Wurtagol 4 - Dewtere Laamɗo Fulfulde Burkina Faso

No Laamɗo hokkiri Muusaa baawɗe waɗude maandeeji kaayniiɗi

¹ Muusaa jaabii Joomiraaɗo, wi'i: — Ndaar, ɓe njaɓataa haala am, ɓe kettindantaako kam. Ɓe mbi'an kam: Joomiraaɗo ɓanganaay ma fey?

² Joomiraaɗo ƴami mo: — Ɗume njogiɗaa e junngo maaɗa? Muusaa jaabii, wi'i: — Sawru njogiimi.

³ Joomiraaɗo wi'i: — Faɗɗu ndu e leydi. O faɗɗi ndu e leydi, ndu laatii mboddi. Muusaa garbitii.

⁴ Ndeen Joomiraaɗo wi'i mo: — Foortu junngo maa nanngaa lacol mayri. Muusaa foorti junngo muuɗum nanngi ndi, ndi laatii sawru e junngo muuɗum.

⁵ Joomiraaɗo wi'i: — Ɗum wo faa ɓe ngoonɗina, ɓe njaɓa wo miin Joomiraaɗo, Laamɗo maamiraaɓe maɓɓe Ibrahiima e Isiyaaka e Yaakuuba ɓangani ma.

⁶ Ndeen Joomiraaɗo wi'i: — Wattu junngo maa ley saayo maa, ndekaa ngo dow ɓernde maaɗa. O watti ngo ley toon. Nde o wurtinnoo ngo fu, o tawi ngo seppinii, ingo rawni far.

⁷ Joomiraaɗo wi'i mo: — Yeccin ngo. Muusaa yeccini ngo. Nde o wurtinnoo ngo fu, o tawi ngo wartii no ngo worrunoo.

⁸ Joomiraaɗo wi'i mo: — Si ɓe koolaaki ma, ɓe njaɓaay maande arandeere ndeen du, ɓe njaɓan ɗiɗaɓerde ndeen kaa.

⁹ Ammaa si ɓe koolaaki maandeeji ɗiɗi ɗiin, ɓe kettindanaaki ma fu, ittaa ndiyam seeɗa ley maayo Nil, ndufaa ɗam dow leydi njoorndi. Ndiyam ɗam ittuɗaa e maayo de ndufuɗaa dow leydi ɗaam laatoto ƴiiƴam.

¹⁰ Muusaa wi'i Joomiraaɗo: — Yaa, Joomiraaɗo! Mi wanaa baawɗo haala. Abada miin maccuɗo maa, mi waawaay haalude, wanaa keeŋan, wanaa hecci keeŋan faa warde hannden ɗo kaaldataa kam ɗoo. Miin wo mi tedduɗo ɗemngal, mo haala tiiɗi.

¹¹ Joomiraaɗo wi'i mo: — Moy hokki tagaaɗo hunnduko? Moy waawi muumɗinde naa faaɗinde ɓii-Aadama? Moy du waawi yiinude naa moy waawi wumnude neɗɗo? Wanaa wo miin Joomiraaɗo naa?

¹² Ndelle yahu. Miin miɗo wondi e hunnduko maaɗa. Mi tindinte ko kaalataa fuu.

¹³ Ndeen Muusaa wi'i: — Yaafam Joomiraaɗo, nelu goɗɗo feereejo mo muuyɗaa.

¹⁴ Ndeen Joomiraaɗo ɓernani Muusaa, wi'i: — Wanaa sakiike maa Haaruuna Lewinke oon na ɗoon naa? Miɗo anndi imo waawi haala. Inani imo wara faa o hawra e maaɗa. Nde o yi'i ma fu, ɓernde makko seyoto.

¹⁵ Kaalanaa mo haalaaji ɗi o jeyi haalude fuu. Miin miɗo wondi e hunnduko maa e hunnduko makko du. Mi tinndinan on ko njeyɗon waɗude.

¹⁶ Katin du wo kanko haalata lunnde maaɗa yeeso yimɓe ɓeen. O laatoto hunnduko maaɗa. Aan du, a daranto mo hono Alla kaaldoowo e makko.

¹⁷ Njogoɗaa sawru ndu e junngo maaɗa, ngaɗiraa ndu kujje kaayniiɗe.

No Muusaa soƴƴorii leydi Misira

¹⁸ Caggal ɗuum Muusaa yeccii to esum Yetiro, wi'i ɗum: — Miɗo ŋaare, accaa mi hoota to yimɓe am ley leydi Misira, mi ndaara yalla faa joonin iɓe mbuuri naa. Yetiro wi'i: — Yahu e jam.

¹⁹ Joomiraaɗo ɓeydi haaldude e Muusaa ley Madiyan toon, wi'i ɗum: — Yecca leydi Misira, sabo yimɓe filotonooɓe warde ma ɓeen fuu maayii.

²⁰ Muusaa hooƴi deekum e ɓiɓɓe muuɗum worɓe waɗɗini ɗum'en araaji de yeccii leydi Misira. Imo tiigii sawru Laamɗo nduun e junngo makko.

²¹ Joomiraaɗo wi'i Muusaa katin: — Si a yeccake leydi Misira fu, ngaɗaa maandeeji kaayniiɗi ɗi ngattumi e junngo maa ɗiin fuu yeeso Fira'awna. Ammaa mi yoornan ɓernde makko faa o saloo yoppude yimɓe ɓeen ndilla.

²² Mbi'aa Fira'awna: «Inan ko Joomiraaɗo wi'i: Israa'iila kam woni ɓiyam afo.

²³ Miɗo wi'e njoppaa ɓiyam oon yaha ɗowtanowoo kam. Ammaa si a salake yoppude mo o yaha fu, mi waran afo maaɗa gorko.»

²⁴ Ley jahaangal maɓɓe ngaal, ɓe koɗi nokku gomma. Ley nokku ɗo ɓe koɗi ɗoon, Joomiraaɗo ɓattitii Muusaa, filii warude ɗum.

²⁵ Sifoora hooƴi hayre welnde hono laɓi nii, haddi ɓiyum. O hooƴi nguru ngu o taƴi nguun o faɗɗi e koyɗe Muusaa de o wi'i: — Na a laatanii kam goriiwo mo ƴiiƴam.

²⁶ Ndeen Joomiraaɗo yoppi Muusaa. Wo saabe taadagol ngool waɗi debbo oon wi'i: «Wo a goriiwo mo ƴiiƴam.»

²⁷ Joomiraaɗo wi'i Haaruuna: — Yahu ley ladde yoornde, kawrowaa e Muusaa. Haaruuna yehi hawrowi e Muusaa waamnde Laamɗo, mumilii ɗum.

²⁸ Muusaa haalani Haaruuna haalaaji ɗi Joomiraaɗo hokki ɗum fuu e kabaaru maandeeji kaayniiɗi ɗi Joomiraaɗo yamiri ɗum waɗa ɗiin.

²⁹ Ndeen Muusaa e Haaruuna njehi noddowi mawɓe Israa'iila fuu kawrondini ɗum'en.

³⁰ Haaruuna haalani ɓe haalaaji ɗi Joomiraaɗo wi'i Muusaa fuu. Muusaa du waɗi maandeeji kaayniiɗi ɗiin yeeso yimɓe ɓeen.

³¹ Yimɓe ɓeen njaɓi, koolii. Ɓe paami Joomiraaɗo na hakkilana ɓe kamɓe yimɓe Israa'iila wooɗi du, yi'ii du torraaji maɓɓe. Ndeen ɓe fuu ɓe ndikkinii, ɓe cujidi.