Wurtagol 21 - Dewtere Laamɗo Fulfulde Burkina Faso

Yamiroore dow maccuɓe

¹ Inan jamirooje Joomiraaɗo ɗe anndintaa ɓe:

² Si a soodii maccuɗo Ibraninke fu, o gollane haddi duuɓi jeegom. Ley hitaande jeɗɗaɓerde, njoofaa o, o dilla. Taa njoɓnoɗaa o faa'e.

³ Si kanko tan warunoo e junngo maaɗa, o dilla kanko tan. Si o wardiino e deekiiko du, o dillida e muuɗum.

⁴ Si joomiiko hokkii mo debbo, de debbo oon rimanii mo ɓiɓɓe worɓe naa rewɓe fu, debbo oon e ɓiɓɓe muuɗum laatoto jeyal joomiiko oon. Maccuɗo oon dilla kam tan.

⁵ Ammaa si maccuɗo oon haalii faa laaɓii, wi'ii: «Miɗo yiɗi joomam e deekam mo kokkuɗaa kam e ɓiɓɓe am, ndelle mi yiɗaa dillude ɗo maaɗa, fu,»

⁶ sey joomiiko oon yaara o yeeso Laamɗo. Caggal ɗuum, takka o e dammbugal naa sera muuɗum de tufira nowru makko kural. Ndeen o gollana joomiiko oon haddi nguurndam makko fuu.

⁷ Si gorko sonnii ɓiyum debbo faa laatoo korɗo fu, o yoofataake hono maccuɓe njoofirtee noon.

⁸ Si o fotanaay joomiiko anniyinooɗo dewlude mo oon fu, sey oon yardoo neɗɗo makko sooditoo o. Taa oon sonnira mo jananɓe, sabo ɗuum wo jambaade mo.

⁹ Si oon resanii mo ɓiyum du, sey ndaarda o hono no ɓiɓɓe muuɗum rewɓe noon.

¹⁰ Si joomiiko oon dewlii goɗɗo du, taa ɓuytaa ngeɗu neema makko maa kolte makko. Wooɗi du heddoo na wondi e makko hono no gorko wondirta e deekum noon.

¹¹ Si gorko oon waɗanaay o kujje tati ɗeen fu, debbo oon ina waawi wurtaade tawee yoɓaay ceede yoofeede.

Boofi potooji e jukkungo wareede

¹² Piiɗo goɗɗo faa maayi fu, tilay waree.

¹³ Si baruɗo oon anniyaakino warude joomum de wo miin Laamɗo acci ɗum laatorii noon fu, mi hollan o to o doggirta, o suuɗowoo.

¹⁴ Ammaa anniyiiɗo ittirde yonki banndum e jammba kaa, fay si moolowii sakkirde am, nanngowon ɗum, mbaron.

¹⁵ Piiɗo inna muuɗum naa baaba muuɗum fuu, tilay waree.

¹⁶ Kappuɗo ɓii-Aadama de sonni ɗum, naa si kappaaɗo oon tawaama e junngo makko fu, tilay gujjo oon waree.

¹⁷ Kuɗuɗo baaba muuɗum naa inna muuɗum fuu, tilay waree.

Jamirooje dow piiɗe e barme

¹⁸ Si yimɓe kaɓii faa gooto nawnii banndum, si wo hayre o fiiri joomum naa wo junngo, tawee piyaaɗo oon boɓɓake naa tawee piiɗe ɗeen pukkinii ɗum de maayaay,

¹⁹ si ummake fuɗɗii tiigaade sawru ina yiiloo fu, nawnuɗo ɗum oon warataake, ammaa yoɓan piyaaɗo oon balɗe ɗe fukkorii ɗeen. Wooɗi du o yoɓan sawrugol joomum.

²⁰ Piiruɗo maccuɗo muuɗum naa korɗo muuɗum sawru faa wari ɗum fuu, tilay jukkee.

²¹ Ammaa si oon fukkorake nyalaande wootere naa balɗe ɗiɗi de ummii fu, joomiiko hiitataake, sabo wo o jawdi muuɗum.

²² Si worɓe na kaɓa de nawnii debereedu, si ɗuum sabanake debbo oon rimude gilla wakkati muuɗum yottaaki de tawi ɓinngel ngeel nawnaaki fu, tilay ɓe njoɓa buuɗi ɗi goroo debbo oon taƴanta ɓe yeeso hiitotooɓe.

²³ Ammaa si debbo oon nawnake, sariya waɗete: yonki yoɓiree yonki,

²⁴ yitere yoɓiree yitere, nyiinde yoɓiree nyiinde, junngo yoɓiree junngo, koyngal yoɓiree koyngal,

²⁵ wulugol yoɓiree wulugol, nawnalla yoɓiree nawnalla, barmere yoɓiree barmere.

²⁶ Piiɗo maccuɗo muuɗum naa korɗo muuɗum faa itti yitere muuɗum fu, sey yoofa ɗum saabe yitere ndeen.

²⁷ Ittuɗo nyiinde maccuɗo muuɗum du, sey yoofa ɗum saabe nyiinde ndeen.

Jamirooje dow ga'i

²⁸ Si ngaari yuwii goɗɗo, warii ɗum fu, si wo gorko naa debbo fu, tilay ndi faɗɗee kaaƴe faa ndi waata. Teewu mayri du nyaamataake. Ammaa jeyɗo ndi oon hisan.

²⁹ De si tawii ngaari ndiin wo kawoori, wooɗi joomiiri faaminanooma ɗum, de hawjaaki ndi, faa ndi hawi gorko naa debbo, ndi wari ɗum fu, sey ndi faɗɗee kaaƴe faa ndi waata. Jeyɗo ndi oon du waree.

³⁰ De si yimɓe mo ndi wari oon njaɓii o yoɓa, ndeen kaa o yoɓa ko ɓe njamiri o fuu, ɗum laatoo coggu ndimɗinoowu yonki makko.

³¹ Si ɓiɗɗo gorko naa debbo ndi hawi, sariya waɗee.

³² Si ngaari ndiin hawii maccuɗo naa korɗo, sey joomiiri yoɓa joomiiko buuɗi cardi 30, de ndi faɗɗee kaaƴe faa ndi waata.

³³ Si neɗɗo udditii ngayka naa wasii ngayka, de uddaay ka, si ngaari goɗɗo naa araawa goɗɗo saamii ley toon de waatii fu,

³⁴ sey basuɗo ngayka oon yoɓa jom dammuccere oon, ammaa dammuccere waatunde ndeen laatoto nde makko.

³⁵ Si ngaari goɗɗo warii ndi banndum, sey ngaari mbarndi ndiin sonnee, de ɓe cennda ceede mayri. Mbaatundi ndiin du, ɓe cennda ɗum.

³⁶ Ammaa si na anndanoo wo ndi kawoori, de jeyɗo ndi oon ndaaranaay ndi fu, tilay o yoɓa ngaari ngonndi. Mbaatundi ndiin laatoto ndi makko.

³⁷ Si goɗɗo wujjii ngaari naa mbaalu, hirsii naa sonnii, sey o yoɓa ga'i joy saabe ngootiri ndiin. Joomum yoɓan du baali nay ngam mbaalu ngootu nguun.