Wurtagol 20 - Dewtere Laamɗo Fulfulde Burkina Faso

Haala jamirooje Joomiraaɗo sappo ɗeen

¹ Laamɗo haali haalaaji ɗi, wi'i:

² — Miin woni Joomiraaɗo, Laamɗo maaɗa, wo miin wurtini ma leydi Misira ley suudu maccungaaku.

³ Taa ngoodaa alla goɗɗo si wanaa miin.

⁴ Taa ngaɗanaa hoore maaɗa tooruuji nanndinaaɗi e ko woni dow kammu naa e leydi naa ley ndiyam.

⁵ Taa kofoɗaa yeeso kujje ɗeen, wooɗi du, taa ɗowtanoɗaa ɗe sabo miin Joomiraaɗo, Laamɗo maaɗa oon, wo mi Laamɗo keewɗo kiram. Mi kiitotooɗo ɓiɓɓe saabe hakkeeji baabiraaɓe muɓɓen faa hewta taaniraaɓe e jaatiraaɓe wanyuɓe kam ɓeen.

⁶ Ammaa yiɗuɓe kam de na ɗowtanoo jamirooje am ɓeen kaa, mi hinnoto ɗum'en faa hewta jamaanuuji ujunere.

⁷ Taa noddaa innde am ɓolum, miin Joomiraaɗo, Laamɗo maaɗa, sabo mi accataa pijirɗo innde am ɓolum.

⁸ Taa njeggitaa nyalaande fowteteende ndeen, nde laatane nyalaande seniinde.

⁹ Ngolliraa balɗe jeegom, timminaa ko ngollataa fuu.

¹⁰ Ammaa nyalaande jeɗɗaɓerde ndeen kaa, wo nyannde fowteteende saabe Joomiraaɗo, Laamɗo maaɗa. Taa ngollaa faa'e aan e ɓiɓɓe maaɗa worɓe e rewɓe e maccuɓe ma e horɓe ma e daabaaji ma laatiiɗi fuu e jananɓe jooɗiiɓe ley galluuje maaɗa fuu.

¹¹ Sabo ley balɗe jeegom miin Joomiraaɗo ngaɗumi kammu e leydi e maayo e ko woni ley muɓɓen fuu. Saabe ɗuum mi barkinii nyannde jeɗɗaɓerde, mi seninii nde.

¹² Teddinaa baaba ma e inna ma faa balɗe maaɗa njuuta ley leydi ndi Joomiraaɗo, Laamɗo maaɗa hokkete ndiin.

¹³ Taa ngaɗaa war-hoore.

¹⁴ Taa ngaɗaa jeenu.

¹⁵ Taa mbujjaa.

¹⁶ Taa ceedanoɗaa goɗɗo fewre.

¹⁷ Taa muuyaa suudu goɗɗo. Taa eelaa dee goɗɗo naa maccuɗo mum naa korɗo mum naa nagge mum naa araawa mum naa huunde fuu ko jeyi.

No yimɓe Israa'iila kuliri ɓangugol Laamɗo.

¹⁸ Yimɓe fuu nani pelnyaali e fuufaango luwal, ɓe nji'i maƴƴe e waamnde suurtoore. Nde ɓe nji'unoo ɗum fu, ɓe keddii iɓe ndiwna kulol, ɓe keedii to toowti, iɓe ndarii.

¹⁹ Ɓe mbi'i Muusaa: — Haaldu e amin, aan e hoore maaɗa, min kettinto. Ammaa Laamɗo kaa, taa haalda e amin sabo min maayan.

²⁰ Muusaa wi'i yimɓe ɓeen: — Taa kulee sabo Laamɗo ina ndaartinoo on faa kulol mum wona ley ɓerɗe mooɗon, taa ngaɗon hakke.

²¹ Yimɓe ɓeen ndarii to woɗɗi ammaa Muusaa ɓattitii ruulde niɓɓunde to Laamɗo woni toon.

Jamirooje dow sakkirde sadakaaji

²² Joomiraaɗo wi'i Muusaa: — Kaalanaa Israa'iila'en, mbi'aa ɗum'en: On nji'ii mi haaldii e mooɗon gilla dow kammu.

²³ On ngaɗantaa ko'e mon allaaji kaŋŋe naa cardi.

²⁴ Nyiɓanon kam sakkirde, mahiron nde leydi. Dow mayre ngaɗoton kirsamaaji mooɗon buleteeɗi e sadakaaji dewral ittaaɗi ley daabaaji mooɗon pamari e mawɗi fuu. To cuɓiimi teddinde innde am fuu, mi waran to mooɗon mi barkina on.

²⁵ Si oɗon nyiɓirana kam sakkirde e kaaƴe fu, ngollitoroɗon kaaƴe ɗe cehaaka sabo hayre sehiraande njamndi fuu, wo harmunde.

²⁶ Taa ngaɗanon sakkirde am ndeen ƴeeŋirgal sabo si on ngaɗii noon fu, oɗon mbaawi suurtinde ko'e mooɗon.