Wurtagol 38 - Dewtere Laamɗo Fulfulde Burkina Faso

No sakkirde waɗiraa

¹ Besalel oon waɗi sakkirde sadakaaji buleteeɗi. O waɗiri nde e leɗɗe ngawdi. Njuuteefi mayre e njaajeefi mayre fuu wo piyanɗe joy joy. Tooweefi mayre wo piyanɗe tati.

² O waɗi alhaali luwe nay, o seŋi e coɓɓuli mayre, soɓɓundu fuu luwal gootal. O mooytiri nde njamndi mboɗeeri.

³ O waɗi gollitirɗe mayre fuu, ɗuum woni taasaaje e pelliiji e taasahoy mbiccirkoy ƴiiƴam e juwirɗe teewu e ɓoɓtirɗe ndoondi. Gollitirɗe ɗeen fuu, ngaɗiraa njamndi mboɗeeri.

⁴ O sanyi giriyaasi njamndi mboɗeeri o fiili sakkirde ndeen, gilla ley faa yottii hakkunde tooweefi mayre.

⁵ O siiwi njamndi mboɗeeri, o waɗi jawe nay de o seŋi e coɓɓuli giriyaasi oon nay ɗiin faa ɗe corniree cabbi ƴeɓtirɗi ɗiin.

⁶ O waɗiri cabbi ɗiin e leɗɗe ngawdi de o mooytiri ɗi njamndi mboɗeeri.

⁷ O soorni ɗi nder jawe gonɗe e coɓɓuli sakkirde ɗeen faa nde ƴeptiree. O waɗi sakkirde ndeen luggunde. O waɗiri nde leɗɗe ceelaaɗe.

No taasawal manngal waɗiraa

⁸ O waɗiri taasawal manngal e njamndi mboɗeeri. O waɗiri joƴƴinirɗe maggal du njamndi mboɗeeri e danndorɗe rewɓe gollannooɓe dammbugal Hukum Ceniiɗo.

No kokuwol taliyaare waɗiraa.

⁹ O huuriri taliyaare ndeen gude canyiraaɗe leppi ɗaatuɗi. Njuuteefi majje wo piyanɗe 100 faro horɗoore taliyaare ndeen.

¹⁰ Ɗe tiigoraa darnirɗe 20 e joƴƴinirɗe muɓɓen 20 gaɗiraaɗe njamndi mboɗeeri. Ko gude ɗeen tiigortee e ko kaɓɓirtee fuu wo cardi waɗiraa.

¹¹ Faro soɓɓirre taliyaare ndeen du, njuuteefi gude ɗeen wo piyanɗe 100, e darnirɗe 20 e joƴƴinirɗe muɓɓen 20 gaɗiraaɗe njamndi mboɗeeri. Ko ɗe tiigortee e ko ɗe kaɓɓirtee fuu wo cardi ngaɗiraa.

¹² Faro gorgal taliyaare ndeen du, njuuteefi gude ɗeen wo piyanɗe 50, e darnirɗe 10 e joƴƴinirɗe muɓɓen 10. Ko ɗe tiigortee e ko ɗe kaɓɓirtee fuu wo cardi ngaɗiraa.

¹³ Faro lettugal, njuuteefi gude ɗeen wo piyanɗe 50.

¹⁴ Njuuteefi gude gattaaɗe senngo wooto wo piyanɗe 15 e darnirɗe muɓɓen tati e joƴƴinirɗe muɓɓen tati.

¹⁵ Wo noon du waɗiraa dammbugal ɗiɗaɓal ngaal, njuuteefi majje wo piyanɗe 15 e darnirɗe muɓɓen tati e joƴƴinirɗe muɓɓen tati.

¹⁶ Gude piiliiɗe kokuwol ɗeen fuu wo leppi ɗaatuɗi canyiraa.

