Wurtagol 14 - Dewtere Laamɗo Fulfulde Burkina Faso

No yimɓe Israa'iila peƴƴiri maayo Maaliya

¹ Joomiraaɗo haaldi e Muusaa, wi'i:

² — Njamiraa Israa'iila'en njeccoo koɗowa ɗakkol Pi-Hayirot hakkunde Migdol e maayo manngo. Yeeso Ba'al-Sefon, ɗakkol maayo ɗoon koɗoton.

³ Fira'awna miiloto wi'a: «Yimɓe Israa'iila lallii ina njiiltoo ley leydi ndii. Ladde yoornde ommbii ɓe hono kasu nii.»

⁴ Mi yoornan ɓernde makko faa o rewta on. Ndeen innde am teddinte saabe ko ngaɗanmi Fira'awna e sordaasiiɓe muuɗum ɗuum. Noon Misirankooɓe fuu paamirta wo miin woni Joomiraaɗo. Israa'iila'en ngaɗiri noon.

⁵ Nde kaananke Misira e gollooɓe muuɗum kumpitanoo Israa'iila'en ndillii fu, mbayliti miilooji muɓɓen, mbi'i: — Ɗume woni ko ngaɗuɗen ɗum? Ko saabii accuɗen Israa'iila'en ndilli, njoppi gollande en?

⁶ Fira'awna segilii torkooru pucci muuɗum, yaadi e konunkooɓe muuɗum.

⁷ O hooƴi du torkooji pucci 600 ɓurɗi wooɗude ley torkooji pucci Misira fuu e mawɓe konunkooɓe dorbotooɓe ɗi.

⁸ Joomiraaɗo yoorni ɓernde Fira'awna kaananke Misira faa taaynita Israa'iila'en ɓeen. Tawi Israa'iila'en ɓeen mburtake leydi ndiin na njaha wo heɓtuɓe ko'e muɓɓen.

⁹ Misirankooɓe taayniri ɓe pucci e torkooji Fira'awna e waɗɗiiɓe pucci e konunkooɓe muuɗum fuu. Ɓe kewtii Israa'iila'en na koɗi ɗakkol Pi-Hayirot yeeso Ba'al-Sefon, ɗakkol maayo.

¹⁰ Nde Fira'awna ɓadinoo fu, Israa'iila'en ɓanti gite muɓɓen, nji'i Misirankooɓe ina ndewti ɗum'en. Ɓe kuli sanne, ɓe mbullitii Joomiraaɗo.

¹¹ Ɓe mbi'i Muusaa: — Yalla caabeeje ngalaa ley Misira de ngadduɗaa min ley ladde yoornde ɗo faa min maaya naa? Ɗume waɗi mburtinɗaa min Misira?

¹² Wanaa ɗuum waɗi de min mbi'unoo ma illa Misira toon, accaa min ngollana Misirankooɓe? Gollande Misirankooɓe na ɓurani min maayude ley ladde yoornde ndee.

¹³ Muusaa jaabii yimɓe ɓeen, wi'i: — Taa kulee. Ndaree wooɗa, on nji'an no Joomiraaɗo hisinirta on hannden. Sabo Misirankooɓe ɓe nji'oton hannden ɓe, on nji'ataa ɓe katin faa abada.

¹⁴ Joomiraaɗo e hoorem honanta on. Onon kaa ndeƴƴinee tan.

¹⁵ Ndeen Joomiraaɗo ƴami Muusaa wi'i: — Ko waɗi aɗa wullitoo kam mi walle? Wi'u Israa'iila'en ummoo njokka laawol muɓɓen.

¹⁶ Ɓantu sawru maaɗa de poortaa junngo maa dow maayo faa ndiyam ɗam feccoo, faa Israa'iila'en keɓa njaaɓa dow leydi njoorndi, peƴƴa maayo ngoon.

¹⁷ Mi yoornan ɓerɗe Misirankooɓe faa ɓe njokka on. Innde am teddinte saabe ko ngaɗanmi Fira'awna e konunkooɓe muuɗum e torkooji pucci muuɗum e waɗɗiiɓe pucci muuɗum fuu ɗuum.

