Biblia Todo Logo
Bìoball air-loidhne

- Sanasan -

Wurtagol 9 - Dewtere Laamɗo Fulfulde Burkina Faso


Masiiba joyaɓo: Haala nyawu daabaaji

1 Ndeen Joomiraaɗo wi'i Muusaa: — Yahu to Fira'awna kaalanaa ɗum, mbi'aa: «Inan ko Joomiraaɗo, Laamɗo Ibraninkooɓe wi'i: Accu yimɓe am ndilla faa ɗowtanowoo kam.

2 Si a heddake aɗa faddii ɓe, a salake yoppude ɓe ndilla fu,

3 inan, miin Joomiraaɗo, junngo am jippinan nyawu cattungu dow daabaaji maaɗa gonɗi ley ladde e pucci e araaji e geelooɗi e na'i e dammuuli maaɗa fuu.

4 Ammaa Joomiraaɗo senndan kulle Israa'iila'en e kulle Misirankooɓe. Ley kulle Israa'iila'en fuu fay gootel waatataa.»

5 Joomiraaɗo itti wakkati mo waɗata ɗum, wi'i: — Jaango miin Joomiraaɗo mi waɗan huunde ndeen ley leydi ndii.

6 Jaangoore majjum Joomiraaɗo waɗi ɗum. Kulle Misirankooɓe fuu mbaati ammaa kulle Israa'iila'en kaa fay gootel waataay.

7 Fira'awna neli yimɓe njaha ndaarowa. Ɓe tawi ley daabaaji Israa'iila'en fay ngoota waataay. Ammaa e noon fuu, ɓernde Fira'awna heddii na yoori. O yoppaay Israa'iila'en ndilla.


Masiiba jeegaɓo: Haala ɓuuye naawuɗe

8 Joomiraaɗo wi'i Muusaa e Haaruuna: — Nokkee ndoondi duppirde de Muusaa saaka ndi dow e gite Fira'awna.

9 Ndi laatoto sollaare dow leydi Misira fuu. Ndi laatoo ɓuuye pusooje de ɗeen cankitoo dow yimɓe e dow kulle leydi Misira fuu.

10 Ɓe nokki ndoondi duppirde ndiin, ɓe ndarii yeeso Fira'awna. Muusaa faɗɗi ndi dow, ndi laatii ɓuuye pusooje de cankitii dow yimɓe e kulle fuu.

11 Jom'en dabareeji ɓeen mbaawaay daraade yeeso Muusaa saabe ɓuuye ɗeen, sabo iɓe ngondi e ɓuuye hono no yimɓe Misira heddiiɓe ɓeen.

12 Joomiraaɗo yoorni ɓernde Fira'awna katin. O hettindanaaki ɓe. Ɗum laatorii hono no Joomiraaɗo wiirunoo Muusaa noon.


Masiiba jeɗɗaɓo: Haala marmalluuje

13 Ndeen Joomiraaɗo wi'i Muusaa: — Umma jaango gilla subaka, njahaa ndarooɗaa yeeso Fira'awna mbi'aa ɗum: «Inan ko Joomiraaɗo Laamɗo Ibraninkooɓe wi'i: Accu yimɓe am ndilla faa ɗowtanowoo kam.

14 Sabo joonin kaa, mi nelan masiibaaji am fuu dow maaɗa e dow gollooɓe maa e yimɓe maa faa annditaa ley adunaaru fuu hono am walaa.

15 Sabo si mi foortiino junngo am, mi fiyirii ma, aan e yimɓe maa fuu nyawu mbonngu, tawan on kalkiino ley adunaaru ko ɓooyi.

16 Ammaa mi accii ma mbuuruɗaa faa mi holle baawɗe am, faa innde am sankitoo ley adunaaru fuu.

17 Faa joonin a selaay toownude hoore maaɗa, a jaɓaay yoofude yimɓe am ndilla.

18 «Inan, jaango hono wakkati oo, mi tomnan marmalluuje mawɗe ɗe hono muɓɓen nji'aakano ley Misira gilla fuɗɗoode muuɗum faa warde joonin.

