Wurtagol 17 - Dewtere Laamɗo Fulfulde Burkina Faso

No Joomiraaɗo wurtiniri ndiyam ley tefaare

¹ Jamaa Israa'iila'en fuu dilli ladde Sin hono no Joomiraaɗo yamirnoo noon. Ɓe ndewi nokkuuje feere feere faa ɓe njottii Refidim. Ammaa ɓe tawaay ɗoon ndiyam njareteeɗam.

² Ndeen ɓe umminani Muusaa fitina iɓe mbi'a: — Hokku min ndiyam min njara. Muusaa jaabii ɓe, wi'i: — Ko waɗi oɗon piloo haɓude e am? Ko waɗi oɗon ndaartinoo Joomiraaɗo?

³ De saabe ɗomka ina jogii ɓe sanne, ɓe puɗɗi iɓe ŋurŋurtana Muusaa, Iɓe mbi'a: — Ko waɗi mburtinɗaa min Misira? Yalla faa minen e ɓiɓɓe amin e kulle amin fuu min maaya ɗomka naa?

⁴ Muusaa wullitii Joomiraaɗo, wi'i: — Noy ngaɗanammi yimɓe ɓe? Inani iɓe ndarii faa ɓe limna kam kaaƴe.

⁵ Joomiraaɗo wi'i Muusaa: — Ƴuuru yeeso jamaa oon, kooƴaa woɓɓe hakkunde mawɓe Israa'iila. Kooƴaa du sawru ndu piiruɗaa maayo Nil nduun, njahaa.

⁶ Miin mi daroto yeeso maaɗa dow hayre wonnde Sinayi ndeen. Piya hayre ndeen ko ndiyam wurtoto e mayre faa yimɓe ɓeen njara. Muusaa waɗiri noon yeeso mawɓe Israa'iila'en.

⁷ O inndiri nokkuure ndeen Massa e Meriba (ɗum na fiirta «Ndaartinaade» e «Luural») sabo wo ɗoon yimɓe Israa'iila luuri e Muusaa. Ɗoon du ɓe ndaartinii Joomiraaɗo, ɓe mbi'i: — Yalla Joomiraaɗo ina wondi e meeɗen naa waldaa e meeɗen?

Wolde Amalekinkooɓe e Israa'iila'en

⁸ Amalekinkooɓe ngari faa kabda e Israa'iila'en ley Refidim.

⁹ Muusaa wi'i Yoosuwa: — Suɓana en worɓe de njalton, kaɓdon e Amalekinkooɓe. Jaango mi daroto dow seɓtoodu waamnde, miɗo tiigii sawru Laamɗo e junngo am.

¹⁰ Yoosuwa ƴeeŋi haɓdowii e Amalekinkooɓe hono no Muusaa yamiri ɗum noon. Muusaa e Haaruuna e Huur du njehi faa dow seɓtoodu waamnde toon.

¹¹ Nde Muusaa ƴepti juuɗe muuɗum dow fu, wo Israa'iila'en njaalotoo, ammaa nde o jippini ɗe fu, wo Amalekinkooɓe njaalotoo.

¹² Ammaa juuɗe Muusaa ŋooɗi sanne. Ndelle Haaruuna e Huur kooƴi hayre ngaddani ɗum faa jooɗoo. Nde o jooɗinoo fu, Haaruuna e Huur tiigii juuɗe makko, gooto ina woni junngo nyaamo, gooto du junngo nano. Juuɗe Muusaa keddii ina ƴeptorii noon faa kiiral naange.

¹³ Yoosuwa du heɓi jaalorgal manngal dow Amalekinkooɓe, o jaalorii ɓe kaafaahi.

¹⁴ Joomiraaɗo wi'i Muusaa: — Winndu ɗum fuu ley dewtere faa taa ɗum yeggitee. Hollu Yoosuwa, mi halkan Amalekinkooɓe fuu faa abada, faa taa fay gooto miccitoo ɓe e adunaaru.

¹⁵ Muusaa nyiɓi sakkirde, inndiri nde «Joomiraaɗo wo mo kawreten to mum de njaaloɗen».

¹⁶ O wi'i: Saabe Amalekinkooɓe cuusii, ƴeptii juuɗe muɓɓen faa kaɓda e jooɗorgal Joomiraaɗo, joonin Joomiraaɗo du haɓdan e maɓɓe faa abada.