Yuunusa 2 - Dewtere Laamɗo Fulfulde Burkina Faso

No Yuunusa waɗiri du'aare to Joomiraaɗo

¹ Joomiraaɗo neli liingu mawngu moɗi Yuunusa. Yuunusa heddii nder reedu liinngu nguun nyaloomaaji tati e jemmaaji tati.

² Nder reedu liingu mawngu nguun, Yuunusa waɗi du'aaw to Joomiraaɗo, Laamɗo muuɗum.

³ O wi'i: Mi noddii ma Joomiraaɗo nder torraaji am, aan du a nootake kam. Faa ley reedu laakara ƴeewnimaami, aan du a nani kuuɓaali am.

⁴ A faɗɗii kam nder ndiyam lugguɗam faa ley reedu maayo. Semmbeeji ndiyam piilakeno kam, bempeƴƴe ndiyam maaɗa fuu kuuriino kam.

⁵ Miin miɗo miilinoo: Wo mi diiwaaɗo yeeso maaɗa. Ammaa gite am kuccitan katin faro suudu maaɗa seniindu.

⁶ Ndiyam sukkii kam kine, ndiyam lugguɗam huurii kam, Guumooje ley ndiyam cuddii hoore am.

⁷ Mi yoolake faa to baamle puɗɗi, mi kasaama to luggiɗi hono uwaaɗo nder yanaande ni. Ammaa aan Joomiraaɗo, Laamɗo am, a ittoyii kam nder gayka halkere.

⁸ Nde yonki am nesunoo dillude ndeen, miccitimaami, aan Joomiraaɗo am. Wooɗi du'aare am du yottake to maaɗa, to suudu maaɗa Seniindu nduun.

⁹ Jokkuɓe allaaji ɓoli, tottitake e moƴƴere maaɗa.

¹⁰ Ammaa miin kaa, mi yimante jimi jettooji ma, mi sakkante kirsamaaji, mi tabintinan ko kunanimaami fuu. Wo to Joomiraaɗo, kisindam ƴuurata!

¹¹ Ndeen Joomiraaɗo haaldii e liingu nguun, de ngu tuuti Yuunusa dow leydi njoorndi.