Wurtagol 3 - Dewtere Laamɗo Fulfulde Burkina Faso

No Laamɗo noddiri Muusaa

¹ Muusaa na durannoo dammuuli esum Yetiro almaami Madiyan (noddirteeɗo Rewel oon). Nyannde gomma o yaari dammuuli ɗiin faa yeeso ladde yoornde faro gorgal. O yottii waamnde Sinayi inndirteende waamnde Laamɗo ndeen.

² Maleyka Joomiraaɗo ɓangani mo ley lewngol yiite hakkunde wuumoore. O haynii, o yi'i inan wuumoore ina huɓɓa ammaa yiite ngeen nyaamata nde.

³ Muusaa wi'itii: — Mi ɓattitoto mi ndaara huunde haayniinde ndee, ko waɗi yiite ngee nyaamataa wuumoore ndee.

⁴ Nde Laamɗo Joomiraaɗo yi'unoo o ooncake faa o ndaara fu, noddi mo ley wuumoore ndeen, wi'i: — Muusaa! Muusaa! O jaabii, o wi'i: Inani kam.

⁵ Ndeen Laamɗo wi'i: — Taa ɓattita ɗoo. Ɓorta paɗe maaɗa sabo nokkuure ɗo ndariɗaa ɗoon wo seniinde.

⁶ O wi'i katin: — Miin woni Laamɗo baaba maaɗa, Laamɗo Ibrahiima e Isiyaaka e Yaakuuba. Ndeen Muusaa suddi yeeso muuɗum sabo hulii ndaarude Laamɗo.

⁷ Joomiraaɗo wi'i: — Goonga, mi yi'ii mettorgal yimɓe am ley Misira. Mi nanii bullaali maɓɓe saabe torrooɓe ɓe. Miɗo anndi torraaji maɓɓe.

⁸ Saabe ɗuum de njippiimi faa mi danna yimɓe am e baawɗe Misirankooɓe, mi itta ɓe leydi Misira, mi yaara ɓe leydi lobbiri njaajundi, leydi ndi kosam e njuumndi ilata e muuɗum, nokkuure ɗo Kanaaninkooɓe e Hittiyankooɓe e Amorinkooɓe e Perisinkooɓe e Hewinkooɓe e Yebusinkooɓe njooɗii.

⁹ Inan bullaali Israa'iila'en njottake kam. Katin du mi yi'ii ɓillaare nde Misirankooɓe ɓilli ɓe.

¹⁰ Mi nelete to Fira'awna faa mburtinaa yimɓe am Israa'iila'en ɓeen leydi Misira.

¹¹ Ammaa Muusaa wi'i Laamɗo: — Miin wo mi moy faa mi yaha to Fira'awna, mi wurtina Israa'iila'en leydi Misira?

¹² Laamɗo wi'i o: — Mi wondan e maaɗa. Inan maande holloore wo miin neli ma. Nde mburtinɗaa yimɓe ɓeen Misira fu, on fuu on ngaran teddinon kam dow waamnde ndee.

¹³ Ndeen Muusaa wi'i Laamɗo: — Ndelle si mi yehii to yimɓe Israa'iila, mi wi'ii ɓe: «Laamɗo maamiraaɓe mooɗon neli kam to mooɗon.» Si ɓe ƴamii kam noy woni innde maa, ɗume njaabotoomi ɓe?

¹⁴ Laamɗo wi'i Muusaa: — Miin Woni Mo Ngonumi. O wi'i katin: — Inan ko mbi'ataa Israa'iila'en: Inndirteeɗo Miin-Woni oon neli kam to mooɗon.

¹⁵ Laamɗo wi'i Muusaa katin: — Inan ko mbi'ataa Israa'iila'en: Wo Joomiraaɗo, Laamɗo maamiraaɓe mooɗon, Ibrahiima e Isiyaaka e Yaakuuba neli kam to mooɗon. Ndee woni innde am faa abada. Wo e mayre yimɓe jamaanuuji fuu mbaawiri noddirde kam.

¹⁶ Joonin njahaa kawrondinowaa mawɓe Israa'iila'en mbi'aa ɗum'en: Wo Joomiraaɗo, Laamɗo maamiraaɓe mooɗon, mo Ibrahiima e Isiyaaka e Yaakuuba oon ɓangani kam. O wi'i kam o yi'ii torraaji ɗi torreteɗon ley leydi Misira.

¹⁷ Ɗum saabii mbi'umi mi wurtinan on e mettorgal mooɗon ley leydi Misira, mi yaara on leydi Kanaaninkooɓe e Hittiyankooɓe e Amorinkooɓe e Perisinkooɓe e Hewinkooɓe e Yebusinkooɓe. Ndiin woni leydi ndi kosam e njuumndi ilata e muuɗum.

¹⁸ Israa'iila'en kettindante. Ndeen njaadaa e mawɓe Israa'iila'en to kaananke Misira, mbi'on ɗum: Joomiraaɗo, Laamɗo Ibraninkooɓe ɓanganii min. Miɗen ŋaare, kokkaa min laawol min njaha ley ladde yoornde haddi balɗe tati faa min ngaɗana Joomiraaɗo, Laamɗo amin kirsamaaji.

¹⁹ Ammaa miɗo anndi kaananke Misira jaɓataa njahon sanaa wo doolɗa.

²⁰ Ndelle mi foortan junngo am mi fiira Misira e maandeeji kaayniiɗi ɗi ngaɗanmi ley muuɗum fuu. Caggal ɗuum o yoppan on ndillon.

²¹ Mi waɗan keɓon moƴƴere yeeso yimɓe Misira faa nde mburtoytoɗon leydi maɓɓe ndiin fu, taa mburtoɗon juuɗe ɓole.

²² Israa'iilanke debbo fuu yaha to Misiranke debbo koddo muuɗum, e to debbo janano beeruɗo e suudu muuɗum de ŋaaroo kujje gaɗiraaɗe kaŋŋe e cardi e kaddule. Ɓornon ɗum fuu sukaaɓe mooɗon worɓe e rewɓe. Noon ɓolirton Misirankooɓe.