin. Bone oon fuu hewtan Baabiila sabo luumotooɓe mayre ɓurnoo adunaaru fuu baawɗe. Wooɗi du, nde hiildii leyɗe fuu e ndaggadaaku mayre.

²⁴ Katin du, ƴiiƴam annabaaɓe e seniiɓe e waraaɓe ley adunaaru ɓeen fuu tawaama e mayre.