Wurtagol 18 - Dewtere Laamɗo Fulfulde Burkina Faso

Muusaa e esum Yetiro

¹ Yetiro almaami Madiyan esoo Muusaa nani ko Laamɗo waɗani Muusaa e Israa'iila'en, yimɓe muuɗum. O nani no Joomiraaɗo wurtiniri ɓe leydi Misira.

² Tawi Muusaa waɗiino deekum Sifoora hooti to bammum Yetiro. Yetiro hooƴi mo kanko

³ e ɓiɓɓe makko worɓe ɗiɗo, gooto na wi'ee Gersom (ɗum na fiirta janano) sabo nde Muusaa rimananoo o ndeen, haalii wi'i: «Wo mi janano ley leydi njananndi.»

⁴ Gooto oon du na wi'ee Eliyejer, (ɗum na fiirta Laamɗo woni ballo am) sabo Muusaa wi'i: «Laamɗo baaba am wallii kam, o dannii kam e kaafaahi Fira'awna.»

⁵ Yetiro esoo Muusaa oon kam e ɓiɓɓe Muusaa ɗiɗo ɓeen e inna muɓɓen ngari ɗakkol waamnde Laamɗo to Muusaa ley ladde to hoɗi toon.

⁶ Yetiro neli Muusaa wi'ee: — Miin Yetiro esa, miɗo warda e deeka e ɓiɓɓe maaɗa ɗiɗo to maaɗa.

⁷ Muusaa yehi hawrowi e esum oon, leeƴinanii ɗum, muccii ɗum. Ɓe njowtondiri de ɓe naati ley hukum.

⁸ Muusaa haalani esum ko Joomiraaɗo waɗi Fira'awna e Misirankooɓe fuu saabe Israa'iila'en e torraaji kewtiiɗi ɓe ley jahaangal maɓɓe e no Joomiraaɗo danniri ɓe.

⁹ Nde Yetiro nannoo kabaaru lobbo dow ko Joomiraaɗo waɗani Israa'iila'en nde wurtinnoo ɗum'en ley baawɗe Misirankooɓe fu, ɗum seyni ɓernde muuɗum.

¹⁰ O wi'i: — Yettoore woodana Joomiraaɗo dannuɗo on e juuɗe Misirankooɓe e junngo Fira'awna, dannuɗo lenyol ngool e maccungaaku Misira.

¹¹ Joonin mi faamii Joomiraaɗo na ɓuri allaaji goɗɗi fuu manngu sabo ndaar ko o waɗi Misirankooɓe mawninɓe ko'e muɓɓen ɓeen!

¹² Yetiro esoo Muusaa oon waddani Laamɗo sadaka buleteeɗo e dokke. Ndeen Haaruuna e mawɓe Israa'iila fuu ngari nyaamdi e esoo Muusaa yeeso Laamɗo.

No sarotooɓe cuɓoraa

¹³ Jaangoore majjum Muusaa jooɗii faa saroo yimɓe. Ɓe ngari ɗo muuɗum gilla subaka faa caamal naange.

¹⁴ Nde esiiko yi'unoo ko o waɗanta yimɓe ɗuum fu, wi'i mo: — Ɗume woni ko ngaɗantaa yimɓe ɓe ɗum? Ko waɗi aɗa saroo aan tan de yimɓe ɓe na ndarii ɗakkol maa gilla subaka faa caamal naange?

¹⁵ Muusaa jaabii mo, wi'i: — Yimɓe ɓeen na ngara to am faa paama muuyɗe Laamɗo.

¹⁶ Si woodii ɓe ndewraay du, ngara to am faa mi saroo hakkunde muɓɓen, mi anndina ɗum'en jamirooje e sariyaaji Laamɗo.

¹⁷ Esoo Muusaa oon jaabii, wi'i: — No ngattaa noon wooɗaa.

¹⁸ Aan e yimɓe warooɓe to maa fuu, on tampan tan. Gollal ngaal na teddani ma. A waawataa ɗum aan tan.

¹⁹ Joonin kettindanoɗaa kam. Mi haalante no ngaɗataa de Laamɗo du wonda e maaɗa. Golle maaɗa wo daranaade yimɓe ɓee yeeso Laamɗo e waddude kabaaruuji careteeɗi yeeso muuɗum.

²⁰ Njannginaa ɓe jamirooje e sariyaaji makko. Anndinaa ɓe laawol ngol ɓe ndewata e ko ɓe ngaɗata.

²¹ Joonin le, ndaaraa hakkunde yimɓe ɓeen fuu, de cuɓoɗaa worɓe saahiiɓe, hulooɓe Laamɗo, hoolniiɓe, wanyuɓe jawdi jambuuri. Ngaɗaa woɓɓe maɓɓe laatoo hooreeɓe dow yimɓe ujunere (1.000), woɓɓe du hooreeɓe yimɓe 100, woɓɓe du yimɓe 50, woɓɓe du yimɓe 10.

²² Ɓeen njooɗotoo wakkati fuu faa caroo yimɓe. Ko tiiɗi ɓe fuu, ɓe ngadda ɗum to maaɗa. Si ko tiiɗaay du ɓe caroo ɗum kamɓe e ko'e maɓɓe. Noon golleeji maaɗa ɓuytortoo sabo ɓe mballete ndonndoɗaa donngal ngaal.

²³ Si a waɗii noon, si tawii wo noon Laamɗo yamiri ma fu, a tampataa wooɗi yimɓe ɓeen du kootan ina ndewri.

²⁴ Muusaa jaɓi tindinooje esum ɗeen de waɗi ko wi'i ɗuum fuu.

²⁵ O suɓii worɓe saahiiɓe hakkunde yimɓe Israa'iila fuu, o waɗi ɗum'en hooreeɓe yimɓe ujune ujune e hemre hemre e capanɗe joy joy e sappo sappo.

²⁶ Ɓeen carotoo yimɓe wakkati fuu. Ko tiiɗani ɓe fuu, ɓe njaara ɗum to Muusaa. Ko tiiɗaa du ɓe caroo ɗum kamɓe e ko'e maɓɓe.

²⁷ Caggal ɗuum, Muusaa waynii esum, de oon soƴƴii leydi muuɗum.