Wurtagol 16 - Dewtere Laamɗo Fulfulde Burkina Faso

No Joomiraaɗo nyaamniri yimɓe Israa'iila manna e gerle

¹ Jamaare Israa'iila fuu eggi Elim njottii ladde Sin wonnde hakkunde Elim e waamnde Sinayi, nyannde 15 lewru ɗiɗaɓurdu caggal wurtagol maɓɓe Misira.

² Nder ladde yoornde ɗoon, jamaare Israa'iila fuu fuɗɗi ŋurŋurtande Muusaa e Haaruuna.

³ Ɓe mbi'i ɗum'en: — Kay, ko ɓurannoo min fu, tawee Joomiraaɗo wariino min ley leydi Misira! Toon min njooɗinoo ɗakkol payanɗe amin teewu, miɗen nyaama faa miɗen kaara. Yalla wo warude min kaajaɗon de ngadduɗon min ley ladde yoornde ndee faa mbardon kawrital ngaal fuu rafo naa?

⁴ Ndeen Joomiraaɗo wi'i Muusaa: — Mi ƴuurnan buuru dow kammu mi tomnana on. Nyannde fuu, yimɓe mburtoo cuɓa haddi ko heƴata ɗum'en ley nyalaande wootere. Noon ndaartindortoomi ɓe faa mi ndaara yalla ɓe ɗowtanto jamirooje am naa ɓe ɗowtantaako ɗe.

⁵ Nyannde jeegoɓerde, ɓe mburtoo ɓe cuɓa nyaamdu nduun faa hewta ko ɓe nyaamira balɗe ɗiɗi.

⁶ Muusaa e Haaruuna kaaldi e Israa'iila'en fuu, mbi'i ɗum'en: — Hannden jemma on paaman wo Joomiraaɗo kam wurtini on leydi Misira.

⁷ Gilla subaka on nji'an teddeengal Joomiraaɗo sabo o nanii oɗon ŋurŋurtana mo. Minen lee, ɗume min poti faa ŋurŋurtanon min?

⁸ Muusaa wi'i katin: — On paaman wo o Joomiraaɗo nde o hokkata on teewu faa nyaamon wakkati kiiral naange e buuru kaarnoowo wakkati beetee ndeen, sabo o nanii oɗon ŋurŋurtana mo. Minen le wo min moy'en? Wanaa minen ŋurŋurtanton, wo Joomiraaɗo.

⁹ Ndeen Muusaa haaldi e Haaruuna, wi'i: — Wi'u jamaare Israa'iila ndeen fuu wara yeeso Joomiraaɗo sabo o nanii ŋurŋurtugol maɓɓe.

¹⁰ Wakkati Haaruuna haaldannoo e jamaare Israa'iila fuu ndeen, ɓe njeeƴorii faro ladde yoornde de teddeengal Joomiraaɗo ɓangi nder ruulde.

¹¹ Joomiraaɗo haaldi e Muusaa, wi'i:

¹² — Mi nanii ŋurŋurtugol Israa'iila'en. Mbi'aa ɓe nii: «Hannden futuro, on nyaaman teewu. Subaka du, on kaaran buuru. Ndeen on paaman wo miin woni Joomiraaɗo, Laamɗo mooɗon.»

¹³ Wakkati kiiral naange, gerre njippii uddi hoɗorde ndeen fuu. Nde weetunoo fu, saawoore jippii dow nokkuure ndeen.

¹⁴ Nde saawoore solnoo fu, kujje cewɗe nannduɗe e mbakkoy gomma, na ɗuuɗi hono toɓɓe saawoore dow leydi.

¹⁵ Nde yimɓe Israa'iila nji'unoo ɗum fu, ƴamondiri, mbi'i: — Ɗume woni ɗum? Sabo ɓe anndaa ko ɗum laatii. Muusaa wi'i ɓe: — Ɗum wo buuru mo Joomiraaɗo hokki on faa nyaamon.

¹⁶ Inan ko Joomiraaɗo yamiri: Neɗɗo fuu suɓa haddi ko heƴata ɗum. Kooƴanon neɗɗo mooɗon gonɗo ley hukum mooɗon fuu fodde etirgal gootal.

¹⁷ Israa'iila'en ngaɗiri noon. Woɓɓe cuɓi faa heewi, woɓɓe du cuɓi seeɗa.