19 Joonin le, nelu kulle maaɗa e ko njogiɗaa ley gese fuu nannee law ley suuɗorde. Sabo marmalluuje piyan de mbara yimɓe e huunde fuu ko tawaa ley gese ko naataay ley cuuɗi».

20 Woɓɓe hakkunde gollooɓe Fira'awna kuli konngol Joomiraaɗo ngool, ngaɗi gollooɓe muɓɓen e kulle muɓɓen fuu naati ley cuuɗi.

21 Ammaa ɓe koolaaki konngol Joomiraaɗo ɓeen kaa fuu njoppi gollooɓe muɓɓen e kulle muɓɓen ley gese.

22 Joomiraaɗo wi'i Muusaa: — Ɓantu junngo maaɗa faro kammu faa marmalluuje toɓa dow leydi Misira fuu: dow yimɓe e kulle e funngooji gese leydi Misira fuu.

23 Muusaa ɓanti sawru muuɗum dow. Joomiraaɗo waɗi pelnyaali e marmalluuje tawti yiite maƴƴe toɓi e leydi. Joomiraaɗo tomni marmalluuje dow leydi Misira.

24 Abada hono majjum waɗaayno ley leydi Misira gilla puɗɗam lenyol Misirankooɓe. Marmalluuje na mboɓɓoo, maƴƴe na maƴƴa hakkunde marmalluuje ɗeen.

25 Haddi leydi Misira fuu, marmalluuje mawɗe sanne tappi huunde ko tawaa ley gese fuu: tagaaɓe e kulle fuu. Ɗe keli funngooji gese e leɗɗe gonɗe ley gese fuu.

26 Leydi Goosan to yimɓe Israa'iila njooɗii toon tan woni to marmalluuje toɓaay.

27 Ndeen Fira'awna noddi Muusaa e Haaruuna, wi'i ɗum'en: — Joonin kaa mi waɗii junuuba. Joomiraaɗo wo dartiiɗo, de miin e yimɓe am kaa, minen njeyi feloore.

28 Ŋaaree Joomiraaɗo darna pelnyaali ɗii e marmalluuje ɗee fuu. Mi accan on ndillon, on keddataako ɗoo katin.

29 Muusaa wi'i mo: — Nde mburtiimi ley huɓeere nde fu, mi ɓantan juuɗe am faro Joomiraaɗo, mi ŋaaroo ɗum. Pelnyaali ɗiin e marmalluuje ɗeen fuu celan faa paamaa wo Joomiraaɗo kam jeyi adunaaru.

30 Ammaa aan e gollooɓe maa kaa, miɗo anndi on kulaay Laamɗo Joomiraaɗo tafon.

31 Gabbe len e sa'iiri fuu mboni, sabo sa'iiri ndiin waɗiino butaali. Len ɗuum du waɗiino pinndi.

32 Ammaa siyiiji alkama mbonaay sabo ɗum ɓenndataa law.

33 Muusaa dilli to Fira'awna wurtii huɓeere ndeen, ɓanti juuɗe muuɗum faro Joomiraaɗo. Pelnyaali ɗiin e marmalluuje ɗeen fuu celi. Ƴuwoonde du helti.

34 Ammaa nde Fira'awna yi'unoo ƴuwoonde ndeen e marmalluuje ɗeen e pelnyaali ɗiin keltii fu, waɗi junuuba katin, kam e gollooɓe muuɗum fuu njoorni ɓerɗe muɓɓen.

35 Ɓernde Fira'awna heddii na yoori, o accaay Israa'iila'en ndilla. Ɗum laatorii hono no Joomiraaɗo wiirunoo Muusaa noon.

© SIM International 2012, 2022

Lean sinn:



Sanasan