Wurtagol 5 - Dewtere Laamɗo Fulfulde Burkina Faso

No Muusaa e Haaruuna kaaldiri e Fira'awna

¹ Caggal ɗuum Muusaa e Haaruuna njehi to Fira'awna, mbi'i ɗum: — Inan ko Joomiraaɗo, Laamɗo Israa'iila wi'i: «Yoppu yimɓe am njaha ngaɗanowa kam iidi ley ladde yoornde.»

² Ammaa Fira'awna wi'i: — Moy woni Joomiraaɗo faa mi hettindanoo ɗum, de mi yoppa yimɓe Israa'iila ndilla? Mi anndaa Joomiraaɗo, wooɗi mi yoppataa yimɓe Israa'iila ndilla.

³ Ndeen Muusaa e Haaruuna mbi'i: — Laamɗo Ibraninkooɓe, Laamɗo amin ɓanganii min. Ndelle miɗen ŋaare accaa min njaha haddi balɗe tati ley ladde yoornde faa min ngaɗana Joomiraaɗo, Laamɗo amin kirsamaaji. Si wanaa noon fu, o waɗan nyawuuji bonɗi maa konu wara min.

⁴ Ammaa kaananke Misira wi'i: — Muusaa e Haaruuna, ko waɗi oɗon ndunƴa yimɓe Israa'iila njoppa golleeji muɓɓen. Coƴƴee to golleeji mooɗon.

⁵ O ɓeydi, o wi'i: — Ndaar no yimɓe ɓeen ɗuuɗiri ley leydi ndii, de oɗon kaɗa ɓe gollude golleeji maɓɓe!

No Fira'awna ɓeydiri golle Israa'iila'en

⁶ Nyannde ndeen Fira'awna yamiri Misirankooɓe mawɓe golleeji tiiɗuɗi e Israa'iila'en ardiiɓe golleeji ɓeen fuu, wi'i:

⁷ — Taa kokkee yimɓe ɓeen huɗo katin faa piya pereeje hono no arande noon. Ɓe njaha kamɓe e ko'e maɓɓe ɓe pilowoo huɗo koon.

⁸ Ammaa ndoolɗon ɓe ɓe piya nyannde fuu haddi pereeje ɗe ɓe njeynoo fiide arande ɗeen. Taa ɓuyton fay gootum. Wo ɓe jaasuɓe. Ɗum waɗi iɓe ŋaaroo laawol waɗanoyde Laamɗo maɓɓe kirsamaaji.

⁹ Tiiɗinee golleeji maɓɓe taa ɓe keɓa wakkati sakko ɓe kettindoo pene.

¹⁰ Mawɓe golleeji tiiɗuɗi e ardiiɓe Israa'iila'en ɓeen mburtii laamorde, njehi kaalanowi yimɓe Israa'iila, mbi'i: — Inan ko Fira'awna wi'i: «On hokkataake huɗo katin.

¹¹ Njahon pilanoɗon ko'e mooɗon huɗo to keɓoton fuu, ammaa on ɓuytantaake golleeji mooɗon fey.»

¹² Yimɓe Israa'iila cankitii ley leydi Misira fuu faa kawrondina huɗo ko njillondira e loope.

¹³ Mawɓe golleeji tiiɗuɗi ɓeen keddii ina ndoolɗa ɓe, ina mbi'aa: — Tinnee timminee golleeji mooɗon ɗi njeyɗon gollude nyannde fuu ɗiin. Ɗum laatoo hono arande nde kokketenoɗon huɗo ndeen.

¹⁴ Iɓe piya du yimɓe Israa'iila ardiiɓe golleeji tiiɗuɗi, ardinaaɓe jamaa ɓeen. Iɓe mbi'a ɗum'en: Ko waɗi keeŋan e hannden fuu on timminaay ko njeyɗon gollude, on piyaay haddi pereeje ɗe njeynoɗon fiide ley nyalaande ɗeen?

¹⁵ Ardiiɓe Israa'iila'en ɓeen ngari to Fira'awna, mboyi, mbi'i ɗum: Ko waɗi ngaɗuɗaa min ni, minen maccuɓe maaɗa?

¹⁶ Minen maccuɓe maa, min kokkataake huɗo katin ammaa iɓe mbi'a min: «Piyee pereeje.» Inan maccuɓe maaɗa ina piyee, de wo yimɓe maaɗa njeyi feloore.

¹⁷ Fira'awna wi'i: — Wo on jaasuɓe, jaasuɓe sanne! Ɗum waɗi oɗon mbi'a on njahan ngaɗanowon Joomiraaɗo mon kirsamaaji.

¹⁸ Njehee ngollowee. On kokkataake huɗo, wooɗi on kiɓɓinan du pereeje ɗe njeyɗon fiide ɗeen.

¹⁹ Ardiiɓe Israa'iila'en ɓeen paami keɓii torra mawɗo nde nannoo ina wi'ee limgal pereeje piyeteeɗe ɗeen ɓuytataake ndeen. Nyannde fuu sanaa ɓe piya haddi pereeje muuɗum.

²⁰ Nde ɓe mburtinoo to Fira'awna fu, ɓe tawii Muusaa e Haaruuna na keɗii ɓe.

²¹ Ɓe mbi'i ɗum'en: — Joomiraaɗo taykoo ko ngaɗuɗon min ɗuum de hiitoo on. On ngaɗii min min nyiddiniiɓe yeeso Fira'awna e yimɓe muuɗum. On ngattii e juuɗe maɓɓe kaafaahi faa ɓe mbara min.

No Laamɗo fodorii dannude yimɓe Israa'iila

²² Muusaa yeccii to Joomiraaɗo, wi'i ɗum: — Yaa Joomiraaɗo, ko waɗi de aɗa torrira nii yimɓe ɓee? Ko waɗi nelɗaa kam?

²³ Gilla njahumi to Fira'awna kaalanmi ɗum haalaaji maaɗa ɗiin, o ɓeydi torrude yimɓe maaɗa, wooɗi a waɗaay faa'e faa kisinaa ɗum'en!