¹⁷ Joƴƴinirɗe darnirɗe ɗeen wo njamndi mboɗeeri ngaɗiraa. Ngadirkoy kooy e kaɓɓirkoy kooy du wo cardi ngaɗiraa. Ko'e darnirɗe ɗeen fuu mooytiraa cardi de ɗe fuu ɗe ndobondiriraa ngadirkoy ciiwiraakoy cardi.

¹⁸ Ridoo uddirɗo dammbugal taliyaare ndeen du wo gaaraaji bulabulaaji e bojjitooji e boɗeeji coy e leppi ɗaatuɗi sanyiraa, ɗum fuu ɗum golliraa nyeenyal. Njuuteefi mayre wo piyanɗe 20, njaajeefi mayre du piyanɗe joy, hono gude kokuwol ɗeen noon.

¹⁹ Inde woodi darnirɗe nay e joƴƴinirɗe njamndi mboɗeeri nay. Tiigorkoy majje e kaɓɓirkoy majje fuu wo cardi ngaɗiraa de ko'e darnirɗe ɗeen mooytaa cardi.

²⁰ Tonteeje hukum oon e ɗe kokuwol ngool fuu njamndi mboɗeeri ngaɗiraa.

Haala njamndi gollitoraandi Hukum Ceniiɗo

²¹ Inan limgal jamɗe golliraaɗe nyimngo Hukum Ceniiɗo, ɗum woni Hukum Seedaaku oon, fodde no Muusaa yamiri Lewinkooɓe ngaɗira: Itamar ɓii almaami Haaruuna woni ardiiɗo gollal ngaal.

²² Besalel ɓii Uri, Uri ɓii Huur, mo lenyol Yahuuda, kam tafi huunde fuu ko Joomiraaɗo yamiri Muusaa.

²³ Oholiyab ɓii Ahisamak mo lenyol Dan du wallii mo. Wo baawɗo sehude iri huunde fuu e nyootude leppi bulabulaaji e bojjitooji e boɗeeji coy e leppi ɗaatuɗi.

²⁴ Kaŋŋe mo yimɓe kokkiri yardaamuye faa golliree ley suudu seniindu oon waɗii kilooji 877 e garamuuji 300 fodde etirgal suudu seniindu.

²⁵ Cardi njaɓaandi to yimɓe ɓeen ndiin waɗii kilooji ujunaaje tati e kilooje sappo e jeɗɗi (3.017) e garamuuji 750 fodde etirgal suudu seniindu.

²⁶ Worɓe hewtuɓe duuɓi 20 yaade yeeso limaa. Limaaɗo fuu hokki garamuuji joy ɗum wo feccere mbuuɗu cardi fodde etirgal suudu seniindu. Limaaɓe ɓeen ngaɗi yimɓe ujunaaje keme jeegom e tati e keme njoyo e capanɗe njoyo (603.550).

²⁷ Kilooji cardi ujunaaje tati (3.000) ɗiin ngaɗiraa koyɗe 100 saabe darorɗe hukum Ceniiɗo oon e ridoo cennduɗo Nokkuure Ɓurnde fuu Senaade ndeen. Koyngal gootal fuu waɗiraa kilooji 30.

²⁸ Kilooji 17 e garamuuji 750 cardi ɗiin ngolliraa tiigorkoy darnirɗe ɗeen e mooytugol ko'e majje e waɗugol kaɓɓirkoy majje.

²⁹ Njamndi mboɗeeri ndi lenyol ngool waddi ndiin waɗii kilooji ujunaaje ɗiɗi e hemre e noogay e nay (2.124).

³⁰ Wo kayri joƴƴinirɗe dammbugaaje Hukum Ceniiɗo oon ngaɗiraa, tawti sakkirde nde njamndi mboɗeeri, e alhaali giriyaasi e gollitirɗe mayre fuu.

³¹ Wo kayri du waɗiraa joƴƴinirɗe darnirɗe kokuwol taliyaare ɗeen e joƴƴinirɗe dammbugaaje maggol, tawti tontirɗe hukum oon e tontirɗe kokuwol taliyaare ndeen fuu.