Wurtagol 32 - Dewtere Laamɗo Fulfulde Burkina Faso

Haala ga'el kaŋŋe

¹ Israa'iila'en yi'i Muusaa ɓooyii dow waamnde toon. Ndeen ɓe kawriti to Haaruuna, ɓe mbi'i ɗum: — Umma, ngaɗanaa en tooruuji ardotooɓe en sabo Muusaa, gorko burtinɗo en leydi Misira oon kaa, en anndaa ko hewtii ɗum.

² Haaruuna jaabii ɓe wi'i: — Ittee, kootone kaŋŋe gonɗe e noppi rewɓe mon e ɓiɓɓe mon worɓe e rewɓe de ngaddanon kam.

³ Yimɓe ɓeen fuu itti kootone noppi muɓɓen njaari to Haaruuna.

⁴ O jaɓi kaŋŋe oon e juuɗe maɓɓe, o siiwi o tafi tooru ndu alhaali ga'el. Ndeen ɓe mbi'i: — Israa'iila, inan allaaji maaɗa, burtinɗi ma leydi Misira!

⁵ Nde Haaruuna yi'unoo ɗum ndeen, darni kaaƴe, waɗi sakkirde yeeso maggel. O wi'i: — Jaango en ngaɗan iidi teddinen Joomiraaɗo.

⁶ Jaangoore majjum ɓe ummii gilla subaka, ɓe cakki sadakaaji buleteeɗi, ɓe ngaddi sadakaaji dewral. Ɓe njooɗi ɓe nyaami, ɓe njari de ɓe ummii ɓe ngaɗi fijo.

⁷ Joomiraaɗo haaldi e Muusaa wi'i: — Njippoɗaa law, sabo yimɓe maaɗa ɓe mburtinoyɗaa leydi Misira ɓeen kalkii ko'e muɓɓen.

⁸ Ɓe njoppii laawol am law, ɓe njokkaay ko njamirmi ɓe. Ɓe ngaɗanii ko'e maɓɓe tooru ndu alhaali ga'el, ɓe kippake yeeso maggel, ɓe cakkanii ngel sadakaaji, iɓe mbi'a: «Israa'iila, inan allaaji maaɗa, burtinɗi ma leydi Misira!»

⁹ Joomiraaɗo wi'i Muusaa: — Mi yi'i yimɓe ɓe. Si goonga wo ɓe sattuɓe, yoorɓe ko'e.

¹⁰ Ndelle, joonin kaa accaa kam sabo mi tikkanii ɓe sanne. Tikkere am ndeen wulan dow maɓɓe, de mi halka ɓe. Ammaa aan kaa, mi waɗete lenyol manngol.

¹¹ Muusaa ŋaarii Joomiraaɗo, Laamɗo muuɗum, wi'i: — Yaa Joomiraaɗo, saabe ɗume tikkere maaɗa ummanii yimɓe maaɗa de wo aan wurtiniri ɗum'en leydi Misira e semmbe maaɗa e manngu maaɗa?

¹² Ko saabii de accaa Misirankooɓe keɓa mbi'a: «Wo saabe bonde de mburtinɗaa ɓe faa mbaraa ɓe hakkunde baamle, piɗɗaa ɓe e adunaaru?» Yaa Joomiraaɗo, feewnu ɓernde maaɗa, taa halkir yimɓe maaɗa tikkere!

¹³ Miccita Ibrahiima e Isiyaaka e Israa'iila maccuɓe maaɗa ɓe kunaniɗaa e innde maaɗa de mbiiɗaa a waɗan lenyol muɓɓen ɗuuɗa hono koode kammu. Ciwtoraa a wi'ii a hokkan lenyol maɓɓe leydi ndiin fuu, ndi laatoo ndongu maɓɓe faa abada.

¹⁴ Ndeen Joomiraaɗo wayliti anniya bone mo wi'unoo waɗan yimɓe ɓeen.

¹⁵ Muusaa jippii waamnde ndeen, na jogii alluuje amaana ɗiɗi binndaaɗe gaɗa e yeeso fuu ɗeen e juuɗe muuɗum.

¹⁶ Alluuje ɗeen wo Laamɗo e hoore muuɗum sehi ɗe, wo binndi junngo muuɗum ngoni dow majje.

¹⁷ Yoosuwa nani olko kelle e ilinaali yimɓe ɓeen de wi'i Muusaa: — Olko konu ley hoɗorde!

