Limle 31 - Dewtere Laamɗo Fulfulde Burkina Faso

Wolde Israa'iila e Madiyankooɓe

¹ Joomiraaɗo haaldi e Muusaa wi'i: —

² Njomnitoɗaa Madiyankooɓe bone mo ngaɗi Israa'iila'en oon, de sakitoo kawritowaa e maamiraaɓe maaɗa.

³ Muusaa haaldi e jamaare Israa'iila ndeen wi'i: — Ittee worɓe hakkunde mooɗon cegilano yaade konu. Ɓe njaha ɓe kaɓdowa e Madiyankooɓe faa Joomiraaɗo yoɓtoo ɗum'en.

⁴ Ley lenyol Israa'iila gootol fuu itton worɓe ujune (1.000) yahooɓe konu oon.

⁵ Worɓe ujunaaje sappo e ɗiɗo (12.000) cegilanaa (ɗum woni ujunere ujunere ley lenyi Israa'iila 12 ɗiin) faa njaha kaɓdowa e Madiyankooɓe.

⁶ Muusaa yaari ɓe fuu konu oon. Lenyol fuu sordaasiiɓe ujune (1.000). Almaami Pinehas ɓii Eliyajar kam ɗowtiri ɓe. Pinehas oon kam tiigii kujje gonɗe ley nokkuure seniinde e luwe puufanteeɗe segilanaade konu ɗeen fuu.

⁷ Ɓe njehi ɓe konowi Madiyankooɓe fodde no Joomiraaɗo yamirnoo Muusaa de ɓe mbari worɓe muɓɓen fuu.

⁸ Tawti kaanankooɓe Madiya njoyo ɗum woni Ewi e Rekem e Suur e Huur e Reba. Ɓe mbardi Balaama ɓii Beyor oon du kaafaahi.

⁹ Israa'iila'en ngaɗi rewɓe Madiyankooɓe e ɓiɓɓe muɓɓen fuu kasunkooɓe. Ɓe kooƴi cogge daabaaji muɓɓen e jawdi muɓɓen fuu.

¹⁰ Ɓe mbuli kuɓeeje Madiyana e koɗorɗe muuɗum fuu.

¹¹ Ndeen ɓe ngartidi e yimɓe e daabaaji ko ɓe teetowi.

¹² Ɓe ngaddi kasunkooɓe ɓeen e ko ɓe njanowi Madiyana fuu yeeso Muusaa e almaami Eliyajar e jamaare Israa'iila fuu ley njaayri Mo'ab, daande Urdun ɗakkol ƴeenyirde Yeriko.

¹³ Muusaa e almaami Eliyajar e jamaare ardiiɓe cuuɗi Israa'iila fuu mburtii faa kawra e maɓɓe.

¹⁴ Ndeen Muusaa ɓernani ardiiɓe konunkooɓe mawɓe e famarɓe ƴuuruɓe konu ɓeen fuu.

¹⁵ O wi'i ɓe: — Ko saabii de accidinɗon rewɓe ɓee fuu yonkiiji?

¹⁶ Oɗon anndi wo kamɓe e ley tindingo Balaama caabaninoo Israa'iila'en waɗude ko boni yeeso Joomiraaɗo wakkati kabaaru Peyor ndeen, de saabe ɗuum masiiba saami dow yimɓe Joomiraaɗo.

¹⁷ Ndelle joonin, sey mbaron sukaaɓe worɓe, e rewɓe ɓaŋanooɓe fuu.

¹⁸ Ɓiɓɓe rewɓe ɓe anndaa worɓe tan njeyɗon accande ko'e mooɗon.

¹⁹ Wooɗi du onon ɓeen, keddoɗon yaasin hoɗorde faa waala balɗe jeɗɗi. Onon warɓe woɓɓe e meemuɓe maayɓe, sey laaɓinon ko'e mooɗon nyalaande tataɓerde e jeɗɗaɓerde. Yamiroore ndeen na woodani fay kasunkooɓe mooɗon ɓeen.

²⁰ Noon du, laaɓinirton kaddule e kujje gaɗiraaɗe guri e ɗe leeɓi be'i e ko waɗiraa leɗɗe fuu.

²¹ Almaami Eliyajar wi'i worɓe yahunooɓe konu ɓeen: — Inan jamirooje ɗe Joomiraaɗo hokki Muusaa:

²² Kujje ɗe yiite waawaa bonnude, ɗum woni kaŋŋe e cardi e njamndi ɓaleeri e njamndi mboɗeeri e fuufaa e njamndi alahan,

²³ fuu laaɓiniree yiite de caggal ɗuum tummbee ley ndiyam ceninoojam. Ko yiite waawi bonnude du, cuuwon ɗum ley ndiyam ceninoojam ɗaam.

²⁴ Lonnon kaddule mooɗon nyalaande jeɗɗaɓerde ndeen faa laaɓon, de caggal ɗuum, ngarton ley hoɗorde.

