Wurtagol 6 - Dewtere Laamɗo Fulfulde Burkina Faso

¹ Ndeen Joomiraaɗo wi'i Muusaa: — Joonin a yi'an ko ngaɗammi Fira'awna. E baawɗe junngo semmbiɗingo, o yoppan Israa'iila'en ndilla. Si goonga e baawɗe maggo o riiwan ɓe ley leydi makko.

² Laamɗo haaldi e Muusaa katin, wi'i: — Miin woni Joomiraaɗo.

³ Arande mi ɓanganiino Ibrahiima e Isiyaaka e Yaakuuba, kollumi ɓe wo mi Laamɗo Jom Baawɗe, ammaa mi anndinaay ɓe innde am wo Joomiraaɗo bi'eteeɗo «Miin Woni» oon.

⁴ Mi waɗdii amaana am e maɓɓe mi hokkan ɓe leydi Kanaana, leydi ndi ɓe koɗunoo e muuɗum ndiin.

⁵ Joonin, mi nanii uumaali yimɓe Israa'iila ley maccungaaku ngu Misirankooɓe ngatti ɓe nguun. Mi siwtorii du amaana am oon.

⁶ Saabe ɗuum mbi'aa yimɓe Israa'iila: Miin woni Joomiraaɗo, mi wurtinan on ley golleeji tiiɗɗi ɗi Misirankooɓe ngatti on ɗiin. Mi dannan on e maccungaaku maɓɓe, mi rimɗiniran on junngo semmbiɗinngo e sariyaaji mawɗi ɗi ngaɗammi.

⁷ Mi waɗan laatoɗon yimɓe am, miin du mi laatoo Laamɗo mooɗon. Ndeen on paaman wo miin woni Joomiraaɗo, Laamɗo mooɗon, burtinoowo on ley golleeji yimɓe Misira tiiɗɗi ɗiin.

⁸ Mi nannan on leydi ndi kunaniimi Ibrahiima e Isiyaaka e Yaakuuba mi hokkan ɗum'en ndiin. Mi hokkan on ndi, ndi laatoo ndongu mooɗon. Wo miin Joomiraaɗo wi'i on ɗum!

⁹ Muusaa yehi humpitowi yimɓe Israa'iila haala kaan, ammaa ɓe kettindanaaki ɗum saabe jikke maɓɓe taƴii, wooɗi du maccungaaku maɓɓe nguun sattii sanne.

¹⁰ Joomiraaɗo haaldi e Muusaa katin, wi'i:

¹¹ — Yahu kaaldaa e Fira'awna kaananke Misira oon, mbi'aa ɗum yoppa yimɓe Israa'iila mburtoo leydi muuɗum.

¹² Muusaa jaabii Joomiraaɗo, wi'i: Fay yimɓe Israa'iila kettindanaaki kam, ndelle noy Fira'awna hettindanortoo kam miin mo haala muuɗum laaɓaa oo?

¹³ Ndeen Joomiraaɗo wi'i Muusaa e Haaruuna njahaa kollowaa yimɓe Israa'iila e Fira'awna kaananke Misira yamiroore muuɗum, ɗuum woni wurtinde yimɓe Israa'iila leydi Misira.

Ƴuwdi Muusaa e Haaruuna

¹⁴ Inan hooreeɓe cuuɗi Israa'iila: Ɓiɓɓe Ruben afo Israa'iila ɓeen wo Henok e Pallu e Hesron e Karmi. Ɓeen ngoni ƴuwdi Ruben.

¹⁵ Ɓiɓɓe Simeyon wo Yemu'el e Yamin e Ohada e Yakin e Sohar e Sawulu ɓii Kanaaninke debbo. Ɓeen ngoni ƴuwdi Simeyon.

¹⁶ Inan inɗe ɓiɓɓe Lewi fodde cuuɗi muɓɓen: Gerson e Kehat e Merari. Duuɓi Lewi fuu wo 137.

¹⁷ Ɓiɓɓe Gerson du wo Libini e Simey, mono fuu e cuuɗi muuɗum.

¹⁸ Ɓiɓɓe Kehat wo: Amram e Yitsehar e Heberon e Ujjiyel. Duuɓi Kehat fuu wo 133.

¹⁹ Ɓiɓɓe Merari du wo: Mahili e Musi. Ɓeen ngoni lenyol Lewi fodde cuuɗi muɓɓen.

²⁰ Amram ɓaŋi goggo muuɗum Yokebed. Oon rimani ɗum Haaruuna e Muusaa. Duuɓi Amram fuu wo 137.

²¹ Ɓiɓɓe Yitsehar du wo: Koora e Nefek e Jikiri.

²² Ɓiɓɓe Ujjiyel wo: Misayel e Elsafan e Sitiri.

²³ Haaruuna ɓaŋi Eliseba ɓii Aminadaabu sakiike Naasun debbo. Oon rimani ɗum Nadabu e Abihu e Eliyajar e Itamar.

²⁴ Ɓiɓɓe Koora wo Asir e Elkana e Abiyasaf. Ɓeen ngoni ƴuwdi Koora.

²⁵ Eliyajar ɓii Haaruuna ɓaŋi ɓii Putiyel debbo. Oon rimani ɗum Pinehas. Yimɓe limtaaɓe ɓeen ngoni ƴuwdi Lewi fodde cuuɗi muɓɓen.

²⁶ Haaruuna e Muusaa inndaaɓe ɗo ɓeen jaati ngoni ɓe Joomiraaɗo yamirnoo mburtinira jamaare muuɗum, Israa'iila'en ley leydi Misira geɓe geɓe.

²⁷ Wo kamɓe kaaldunoo e Fira'awna, kaananke Misira, kabaaru wurtingol Israa'iila'en ley leydi Misira. Wo Muusaa e Haaruuna pay.

No Joomiraaɗo heyɗinkinirani Muusaa amaana muuɗum

²⁸ Nde Joomiraaɗo haaldunoo e Muusaa ley leydi Misira ndeen,

²⁹ wi'i: — Miin woni Joomiraaɗo, haalan Fira'awna kaananke Misira, ko mbi'anmaami fuu.

³⁰ Ammaa Muusaa jaabii Joomiraaɗo, wi'i: — Inan miin wo mi jom toni tedduɗi, haala am laaɓaa. Ndelle noy Fira'awna hettindanortoo kam?