Tindinoowo 11 - Dewtere Laamɗo Fulfulde Burkina Faso

Haala nafaa gollirde ciinal

¹ Neldaa nyaamdu maa dow maayo, sabo si juutii neeɓii fu a hewtowan barke majjum.

² Peccaa jawdi maaɗa, njeɗaa yimɓe njeɗɗo naa njeetato sabo a anndaa bonanda garoowo dow leydi.

³ Si duule ɓawlinii fu, ƴuwoonde toɓan dow leydi. Si lekki saamii to ki huccitii fu, wo toon ki heddotoo, nde wo soɓɓiire, nde wo horɗoore.

⁴ Ndaaroowo henndu aawataa, ndaaroowo duule du taƴataa.

⁵ No a anndiraa to henndu fonndii noon, maa du, no ɓinngel mawnirta ley reedu innum, noon du walaa no anndirtaa golle Laamɗo taguɗo huunde fuu oon.

⁶ Si weetii fu aawaa aawre maa, si hiirii du taa ŋottin juuɗe maa, sabo a anndaa ndiye woni puɗoori, ndii ɗo naa ndii to, naa yalla ndi fuu ndi wooɗan.

Haala wuurdude no haaniri

⁷ Jayngol na muuyni, gite du na ceyoroo yi'ude naange.

⁸ No duuɓi neɗɗo poti ɗuuɗude fu, weltoo haddi majji fuu, de taa yeggita nyalaaɗe nimre ɗeen du na keewi, ko waroyta ɗuum kaa fuu wo ɓolum.

⁹ Hey jokolle, mbeltoɗaa ley njokollaaku maaɗa fuu, njokkaa ko weli ɓernde maa e ko gite maa nji'i na njiɗi fuu, ammaa taa njeggitaa Laamɗo kiitotooɗo oon ƴamoyte ko ngaɗuɗaa fuu.

¹⁰ Taa mettinaa ɓernde maa, taa tampinaa terɗe maa, sabo njokollaaku e semmbe muuɗum fuu wo ɓolum tan.