No ɓe pecciri ko honowaa ɗuum

²⁵ Joomiraaɗo haaldi e Muusaa wi'i: —

²⁶ Aan e almaami Eliyajar, ardiiɓe cuuɗi Israa'iila mballa on limon yimɓe e daabaaji ko konunkooɓe ɓeen ngartidi fuu.

²⁷ Peccaa ɗum pecce ɗiɗi de kokkaa honoynooɓe ɓeen feccere, Israa'iila'en heddiiɓe du feccere.

²⁸ Ittanaa Joomiraaɗo ley ngeɗu honoynooɓe ɓeen: ley yimɓe 500 fuu neɗɗo gooto, ley daabaaji 500 fuu ndaaba ngoota.

²⁹ Itton ley ngeɗu konunkooɓe de kokkon almaami Eliyajar e innde Joomiraaɗo.

³⁰ Feccere Israa'iila'en ndeen du, ley yimɓe 50 fuu itton neɗɗo gooto, wooɗi ley na'i maa araaji maa baali e daabaaji keddiiɗi ɗiin du fuu ngaɗiraa noon. Kawrondinaa ɗum fuu de kokkaa Lewinkooɓe haybooɓe hukum Joomiraaɗo ɓeen.

³¹ Muusaa e almaami Eliyajar ngaɗi ko Joomiraaɗo yamiri ɗuum.

³² Inan ko heddi e ko honoynooɓe ɓeen ngartidi: Dammuuli ujunaaje keme jeegom e capanɗe jeɗɗi e joy (675.000),

³³ Na'i ujunaaje capanɗe jeɗɗi e ɗiɗi (72.000),

³⁴ Araaji ujunaaje capanɗe jeegom e go'o (61.000),

³⁵ Ɓiɓɓe rewɓe ɓe anndaa worɓe ujunaaje capanɗe tati e ɗiɗo (32.000).

³⁶ Feccere hokkaande konunkooɓe wo: Ley dammuuli ujunaaje keme tati e capanɗe tati e jeɗɗi e keme joy (337.500),

³⁷ ko ittanaa Joomiraaɗo wo 675.

³⁸ Ley na'i ujunaaje capanɗe tati e jeegom (36.000), ko ittanaa Joomiraaɗo wo 72.

³⁹ Ley araaji ujunaaje capanɗe tati e keme joy (30.500), ko ittanaa Joomiraaɗo wo 61.

⁴⁰ Ley yimɓe ujunaaje sappo e njeegom (16.000) ɓeen, ittanaaɓe Joomiraaɗo wo 32.

⁴¹ Muusaa hokki almaami Eliyajar ko Joomiraaɗo ittanaa ɗuum fodde no Joomiraaɗo yamirnoo waɗiree noon.

⁴² Caggal konunkooɓe kokkaama ngeɗu muɓɓen fu, Muusaa hokki Israa'iila'en heddiiɓe ɓeen du ngeɗu muɓɓen. Ɗum woni:

⁴³ Dammuuli ujunaaje keme tati e capanɗe tati e jeɗɗi e keme joy (337.500),

⁴⁴ Na'i ujunaaje capanɗe tati e jeegom (36.000),

⁴⁵ Araaji ujunaaje capanɗe e keme joy (30.500),

⁴⁶ Ɓiɓɓe rewɓe ɓe anndaa worɓe ujunaaje sappo e njeegom (16.000).

⁴⁷ Ndelle ley yimɓe 50 fuu Muusaa itti neɗɗo gooto, wooɗi du, ley na'i maa araaji maa dammuuli maa daabaaji keddiiɗi fuu o waɗiri noon. O hawrondini ɗum fuu, o hokki Lewinkooɓe haybooɓe Hukum Joomiraaɗo ɓeen, fodde no o yamiranoo noon.

⁴⁸ Ndeen ardiiɓe konunkooɓe mawɓe e famarɓe ɓeen kawriti to Muusaa

⁴⁹ de mbi'i ɗum: — Min kiisake sordaasiiɓe yaaɓe konu ɓeen, fay gooto nyakaay.

⁵⁰ Ngam majjum min ngaddani Joomiraaɗo dokke kaŋŋe mo min keɓowi faa hakkeeji amin mooytee. Ɗum woni koɗi e jawe e kootonɗe maandinirɗe e ɗe noppi e kujje feere feere gaɗiraaɗe kaŋŋe.

⁵¹ Muusaa e almaami Eliyajar njaɓi kujje gaɗiraaɗe kaŋŋe ɗe ɓe ngaddi ɗeen.

⁵² Kaŋŋe mo ardiiɓe konunkooɓe mawɓe e famarɓe ittani Joomiraaɗo oon fuu wo kilooji 170.

⁵³ Tawi sordaasiiɓe ɓeen, mono fuu wo hoore muuɗum hooƴannoo.

⁵⁴ Muusaa e almaami Eliyajar njaɓi kaŋŋe mo ɓe ngaddi oon. Ɓe njaari ɗum ley hukum Ceniiɗo faa ɗum miccintina Joomiraaɗo Israa'iila'en.