Wurtagol 2 - Dewtere Laamɗo Fulfulde Burkina Faso

Haala rimeede Muusaa

¹ Gorko gomma jeyaaɗo e ƴuwdi Lewi ɓaŋi debbo ley lenyol muuɗum.

² Debbo oon reedi, rimi ɓinngel gorel. Nde o yi'unoo no ngel foti ŋarɗude fu, o suuɗi ngel faa waɗi lebbi tati.

³ Caggal ɗuum, o ronki suuɗude ngel. Ndeen o hooƴi hanndeere ciidi, o takki ɗum ɗakke e taari. O watti ɓinngel ngeel ley toon. O yehi o joƴƴini hanndeere ndeen ley soɗorko daande maayo Nil.

⁴ Mawniingel debbo ina darii to toowti faa ndaara noy ɗum laatortoo.

⁵ Caggal ɗuum, ɓii Fira'awna debbo wari maayo toon faa lootoo. Horɓe muuɗum ina mbaanconoo ɗakkol daande maayo ngoon. O yi'i hanndeere ndeen ley soɗorko. O neli korɗo makko ada nde wadda.

⁶ Nde o omtunoo nde fu, o tawi cukalel gorel na woya. O yurmii ngel, o wi'i: — Wo ɓinngel Ibraninkooɓe.

⁷ Ndeen mawniigel debbo wari wi'i mo: — Yalla mi yaha mi filanowe musinninoowo ngel hakkunde rewɓe Ibraninkooɓe naa?

⁸ Ɓii Fira'awna oon jaabii mo, wi'i: — Ayyo, Yahu. O yehi o noddowi inna cukalel ngeel.

⁹ Ndeen ɓii Fira'awna wi'i debbo oon: Hooƴu cukalel ngeel tiigoɗaa ngel aɗa musinnina ngel, mi yoɓete. Debbo oon hooƴi ngel, na ngel musina ɗum.

¹⁰ Nde ngel mawnunoo fu, o wartiri ngel to ɓii Fira'awna debbo oon, de waɗi ngel ɓiyum. O inndiri ngel Muusaa. O wi'i: — Saabe mi ittii ngel ley ndiyam.

No Muusaa doggiri yehi leydi Madiyan

¹¹ Nde Muusaa mawnunoo fu, wurtii nyannde gomma, yehi to yimɓe lenyol muuɗum. O yi'i golleeji tiiɗɗi ɗi ɓe ngollintee. Ndeen o yi'i Misiranke gomma ina fiya banndiiko Ibraninkeejo.

¹² Muusaa yeeƴii ndaari tatteeji fuu, yi'aay fay gooto. Ndeen tappi Misiranke oon, o wari ɗum. O suuɗi ɗum ley njaareendi.

¹³ Jaangoore majjum, o wurtii katin, o yi'i Ibraninkooɓe ɗiɗo na kaɓda. O ƴami toonyiiɗo oon o wi'i: — Ko waɗi aɗa fiya bannda?

¹⁴ Oon jaabii o wi'i: — Moy waɗi ma ardiiɗo e carotooɗo min? Yalla wo warude kam hono no mbarduɗaa Misiranke oon noon anniyiɗaa naa? Ndeen Muusaa huli, wi'itii: — Ndelle, goonga kabaaru oon annditaama!

¹⁵ Fira'awna e hoorem humpitaa kabaaru oon, de filii warude Muusaa. Ndeen Muusaa doggi Fira'awna, yehi jooɗowii leydi Madiyan. Ley leydi ndiin, o yottii o jooɗii ɗakkol ɓunndu.

¹⁶ Tawi almaami Madiyan ina woodi sukaaɓe rewɓe njeɗɗo. Ɓeen ngari faa ƴooga kebbina akalaaje, njarna dammuuli baaba muɓɓen.

¹⁷ Ammaa durooɓe woɓɓe ngari ndiiwi ɗum'en. Ndeen Muusaa ummii walli ɓe, yarnani ɓe dammuuli maɓɓe.

¹⁸ Nde ɓe njeccinoo to Rewel baabiiɓe fu, ƴami ɓe wi'i: — Noy waɗi de ngartuɗon law hannden?

¹⁹ Ɓe njaabii ɓe mbi'i: — Misiranke gomma danni min e juuɗe durooɓe. Katin du o safi, o yarnani min dammuuli amin.

²⁰ O ƴami sukaaɓe makko rewɓe ɓeen o wi'i: — Toy gorko oon woni? Ko waɗi njoppuɗon o toon? Njehee noddowee o, o wara, o nyaamda e meeɗen.

²¹ Muusaa jaɓi jooɗaade ley ɓaade gorko oon. Oon hokki mo ɓiyum debbo inndirteeɗo Sifoora o ɓaŋi.

²² Debbo oon rimani mo ɓiɗɗo gorko. Muusaa inndiri ɗum Gersom (ɗum woni beero), sabo o wi'itake: «Miin wo mi beero ley leydi njananndi».

²³ Caggal duuɓi keewɗi, kaananke Misira oon maayi. Yimɓe Israa'iila na uuma na mboya ley maccungaaku muɓɓen. Wullitagol maɓɓe saabe maccungaaku ngool njottii faa to Laamɗo.

²⁴ Laamɗo nani uumaali maɓɓe, siwtori amaana muuɗum mo waddunoo e Ibrahiima e Isiyaaka e Yaakuuba.

²⁵ Laamɗo ndaari Israa'iila'en, faami ko hewtii ɗum'en.