Wurtagol 34 - Dewtere Laamɗo Fulfulde Burkina Faso

Haala alluuje kaaƴe ɗiɗaɓe

¹ Joomiraaɗo wi'i Muusaa: — Sehu alluuje kaaƴe ɗiɗi hono ɗe arane ɗeen faa mi winnda dow majje jamirooje ɗe mbinndunoomi dow arane ɗe kelunoɗaa ɗeen.

² Cegiloɗaa ndawaa gilla subaka, ƴeenyaa waamnde Sinayi. Ngaraa ndaroɗaa yeeso am dow seɓtoodu mayre.

³ Taa fay gooto jokke, taa goɗɗo fuu yi'ee dow waamnde ndeen. Taa fay huunde famarde naa mawnde tawee naa ndura ɗakkol mayre.

⁴ Muusaa sehi alluuje kaaƴe ɗiɗi hono arane ɗeen. O dawidi e majje, imo tiigii ɗe e juuɗe makko. O ƴeenyi waamnde Sinayi ndeen hono no Joomiraaɗo yamiri mo noon.

⁵ Joomiraaɗo jippodii e ruulde, darii ɗakkol makko, inndi innde muuɗum, wi'i «Joomiraaɗo.»

⁶ Joomiraaɗo faltii yeeso Muusaa na wi'a: — Miin woni Joomiraaɗo, Joomiraaɗo, Laamɗo mo yurmeende e moƴƴere, jom munyal, keewɗo hinney, jom hoolnaare nde timmataa,

⁷ kolloowo hinney muuɗum koolniiɗo faa yottoo taaniraaɓe taaniraaɓe, jaafotooɗo hakkeeji e lutti. Wo mi kiititooɗo gooduɗo hakkeeji fuu. Wo mi kiitotooɗo ɓiɓɓe saabe hakke baabiraaɓe muɓɓen faa yottoo e taaniraaɓe e taaniraaɓe taaniraaɓe.

⁸ Wakkati oon Muusaa harii, hippii e leydi, sujidi.

⁹ O wi'i: — Yaa Joomiraaɗo, miɗo ŋaare si mi keɓuɗo moƴƴere yeeso maaɗa, njaada e amin. Goonga, yimɓe ɓee wo sattuɓe, yoorɓe ko'e. Njaafoɗaa lutti amin e hakkeeji amin, de ngaɗaa min laatoo jeyal maaɗa.

¹⁰ Joomiraaɗo jaabii wi'i: — Miin e hoore am mi waɗan amaana. Mi waɗan yeeso yimɓe ɓeen kujje kaayniiɗe ɗe ngaɗaynoo abada ley adunaaru, ko waɗaayno yeeso lenyol fay gootol du. Lenyi piiliiɗi ma ɗiin fuu nji'an baawɗe Joomiraaɗo, ɓe nji'an ko ngaɗananmaami ɗuum no hulɓinorii.

¹¹ Kakkilaa e ko njamiranmaami hannden ɗuum. Mi riiwan Amorinkooɓe e Kanaaninkooɓe e Hittiyankooɓe e Perisinkooɓe e Hewinkooɓe e Yebusinkooɓe yeeso maaɗa.

¹² Kakkilaa, taa ngaɗidaa amaana e jooɗiiɓe ley leydi ndi naatoton ndiin, taa ɗum laatanoo on fergorde.

¹³ Ndelle sanaa kalkon cakkirɗe maɓɓe ɗeen. Kelon bimmbeeje tooruuji maɓɓe de coppon leɗɗe maɓɓe darnaaɗe ɗe tooru Asera ɗeen.

¹⁴ Taa cujidanon alla goɗɗo sabo innde makko wo Joomiraaɗo «Keewɗo Kiram». Joomiraaɗo wo Laamɗo kiroowo.

¹⁵ Kakkilaa taa ngaɗidaa amaana e jooɗiiɓe ley leydi ndiin sabo nyannde ɓe ngaɗanta allaaji maɓɓe iidi lallere e sakkande ɗi fu, ɓe mbaantete de nyaamaa ko ɓe cakki ɗuum,

¹⁶ Ndeen ɓaŋanaa ɓiɓɓe maaɗa worɓe ɓiɓɓe maɓɓe rewɓe, de ɓeen ekintina ɓiɓɓe maaɗa lallere sabo ɓe ngattan ɗum'en e waɗude iidi sakkande allaaji maɓɓe.

