Wurtagol 1 - Dewtere Laamɗo Fulfulde Burkina Faso

No Israa'iila'en laatorii maccuɓe ley leydi Misira

¹ Inan inɗe ɓiɓɓe Israa'iila naadduɓe e Yaakuuba leydi Misira:

² Ruben e Simeyon e Lewi e Yahuuda

³ e Isakar e Jabulon e Benjamin

⁴ e Dan e Naftali e Gad e Aser. Mono e maɓɓe fuu yaadi e koreeji muuɗum.

⁵ Ƴuwdi Yaakuuba wo yimɓe 70. Tawi Yuusufi kaa ina woni leydi Misira.

⁶ Caggal ɗuum, Yuusufi e sakiraaɓe muuɗum e yimɓe jamaanu muuɗum ɓeen fuu maayi.

⁷ Yimɓe Israa'iila ndimi, ɗuuɗi sanne. Ɓe ɓeydii, ɓe ɗuuɗi sanne, semmbe maɓɓe du ɓeydii. Ɓe keewi e leydi ndiin fuu.

⁸ Wakkati oon kaananke goɗɗo mo anndaano Yuusufi laamii leydi Misira.

⁹ O wi'i yimɓe makko: — Inan yimɓe Israa'iila wo lenyol ɓurngol lenyol meeɗen ɗuuɗude e semmbe.

¹⁰ Ndelle, ina haani kakkilen, ngaɗen dabare faa kaɗen ɓe ɓeydaade katin. Sabo si en kaɓdii e wayɓe men fu, iɓe mbaawi heedande ɓeen, ɓe kaɓda e meeɗen de ɓe ndilla leydi meeɗen.

¹¹ Ndeen yimɓe Misira cuɓii hooreeɓe golleeji tiiɗɗi faa ngollina Israa'iila'en golleeji naawɗi. Israa'iila'en ngaɗaa nyiɓani Fira'awna kuɓeeje desirɗe nguurey, ɗeen ngoni Pitom e Ramses.

¹² Ammaa no Misirankooɓe tampiniri ɓe fu, wo noon ɓe ɓeydorii ɗuuɗude, noon du ɓe ɓeydorii sankitaade. Saabe ɗuum de Israa'iila'en mbemmbi Misirankooɓe sanne.

¹³ Ndeen yimɓe Misira ngollini Israa'iila'en golleeji maccungaaku.

¹⁴ Ɓe mettiniri nguurndam muɓɓen e golleeji tiiɗɗi. Ɓe ndoolɗi Israa'iila'en ngaɗa loope e pereeje e golleeji gese, e sii golle tiiɗɗe fuu.

¹⁵ Fira'awna kaananke Misira haaldi e rewɓe rimtinooɓe deekiraaɓe Ibraninkooɓe ɓeen. Gooto maɓɓe ina wi'ee Sifira, gooto du Puwa.

¹⁶ O wi'i ɓe: — Nde ndimtinɗon rewɓe Ibraninkooɓe fu, ndaaron wooɗa, si wo ɓiɗɗo gorko fu, mbaron ɗum, si wo ɓiɗɗo debbo, accon ɗum wuura.

¹⁷ Ammaa rimtinooɓe ɓeen wo hulooɓe Laamɗo. Ɓe ngaɗaay ko kaananke Misira oon wi'i ɓe ɗuum. Ɓe acci cukaloy ngoroy kooy mbuuri.

¹⁸ Ndeen kaananke Misira oon noddi ɓe, ƴami: — Ko waɗi ngaɗuɗon nii? On accii cukaloy ngoroy kooy na mbuuri?

¹⁹ Rimtinooɓe ɓeen njaabii Fira'awna, mbi'i: Rewɓe Ibraninkooɓe nganaa hono rewɓe Misirankooɓe. Wo ɓe rewɓe semmbiɗinɓe. Ndimu tiiɗaa ɓe sanne. Wo ɓe ndiman gilla dimtinoowo yottaaki.

²⁰ Laamɗo barkini rimtinooɓe ɓeen. Yimɓe Israa'iila ɓeydii heewude, ngaɗi semmbe du.

²¹ Saabe ko rewɓe rimtinooɓe ɓeen kuli Laamɗo ɗuum, Laamɗo hokki ɓe ƴuwdi.

²² Wooɗi Fira'awna yamiri yimɓe muuɗum fuu, wi'i: — Ɓii Ibraninkeejo gorko dimaaɗo hakkunde mooɗon fu, paɗɗon ɗum ley maayo Nil, ammaa accon cukaloy ndewoy kooy kaa mbuura.