¹⁸ Ammaa nde ɓe etunoo teddeefi majjum fu, hooƴunooɓe faa heewi ɓeen tawi iɗum foti e ko kaajaa, hooƴunooɓe seeɗa ɓeen du tawi ɗum nyakaay ɗum'en. Mono fuu hooƴi haddi ko haajaa.

¹⁹ Muusaa wi'i ɓe: — Taa fay gooto resa ɗum faa weeta.

²⁰ Ammaa woɓɓe kaa kettindanaaki Muusaa. Ɓe ndesi seeɗa faa weeti. Nde ɓe pinnoo fu, ɓe tawi ɗum nyolii, ɗum waɗii gilƴi. Ndeen Muusaa tikkani ɓe sanne.

²¹ Gilla ndeen, subaka fuu, mono fuu ina suɓowa haddi ko heƴata ɗum tan, sabo si naange nyawlii fu, ɗum taayan.

²² Nyannde jeegoɓerde, ɓe cuɓi ko heƴata ɓe balɗe ɗiɗi, neɗɗo fuu etirɗe ɗiɗi. Mawɓe yimɓe ɓeen ngari kaalani ɗum Muusaa.

²³ Muusaa wi'i ɓe: — Inan ko Joomiraaɗo yamiri: Jaango wo nyalaande fowteteende seniinde, wo nde nyalaande seninanaande Joomiraaɗo. Ca'on ko ca'oton fuu, njongon ko njongoton fuu. Ko heddii du, ndeson ɗum faa weeta.

²⁴ Ɓe ndesi ɗum faa weeti hono no Muusaa yamiri noon. Ɗum nyolaay, ɗum waɗaay gilƴi.

²⁵ Ndeen Muusaa wi'i ɓe: Nyaamee ɗum hannden sabo hannden wo nyalaande Joomiraaɗo fowteteende. Hannden on tawataa ɗum yaasin fey.

²⁶ Ley balɗe jeegom fuu, oɗon mbaawi suɓude nyaamdu nduun, ammaa nyannde jeɗɗaɓerde ndeen wo nyannde fowteteende. Nyannde majjum tawan nyaamdu nduun walaa.

²⁷ Ammaa e noon fu, nyannde jeɗɗaɓerde ndeen Israa'iila'en woɓɓe njaltii hoɗorde njehi faa cuɓowa, de ɓe tawaay fay gootum.

²⁸ Joomiraaɗo wi'i Muusaa: — Faa ndeye celoton salaade ɗowtanaade jamirooje am e sariyaaji am?

²⁹ Paamee, wo miin Joomiraaɗo hokki on nyalaande fowteteende. Saabe ɗuum waɗi de kokkumi on nyannde jeegoɓerde nyaamdu heƴooru on faa waɗa balɗe ɗiɗi. De nyannde jeɗɗaɓerde kaa, mono e mooɗon fuu jooɗoo nokku muuɗum. Taa fay gooto mooɗon wurtoo.

³⁰ Israa'iila'en powti nyannde jeɗɗaɓerde ndeen.

³¹ Israa'iila'en inndiri nyaamdu nduun manna. Iɗum rawni hono gabbe daneeje, iɗum weli hono maasaaje gaɗiraaɗe njuumndi.

³² Muusaa wi'i: — Inan ko Joomiraaɗo yamiri: «Adee etirgal kebbinon ɗum manna de ndesanon ƴuwdi mooɗon faa ɓe nji'a nyaamdu ndu Joomiraaɗo hokki en nder ladde yoornde nde wurtinnoo en Misira ndeen.»

³³ Ndeen Muusaa wi'i Haaruuna: — Hooƴu fayennde, ngattaa manna, de ndesaa ɗum yeeso Joomiraaɗo faa ɗum heddoo saabe ƴuwdi mooɗon ley jamaanuuji garooji.

³⁴ Ndelle Haaruuna joƴƴini fayennde manna ndeen yeeso keesuwal Amaana faa ɗum heddoo ɗoon hono no Joomiraaɗo yamiri Muusaa noon.

³⁵ Yimɓe Israa'iila nyaami manna oon faa waɗi duuɓi 40. Ɓe nyaami ɗum gilla e ladde yoornde faa naatugol maɓɓe leydi Kanaana ɗo gure puɗɗi.

³⁶ Etirgal maɓɓe nyaamdu manna waɗi omere gooto (ɗum wo hono kilooji 2). Sappo maggal waɗan hanndeere mawnde wi'eteende efa.