¹⁸ Ammaa Muusaa jaabii o, wi'i: — Ɗum wanaa jimi jaalorgal, naa du bullaali jaalteede. Ko nanammi ɗuum wo jimi weltaare tan.

¹⁹ Nde Muusaa ɓattitinoo hoɗorde ndeen fu, yi'i ga'el ngeel e bami. Ɓernde makko ja'awi sanne, o faɗɗiri alluuje ɗe o tiiginoo ɗeen juuɗe makko ɗiɗi, o fusi ɗe ley waamnde ndeen.

²⁰ O hooƴi ga'el ngel ɓe ngaɗi ngeel, o faɗɗi ɗum ley yiite, o niisi ɗum, de o sankiti conndi muuɗum nder ndiyam de o waɗi Israa'iila'en ɓeen njari ɗam.

²¹ Muusaa wi'i Haaruuna: — Ɗume yimɓe ɓe ngaɗi ma de ngaddanɗaa ɓe hakke ponɗo nii?

²² Haaruuna jaabii, wi'i: — Taa jooman tikkanam sabo aan e hoore maaɗa aɗa anndi no yimɓe ɓee njiɗiri waɗude ko boni.

²³ Ɓe mbi'u kam: «Waɗan en allaaji ardotooɗi en, sabo Muusaa burtinɗo en e leydi Misira oon kaa en anndaa ɗume hewtii ɗum.»

²⁴ Ndeen mbiimi ɓe: «Moy tawraa kaŋŋe?» Ndeen ɓe itti kootone maɓɓe kaŋŋe ɓe ngaddi ɓe kokki kam. Miin du paɗɗumi ɗe e yiite de ga'el ngel wurtii!

²⁵ Muusaa tawi yimɓe ɓeen laalake, sabo Haaruuna accii ɓe laatake laaliiɓe de wayɓe maɓɓe keɓa ko njalnoroo ɓe.

²⁶ Ndelle o darii dammbugal hoɗorde ndeen, o ƴepti daande makko, o wi'i: — Jokkuɓe Joomiraaɗo fuu, ngara to am! Yimɓe lenyol Lewi fuu kawriti to makko.

²⁷ O wi'i ɓe: — Inan ko Joomiraaɗo, Laamɗo Israa'iila wi'i: «Mono e mooɗon fuu tiigoo kaafaahi, puɗɗiron dammbugal ngal faa yaade ngal too, mbaron sakiraaɓe mooɗon e yigiraaɓe mooɗon e ɓattiiɓe mooɗon.»

²⁸ Lewinkooɓe ɓeen ngaɗi no o yamiri ɗum'en noon. Nyalaande ndeen worɓe ujunaaje tato (3.000) mbaraa.

²⁹ Muusaa wi'i Lewinkooɓe ɓeen: — Hannden on laatake senaniiɓe gollande Joomiraaɗo, on mbarii fay ɓiɓɓe mon e sakiraaɓe mooɗon faa keɓon barke hannden.

³⁰ Jaangoore majjum, Muusaa wi'i yimɓe ɓeen fuu: — On ngaɗii hakke mawɗo. Ammaa joonin mi soƴƴoto dow waamnde toon, mi ŋaaroo Joomiraaɗo. Na hasii o jaɓan, o itta hakke mooɗon.

³¹ Muusaa soƴƴii to Joomiraaɗo, wi'i ɗum: — Kaari! Yimɓe ɓe ngaɗii hakke mawɗo. Ɓe ngaɗiranii ko'e maɓɓe alla e kaŋŋe.

³² Ammaa joonin, sawra, yaafa hakke maɓɓe. Si wanaa noon fu, miɗo ŋaare, ittaa innde am ley dewtere maaɗa nde mbinnduɗaa ndeen.

³³ Joomiraaɗo wi'i Muusaa: — Wo gaɗuɗo hakke tan ittammi ley dewtere am.

³⁴ Wooɗi, joonin yahu ardoɗaaa yimɓe ɓeen yaade nokkuure nde kaalannomaami haala muuɗum ndeen. Wo maleyka am ardete. E noon fuu, si nyalaande jukkude ɓe warii fu, sikke walaa mi jukkoto ɓe saabe hakke maɓɓe.

³⁵ Joomiraaɗo fiiri yimɓe ɓeen nyawu ndaaɓoowu saabe ngaɗii ngaari. Ɗum woni ndi Haaruuna waɗi ndiin.