Wurtagol 31 - Dewtere Laamɗo Fulfulde Burkina Faso

Besalel e Oholiyab gollooɓe

¹ Joomiraaɗo haaldi e Muusaa wi'i:

² — Ndaar, mi suɓake Besalel ɓii Uri, Uri ɓii Huur, mo lenyol Yahuuda.

³ Mi hebbinii ɗum ruuhu Laamɗo faa heɓa hakkillo e paamal e anndal e caral e waɗude golleeji feere feere.

⁴ O waɗiran kujje lobbe e kaŋŋe e cardi e njamndi mboɗeeri.

⁵ O nyeenyan kaaƴe dime nyaaynirteeɗe. O sehiran leɗɗe nyeenyal o waɗira iri golle fuu.

⁶ Katin mi hokkii mo balloowo, ɗum woni Oholiyab ɓii Ahisamak mo lenyol Dan. Mi hokkii waawuɓe waɗude iri gollal ngaal fuu anndal faa ngaɗa ko njamirmaami ɗuum fuu.

⁷ Golle ɗeen wo Hukum Ceniiɗo e Keesuwal Amaana e ommboode muuɗum e gollitirɗe muuɗum fuu,

⁸ e taabawal e gollitirɗe muuɗum, e joƴƴinirde fitillaaji waɗiraande kaŋŋe dimo e gollitirɗe muuɗum e wulirde ure ndeen.

⁹ Tawti sakkirde sadakaaji buleteeɗi e gollitirɗe muuɗum, e taasawal manngal ngaal e joƴƴinirde muuɗum

¹⁰ e kolte nyootiraaɗe nyeenyal ceniiɗe ɗe almaami Haaruuna e ɓiɓɓe muuɗum ɓornotoo saabe gollal almaamaaku ɗeen

¹¹ e nebbam seningol e ure buleteeɗe ley nokkuure seniinde ɗeen. Ɓe ngaɗa huunde fuu hono no njamirmaami noon.

Haala nyalaande fowteteende

¹² Joomiraaɗo haaldi e Muusaa wi'i:

¹³ — Kaaldaa e Israa'iila'en mbi'aa ɗum'en: «Na tilsi kaybanon Nyalaaɗe powteteeɗe ɗe kokkumi ɗeen. Ɗuum laatoo maande hakkunde am e mooɗon ley jamaanuuji fuu. Ɗum miccintinan on ko miin Joomiraaɗo woni seninɗo on.

¹⁴ Kaybanon nyalaande ndeen, sabo wo nde seniinde saabe mooɗon. Mbonkiiɗo nde de golli nyalaande ndeen fuu wo itteteeɗo e lenyol de waree.

¹⁵ Nyalaaɗe jeegom ngaɗirton golleeji mooɗon, ammaa nyalaande jeɗɗaɓerde ndeen wo nyalaande fowteteende seniinde yeeso Joomiraaɗo. On ngollataa faa'e. Nde seniinde saabe am. Golluɗo nyaande ndeen fuu wo bareteeɗo.

¹⁶ Israa'iila'en ndeena nyalaande fowteteende ndeen, nde laatanoo ɓe nyalaande seniinde ley jamaanuuji fuu faa abada.

¹⁷ Wo nde maande hakkunde am e Israa'iila'en faa abada. Sabo ley nyalaaɗe jeegom Joomiraaɗo tagiri kammu e leydi, de nyalaande jeɗɗaɓerde ndeen fowtinii.»

¹⁸ Nde Joomiraaɗo tilinoo haaldude e Muusaa dow waamnde Sinayi ndeen, hokki ɗum alluuje kaaƴe ɗiɗi miccintinooje amaana ɗe Laamɗo e hoorem winndiri honndu muuɗum.