¹⁷ Taa ngaɗanaa hoore maaɗa allaaji njamndi ciiwaandi.

¹⁸ Ngaɗaa iidi Buuru mo Jillaaka Rabilla. Nyaamron buuru oon balɗe jeɗɗi hono no njamirmi on noon. Ngaɗon iidi oon ley lewru Abib, sabo wo ley mayru mburtiɗon leydi Misira.

¹⁹ Artiiɗo rimeede fuu, wo miin jeyi. Hono noon ɗum laatortoo e awruuji na'i e dammucce mooɗon fuu.

²⁰ Awru araawa fuu, rimɗiniree jawgel naa damngel. Si a rimɗinaay nga fu, sey kelaa daande magga. Awruuɓe ɓiɓɓe maaɗa fuu, ndimɗinaa ɗum'en. Taa fay gooto wara yeeso am junngo ɓolo.

²¹ Ngolliron balɗe jeegom ammaa nyalaande jeɗɗaɓerde ndeen, tilay powton. Fay si wo wakkati ndemri naa tayri, na tilsi powton.

²² Ngaɗon Iidi Jeɗɗiije mo ngaɗoton wakkati tayri alkamaari artundi ɓenndi ndiin. Ngaɗon du iidi tayri timmoode hitaande.

²³ Ley hitaande fuu worɓe mooɗon fuu ngara yeeso Laamɗo Joomiraaɗo, Laamɗo Israa'iila kile tati.

²⁴ Mi riiwan lenyi yeeso mooɗon faa mi yaajina leydi mooɗon. Wakkati njahoyton faa ndu'ooɗon yeeso Laamɗo Joomiraaɗo kile tati ley hitaande ndeen, fay gooto muuyataa teetude leydi mooɗon.

²⁵ Nde kirsantaa kam kirsamaaji fu, taa kawrondinaa e buuru jillaaɗo rabilla. Kirsamaari maaɗa saabe sadaka iidi Faltagol ndiin jeyaa heddaade waalta.

²⁶ Ngaddaa ko ɓuri wooɗude ley ko artii ɓenndude e ngesa maaɗa ley suudu Joomiraaɗo, Laamɗo maaɗa. Taa njongaa teewu ɓinngel mbeewa nder kosam inna muuɗum.

²⁷ Joomiraaɗo wi'i Muusaa: — Mbinndaa haalaaji ɗii, sabo wo e majji ngaɗammi amaana hakkunde am e maaɗa e Israa'iila.

²⁸ Muusaa heddodii e Joomiraaɗo ɗoon jemma e nyalooma faa waɗi balɗe 40. O nyaamaay, o yaraay. O winndi haalaaji amaana ɗiin dow alluuje, ɗiin ngoni jamirooje sappo ɗeen.

Yeccagol Muusaa ley hoɗorde

²⁹ Nde Muusaa jippinoo waamnde Sinayi na jogii alluuje jamirooje sappo ɗeen, yeeso muuɗum na ɗelka sabo o haaldii e Joomiraaɗo, ammaa o faamaayno ɗelkugol yeeso makko ngool.

³⁰ Haaruuna e Israa'iila'en ndaari Muusaa. Yeeso muuɗum ina ɗelka de ɓe kuli ɓattaade ɗum.

³¹ Ndeen Muusaa noddi ɓe de Haaruuna e ardiiɓe lenyol ɓeen ngari to makko. O haaldi e maɓɓe.

³² Caggal ɗuum Israa'iila'en fuu ɓattii de o haalani ɗum'en jamirooje ɗe Joomiraaɗo hokki mo dow waamnde Sinayi ɗeen fuu.

³³ Nde Muusaa timminnoo haaldude e maɓɓe fu, suddi yeeso muuɗum lefol.

³⁴ Ammaa wakkati o naatannoo ley hukum Joomiraaɗo faa o haalda e muuɗum faa nde o wurtii fu, o sudditoto lefol ngool. Nde o wurtii fu, imo haalana Israa'iila'en ko o yamiraa ɗuum.

³⁵ Israa'iila'en na ndaara yeeso makko ina nji'a no ngo ɗelkirta. Ndeen o suddira ngo lefol katin, faa nde o naatoyta faa o haalda e Joomiraaɗo katin.