Wurtagol 23 - Dewtere Laamɗo Fulfulde Burkina Faso

¹ Taa kawtaa e haalaaji fewreeji. Taa ceedoɗaa fewre de mballitaa bonɗo ley mbonkaaji muuɗum.

² Taa njokkaa gaɗa jamaa faa ngaɗon ko boni. Si on njehii laamorde faa ceedowoɗon, taa keedanaa yimɓe suuɗooɓe goonga.

³ Taa njinganon talkaajo pelniiɗo ley sariya.

⁴ Si a tawii ngaari ganyo maaɗa, naa araawa muuɗum lallunga, sey kooranaa ɗum nga.

⁵ Si a yi'ii donngal na liɓi araawa ganyo maaɗa, taa witta njoppaa nga. Na tilsi mballaa nga.

⁶ Taa oonyaa sariya saabe careteeɗo wo talka.

⁷ Taa kawtaa e waddooɓe haalaaji ɗi ngaldaa e goonga. Taa mbaraa laaɓuɗo naa ponnditiiɗo, sabo mi ndaardataa bonɗo wo ponnditiiɗo.

⁸ Taa njaɓaa njeenaari to careteeɗo, sabo njeenaari na wumna saahiiɓe na ɗala dartiiɓe goonga.

⁹ Taa torraa beero sabo oɗon anndi saɗɗaaji yaade njanandi. Onon du on laatakeno weerɓe ley leydi Misira.

Haala ndunngu powtiri e nyalaande fowteteende

¹⁰ Ndemaa ngesa maaɗa haddi duuɓi jeegom.

¹¹ Ammaa ndunngu njeɗɗaɓu nguun kaa, a jeyaa remude nga. Accanaa nga talkaaɓe ley lenyol maaɗa. Ko heddii du, daabaaji ladde nyaama. Noon ngaɗirtaa ngesa maaɗa inabooje e nga jaytun fuu.

¹² Balɗe jeegom ngollirtaa gollal maaɗa. Ammaa nyalaande jeɗɗaɓerde kaa, na tilsi powtaa faa ga'i maa e araaji maa du keɓa powta. Noon du maccuɓe maaɗa e weerɓe maa fuu powtirta.

¹³ Ngaɗon ko mbi'umi on ɗuum wooɗi du, taa noddon allaaji feere, taa fay inɗe majji nanee e kunnduɗe mooɗon.

Haala iidiiji Joomiraaɗo

¹⁴ Ley hitaande fuu, ngaɗanaa kam iidi kile tati.

¹⁵ Ngaɗaa iidi Buuru mo Jillaaka Rabilla. Balɗe jeɗɗi nyaamirtaa buuru mo jillaaka rabilla hono no njamirmaami noon. Ngaɗaa iidi oon ley lewru Abib, sabo wo ley leyru nduun mburtinoɗaa leydi Misira. Taa ngaraa yeeso am juuɗe ɓole.

¹⁶ Ngaɗaa iidi tayri e ko artii ɓenndude ley gese maaɗa. Ngaɗaa iidi oon nde timminɗaa tayri ndeen.

¹⁷ Worɓe mooɗon ngara yeeso Laamɗo Joomiraaɗo ley hitaande fuu kile tati.

¹⁸ Nde kirsantaa kam kirsamaaji fu, taa kawrondinaa ɗi e ko jillaa rabilla. Taa accaa ɓellere kirsamaari ndi ngaɗantaa kam ndiin jeyaa heddaade waalta.

¹⁹ Ngaddaa ley suudu Joomiraaɗo, Laamɗo maaɗa ko ɓuri wooɗude ley ko artii ɓenndude e ngesa maaɗa. Taa njongaa teewu ɓinngel mbeewa nder kosam inna muuɗum.

No Israa'iila'en njooɗortoo ley leydi Kanaana

²⁰ Mi nelan maleyka yeeso mooɗon deenoowo on dow laawol faa yaara on nokkuure nde moƴƴinanmi on ndeen.

²¹ Kakkilaa faa wooɗa yeeso makko, kettindoɗaa haala makko. Taa muurtanaa o, sabo o yaafataako hakkeeji maaɗa. Innde am na tawdaa e makko.

²² Si a kettindanake o e hakkillo de ngaɗuɗaa ko mbi'umi fuu, mi laatoto ganyo wayɓe maaɗa e kaɓdoowo e haɓdiiɓe maaɗa.

²³ Maleyka am ardete faa yaare ley leydi Amorinkooɓe, e Hittiyankooɓe, e Perisinkooɓe, e Kanaaninkooɓe, e Hewinkooɓe, e Yebusinkooɓe. Mi halkan ɓe.

²⁴ Taa ndikkinoɗaa yeeso allaaji maɓɓe, taa ɗowtanoɗaa ɗi, taa ngaɗanaa ɗi huunde fuu ko ɓiɓɓe leydi ndiin ngaɗanta ɗi. Cankitaa ɗi, pusaa bimmbeeje tooruuji ɗi ɓe ɗowtantoo ɗiin.

²⁵ Ɗowtanoɗon Laamɗo, Joomiraaɗo mooɗon, ndeen o barkinan ko nyaamoton e ko njaroton, wooɗi du, o riiwan nyawu ley ɓalli mooɗon.

²⁶ Reedu debbo fay gooto bonataa, wooɗi dimaro fuu tawataake ley leydi mooɗon. Mi waɗan balɗe mooɗon njuuta.

²⁷ Mi jiiɓan wayɓe mooɗon, mi hulɓinan lenyi leydi ndi ponndiɗon ɗiin fuu de mi riiwa ɗi. Mi waɗan wayɓe mooɗon fuu ndogga yeeso mooɗon.

²⁸ Mi nelan jabbatti keewɗi ardoo on faa ndiiwa Hewinkooɓe e Kanaaninkooɓe e Hittiyankooɓe yeeso mooɗon.

²⁹ Mi riiwataa ɓe ley hitaande wootere yeeso mooɗon sakko leydi ndiin laatoo winnde de daabaaji ladde ɗuuɗa, ɓura on semmbe.

³⁰ Ammaa seeɗa seeɗa ndiiwiranmi ɓe yeeso mooɗon faa nde ɗuuɗoyɗon de ndonon leydi ndiin.

³¹ Mi hokkan on ndongu gilla maayo Maaliya faa maayo Filistiyankooɓe, gilla ladde yoornde faa maayo Efrat, sabo mi wattan jooɗiiɓe e leydi ndiin fu e juuɗe mooɗon. On ndiiwan ɓe yeeso mooɗon.

³² Taa kaɓɓidon e maɓɓe kamɓe e tooruuji maɓɓe fuu amaana.

³³ Taa ɓe njooɗoo ley leydi mooɗon de ɓe mbosina on, sabo ɗuum waddanan on waɗude hakke yeeso am. Si on ɗowtanake allaaji maɓɓe fu, ɗum laatanto on fergorde.