Wurtagol 29 - Dewtere Laamɗo Fulfulde Burkina Faso

No Haaruuna e ɓiɓɓe muuɗum ceniniraa

¹ Inan ko ngaɗantaa Haaruuna e ɓiɓɓe muuɗum faa ceninaa ɓe de ɓe ngolla gollal almaamaaku yeeso am. Kooƴaa ngaari e jawɗi ɗiɗi ɗi ngalaa malal.

² Katin keɓaa conndi alkama ɗaatundi, ngaɗaa buuru mo njillaaka rabilla e buuruuje gaɗiraaɗe conndi ɓoosidaandi e nebbam e maasaaje jooraaɗe nebbam.

³ Ngattaa ɗum ley hanndeere wootere, de ngaddidaa e ngaari ndiin e jawɗi ɗiin.

⁴ Ɓattinaa Haaruuna e ɓiɓɓe muuɗum dammbugal Hukum Ceniiɗo toon de lootiraa ɗum'en e ndiyam.

⁵ Ndeen kooƴaa kolte ɗeen, ɓornaa Haaruuna. Ɗum woni forgo almaamaaku e saayo bulabulaawo e saayo deketeengo dow e basel kaɓɓeteengel dow ɓernde ngeel. Kaɓɓiraa ɗum kaɓɓorgol canyiraangol e nyeenyal ngool.

⁶ Kippaa kufune dow hoore makko de cenŋaa beɗel kaŋŋe ceniingel dow kufune oon.

⁷ Kooƴaa nebbam ceninirɗam, njooraa dow hoore makko. Ɗuum seedotoo o senndaama saabe gollal ngaal.

⁸ Ngaddaa ɓiɓɓe makko ɓeen du, ɓornaa ɗum'en forgooji.

⁹ Kaɓɓanaa Haaruuna e ɓiɓɓe muuɗum kaɓɓorɗi ɗiin de kippaa kufuneeje dow ko'e maɓɓe. Noon Haaruuna e ɓiɓɓe muuɗum kalfinirtee almaamaaku. Ɗum laatanoo ɓe kamɓe e ƴuwdi maɓɓe yamiroore faa abada.

¹⁰ Ngaddaa ngaari ndiin yeeso Hukum Ceniiɗo toon. Haaruuna e ɓiɓɓe muuɗum njowa juuɗe muɓɓen dow hoore mayri.

¹¹ Kirsaa ndi yeeso Joomiraaɗo dammbugal hukum ɗoon.

¹² Ittaa ƴiiƴam mayri, cuuwaa honndu maaɗa e majjam de mooytaa luwe sakkirde ndeen. Ndufaa ƴiiƴam keddiiɗam ɗaam dow joƴƴinirde mayre.

¹³ Ittaa ɓellere fiiliinde kujje reedu mayri e takkiinde e heeyre e ɓooƴe ɗiɗi ɗeen e ɓellere muɓɓen de mbulaa ɗum fuu dow yiite sakkirde ndeen.

¹⁴ Ammaa teewu e nguru e coowoori ndiin fuu, mbulowaa ɗum yaasin hoɗorde ndeen. Wo ɗum sadaka yaafeede.

¹⁵ Kooƴaa ley jawɗi ɗiin, ngootiri, ngaɗaa Haaruuna e ɓiɓɓe muuɗum njowa juuɗe muɓɓen dow hoore mayri.

¹⁶ Ndeen kirsaa ndi, ittaa ƴiiƴam mayri mbiccaa piilol sakkirde ndeen fuu.

¹⁷ Ngaɗaa ndi taƴe taƴe, lootaa kujje reedu mayri e koyɗe mayri de njowaa ɗum fuu dow kuse ɗeen e hoore ndeen.

¹⁸ Mbulaa ɗum fuu dow sakkirde ndeen. Wo ɗum sadaka buleteeɗo, dokkal ngal uurngol muuɗum weli Joomiraaɗo.

¹⁹ Kooƴaa njawdiri ɗiɗaɓiri ndiin, ngaɗaa Haaruuna e ɓiɓɓe muuɗum njowa juuɗe muɓɓen dow hoore mayri.

²⁰ Kirsaa ndi, ittaa ƴiiƴam mayri mbujaa dow mbaggudi nowru Haaruuna nyaamru e ɗi ɓiɓɓe muuɗum fuu, e kolli juuɗe nyaame gori e ɗi koyɗe muɓɓen nyaame. Mbiccaa yiiƴam keddiiɗam ɗaam dow piilol sakkirde ndeen.

²¹ Nyeɗaa ƴiiƴam ngonɗam dow sakkirde ɗaam seeɗa, kawrondinaa e nebbam seningol de mbiccaa dow ɓanndu Haaruuna e dow kolte muuɗum. Noon ngaɗirantaa ɓiɓɓe makko ɓeen du. Noon kanko e ɓiɓɓe makko e kaddule maɓɓe ceninirtee yeeso Joomiraaɗo.

²² Kooƴaa ɓellere njawdiri ndiin e lacol mayri, e ɓellere fiiliinde kujje reedu mayri e takkiinde e heyre e ɓooƴe ɗiɗi ɗeen e ɓellere takkiinde ɗum'en e busal nyaamal sabo wo ndi njawdiri naatugol gollal almaamaaku.

²³ Ndeen kooƴaa ley hanndeere buuru mo jillaaka rabilla wonnde yeeso Joomiraaɗo ndeen, buuruure tamiinde e buuruure waɗiraande nebbam e maasaare.

