Wurtagol 40 - Dewtere Laamɗo Fulfulde Burkina Faso

Haala darnugol Hukum Ceniiɗo

¹ Joomiraaɗo wi'i Muusaa: —

² Nyannde go'o lewru go'aɓurdu, ndarnaa Hukum Ceniiɗo ɗuum woni Hukum Hawrugol e Joomiraaɗo oon.

³ Ndesaa Keesuwal Amaana ngaal de uddiraa ngal ridoo.

⁴ Nannaa taabawal ngaal de njoƴƴinaa ngal toon. Nannaa joƴƴinirde fitillaaji ndeen du, de moƴƴinaa fitillaaji muuɗum.

⁵ Nannaa wulirde ure waɗiraande kaŋŋe ndeen, njoƴƴinaa ɗum yeeso Keesuwal amaana de kaɓɓaa wudere uddirde ndeen dow dammbugal hukum oon.

⁶ Njoƴƴinaa sakkirde sadakaaji buleteeɗi ndeen naarude nokkuure seniinde ɗum woni Hukum Ceniiɗo oon.

⁷ Njoƴƴinaa taasawal manngal ngaal hakkunde hukum oon e sakkirde ndeen, ngattaa ndiyam e maggal.

⁸ Ngaɗanaa taliyaare ndeen kokuwol wooɗi du ngaɗanaa naarude mayre gude.

⁹ Kooƴaa nebbam seningol, njooraa dow hukum oon e ko woni e muuɗum fuu. Ceninaa hukum oon kam e gollitirɗe gonɗe ley muuɗum fuu faa ɗum fuu ɗum laatoo ceniiɗum.

¹⁰ Njooraa nebbam dow sakkirde sadakaaji buleteeɗi ndeen e gollitirɗe muuɗum fuu, noon ceninirtaa nde faa nde laatoo senii sanne.

¹¹ Njooraa nebbam dow taasawal manngal ngaal e joƴƴinirde muuɗum faa ɗum fuu ɗum laatoo ko senii.

¹² Ngaddaa Haaruuna e ɓiɓɓe muuɗum dammbugal Hukum Ceniiɗo toon de lootiraa ɓe ndiyam.

¹³ Ndeen ɓornaa Haaruuna kolte ceniiɗe ɗeen, njooraa nebbam dow hoore muuɗum de ceninaa ɗum faa gollana kam golle almaamaaku.

¹⁴ Ngaddaa ɓiɓɓe makko du, ɓornaa ɗum'en forgooji

¹⁵ de njooraa nebbam dow ko'e muɓɓen hono no ngaɗiranɗaa baabii ɓe noon, heɓa ɓe naata e golle almaamaaku. Seningol ɓe ngool tabintinan almaamaaku maɓɓe faa abada, kamɓe e ƴuwdi maɓɓe fuu.

¹⁶ Muusaa waɗiri huunde fuu hono no Joomiraaɗo yamiri noon pay.

¹⁷ Nyannde go'o, lewru go'aɓurdu ley hitaande ɗiɗaɓerde Hukum Ceniiɗo oon darnaa.

¹⁸ Muusaa darni hukum oon, o darni tiigorɗe muuɗum. O fali pale o darni darnirɗe.

¹⁹ O darni hukum nokkuure ndeen, o suddiri ɗum wudere fodde no Joomiraaɗo yamirnoo o noon.

²⁰ Ndeen o hooƴi alluuje amaana ɗeen, o watti ley keesuwal Amaana ngaal. O soorni cabbi ɓantirɗi ɗiin e jawe maggal de o ommbiri ngal ommboode.

²¹ Ndeen o nanni ngal ley hukum, o haɓɓi ridoo cuuɗoowo ngal oon de uddi ngal hono no Joomiraaɗo yamiri mo noon.

²² O nanni taabawal ngaal ley Hukum Ceniiɗo toon, o njoƴƴini ngal faro soɓɓirre yaasin wudere ndeen.

²³ O deki buuru dow maggal, yeeso Joomiraaɗo, fodde no Joomiraaɗo yamirnoo o noon.

²⁴ O nanni joƴƴinirde fitillaaji ndeen du ley Hukum Ceniiɗo, o njoƴƴini ɗum faro horɗoore na hucciti e taabawal ngaal.

²⁵ O huɓɓi fitillaaji ɗiin yeeso Joomiraaɗo, fodde no Joomiraaɗo yamirnoo o noon.

²⁶ O nanni wulirde ure waɗiraande kaŋŋe ndeen ley Hukum Ceniiɗo oon de o njoƴƴini ɗum yeeso ridoo toon.

²⁷ O wuli ure dow mayre, hono no Joomiraaɗo yamirnoo o noon.

²⁸ O haɓɓi ridoo naarude hukum oon.

²⁹ O njoƴƴini sakkirde sadakaaji buleteeɗi ndeen naarude galle Hukum Ceniiɗo oon de o sakki kirsamaari mbuleteendi e gawri dow mayre fodde no Joomiraaɗo yamirnoo o noon.

³⁰ O joƴƴini Taasawal manngal lootorgal ngaal hakkunde sakkirde ndeen e Hukum Ceniiɗo oon. O watti ndiyam e maggal.

³¹ Wo ndiyam maggal Muusaa e Haaruuna e ɓiɓɓe muuɗum lootirta juuɗe muɓɓen e koyɗe muɓɓen

³² nde naatata hukum oon naa nde ɓattotoo sakkirde ndeen fuu. Iɓe lootoo fodde no Joomiraaɗo yamiri Muusaa noon.

³³ O darni gude o hurri taliyaare fiiliinde suudu seniindu nduun e sakkirde ndeen de o watti wudere uddirde narrude toon. Noon Muusaa timminiri gollal ngaal fuu.

No teddeengal Joomiraaɗo heewiri hukum oon

³⁴ Ndeen ruulde suddi Hukum Ceniiɗo oon de teddeengal Joomiraaɗo du heewi nokkuure ndeen fuu.

³⁵ Muusaa waawaay naatude ley hukum oon sabo ruulde ndeen na heddii dow suudu nduun wooɗi teddeengal Joomiraaɗo na heewii ley hukum Ceniiɗo oon.

³⁶ Nde ruulde ndeen ɓantii dow hukum oon fuu Israa'iila'en ndillan to koɗi fuu.

³⁷ Ammaa si ruulde ndeen toowtaay fu, ɓe ndillataa, faa nyannde nde ɓantowii.

³⁸ Ruulde ndeen ina woni dow hukum oon nyalooma fuu. Jemma du wo yiite woni dow muuɗum. Israa'iila'en fuu na nji'a ɗum ley jahaale muɓɓen to koɗi fuu.