¹⁸ Misirankooɓe paaman miin woni Joomiraaɗo, nde keɓoymi teddeengal dow Fira'awna e dow torkooji pucci muuɗum e waɗɗiiɓe pucci muuɗum fuu.

¹⁹ Ndeen maleyka Laamɗo gonnooɗo yeeso Israa'iila'en oon, soƴƴii hetti gaɗa maɓɓe. Noon du, ruulde nanndunde e bimmbeere ndeen ƴuwiri yeeso maɓɓe, yehi wonowi caggal maɓɓe.

²⁰ Nde woni hakkunde hoɗorde Misirankooɓe e hoɗorde Israa'iila'en. Ruulde ndeen waɗa nimre to Misirankooɓe, ammaa to Israa'iila'en kaa, nde waɗa annoora. Ɗum waɗi de koɗorɗe ɗiɗi ɗeen keɓaay ɓattondirde ley jemma oon fuu.

²¹ Muusaa foorti junngo muuɗum dow maayo ngoon. Joomiraaɗo waɗi henndu mawndu ƴuurundu lettugal wifi ley jemma oon fuu faa ndu foottina ndiyam ɗaam, yoppa leydi njoorndi. Ndiyam ɗaam feccii.

²² Israa'iila'en keɓi peƴƴi maayo ngoon dow leydi njoorndi. Ndiyam ɗaam du laatanii ɓe kokuuji, faro nyaamo maɓɓe e faro nano maɓɓe fuu.

²³ Misirankooɓe njokkii ɓe. Pucci Fira'awna e torkooji pucci muuɗum e waɗɗiiɓe pucci muuɗum fuu njokki ɓe ley maayo toon.

²⁴ Nde ɓadinoo weetude fu, Joomiraaɗo heddii faa dow iilde yiite e ruulde nannduɗe e bimmbeeje toon. O ndaari konunkooɓe Misira, o jiiɓi ɗum'en.

²⁵ O bonni taare torkooji maɓɓe faa ɗe mbaawa reggude katin. Misirankooɓe mbi'i: — En ndogga, ndillen faa ndaɗen sabo Joomiraaɗo e hoorem wallata Israa'iila'en ɓeen na kaɓda e meeɗen!

²⁶ Ndeen Joomiraaɗo wi'i Muusaa: — Foortu junngo maa dow maayo faa ndiyam ɗaam hawrita dow Misirankooɓe e dow torkooji muɓɓen e dow waɗɗiiɓe pucci muɓɓen ɓeen fuu.

²⁷ Muusaa foorti junngo muuɗum dow maayo. Nde weetunoo fu maayo warti hono no worrunoo. Tawi Misirankooɓe ina ndoggannoo ley toon. Ɓe kawri e ndiyam ɗaam. Joomiraaɗo faɗɗi ɓe ley maayo ngoon.

²⁸ Diyeele ɗeen ngarti uddi torkooji pucci e waɗɗiiɓe pucci e konunkooɓe Fira'awna ɓeen ɗum woni taaynunooɓe yimɓe Israa'iila ley maayo ɓeen fuu. Fay gooto maɓɓe daɗaay.

²⁹ Israa'iila'en kaa peƴƴi maayo ngoon dow leydi njoorndi. Ndiyam ɗaam du laatanii ɓe kokuuji, faro nyaamo maɓɓe e faro nano maɓɓe fuu.

³⁰ Wo noon Joomiraaɗo danniri Israa'iila'en e baawɗe Misirankooɓe nyannde ndeen. Israa'iila'en nji'i Misirankooɓe maayɓe ina mbaalii daande maayo.

³¹ Ɓe nji'i baawɗe mawɗe ɗe Joomiraaɗo waɗi dow Misirankooɓe fuu de ɓe kuli Joomiraaɗo. Ɓe koolii Joomiraaɗo kam e maccuɗo muuɗum Muusaa.