²⁴ Ngattaa ɗum, ɗum fuu e juuɗe Haaruuna e ɓiɓɓe muuɗum, de ɓe ɓanta ɗum yeeso Joomiraaɗo.

²⁵ Ndeen, njaɓaa ɗum e juuɗe maɓɓe, mbuldaa ɗum e njawdiri ndiin dow sakkirde ndeen. Ɗum laatoo sadaka mo uurngol muuɗum weli Joomiraaɗo. Wo ɗum sadaka bulanteeɗo Joomiraaɗo.

²⁶ Kooƴaa doomre njawdiri cakkaandi saabe almaamaaku maɓɓe ndiin, ɓantaa yeeso Joomiraaɗo hono no ko sakkanaa Joomiraaɗo jeyi ɓantireede noon. Doomre ndeen woni ngeɗu maaɗa.

²⁷ Ceninaa doomre ndeen e busal ittaangal ngaal de ɓantaa ɗum yeeso Joomiraaɗo saabe seningol Haaruuna e ɓiɓɓe muuɗum.

²⁸ Ɗum laatoo ngeɗu Haaruuna e ɓiɓɓe muuɗum faa abada. Si Israa'iila'en ngaddii dokke sadakaaji dewral fu, wo ɗuum woni ko ittantee almaami'en, ɗum laatoo sadaka saabe Joomiraaɗo.

²⁹ Kolte ceniiɗe ɗe Haaruuna ɓornotoo ɗeen, wo ɓiɓɓe muuɗum ɓornotoo ɗe caggal maayde muuɗum. Wo kanjje ɓe ɓornotoo wakkati ɓe njooroytee nebbam seningol, saabe almaamaaku ndeen.

³⁰ Ɓiyiiko loomtuɗo gollal almaamaaku ngaal fuu, sey ɓornoo kolte ɗeen balɗe jeɗɗi wakkati naatata nokkuure seniinde ley Hukum Ceniiɗo faa gollal ngaal.

³¹ Kooƴaa teewu njawdiri naatugol e almaamaaku ndiin de njonngaa ley nokkuure seniinde.

³² Haaruuna e ɓiɓɓe muuɗum nyaamda teewu nguun e buuru gonɗo ley hanndeere oon dammbugal Hukum Ceniiɗo toon.

³³ Ɓe nyaama ko sakkaa saabe mooytugol hakkeeji faa ɓe laatoo seninaaɓe saabe gollal almaamaaku. Ammaa taa janano fuu nyaama ɗum, sabo wo ɗum nyaamndu seniindu.

³⁴ Si teewu nguun e buuru oon nyaamdaaka faa waali weeti fu, sey wulee. Taa goɗɗo fuu nyaama ɗum, sabo wo ɗum ceniinɗum.

³⁵ Ngaɗanaa Haaruuna e ɓiɓɓe muuɗum ko mbi'umaami ɗuum fuu. Ngaɗiraa ɗum balɗe jeɗɗi faa kalfinaa ɗum'en almaamaaku.

³⁶ Nyannde fuu, kirsaa ngaari kalahaldi ngootiri, ɗum laatoo sadaka mooytugol hakkeeji. Noon laaɓinirtaa sakkirde ndeen de njooraa nebbam seningol dow mayre faa nde laatoo seniinde.

³⁷ Balɗe jeɗɗi ngaɗirtaa sadaka mooytugol hakkeeji, faa ceninaa sakkirde ndeen. Ndeen nde laatoto seniinde sanne, wooɗi du ko meemi nde fuu laatoto ko senii.

Haala kirsamaaji gaɗeteeɗi nyannde fuu

³⁸ Inan ko cakkataa nyannde fuu dow sakkirde ndeen: njawkoy ɗiɗoy koy ndunngu ngootu.

³⁹ Cakkaa gootel subaka, gootel futuro.

⁴⁰ Ɓeydaa e sadaka jawgel go'aɓel ngeel kilooje tati conndi ɗaatundi ɓoosidaandi e nebbam laaɓuɗam liitere e feccere tawti e inaboojam liitere e feccere.

⁴¹ Ndeen jawgel ɗiɗaɓel cakketeengel futuro ngeel du sakkidee e conndi e nebbam e inaboojam hono no subakayel ngeel noon. Ɗum laatoo sadaka buleteeɗo mo uurngol muuɗum weli Joomiraaɗo.

⁴² Sadaka buleteeɗo oon, on keddoto e waɗude ɗum dammbugal Hukum Ceniiɗo yeeso Joomiraaɗo ley jamaanuuji fuu faa abada. Wo ɗoon kawrammi e mooɗon, wooɗi du wo ɗoon kaaldammi e mooɗon.

⁴³ Ɗoon kawrammi e Israa'iila'en. Nokkuure ndeen laatoo senaande saabe Teddeengal am.

⁴⁴ Mi seninan hukum am ceniiɗo oon e sakkirde ndeen fuu. Mi seninan Haaruuna e ɓiɓɓe muuɗum faa ɓe ngollana kam gollal almaamaaku.

⁴⁵ Mi wondan e Israa'iila'en, mi laatoo Laamɗo muɓɓen.

⁴⁶ Noon ɓe annditirta ko miin woni Joomiraaɗo, Laamɗo maɓɓe burtinɗo ɓe ley leydi Misira faa wonda e maɓɓe. Miin woni Joomiraaɗo, Laamɗo maɓɓe.