Limle 25 - Dewtere Laamɗo Fulfulde Burkina Faso

No Israa'iila'en cujidirani tooru Ba'al

¹ Israa'iila jooɗii nokkuure wi'eteende Sittim. Ɗoon ɓe puɗɗi fijidinde e surbaaɓe Mo'ab.

² Surbaaɓe ɓeen na mbaantoo ɓe sadakaaji ɗi ngaɗanta allaaji muɓɓen. Iɓe nyaamda e muɓɓen wooɗi du, iɓe cujidana allaaji ɗiin.

³ Ɓe njokki tooru Ba'al ndu Peyor, ɗuum ummini ɓernde Joomiraaɗo dow maɓɓe.

⁴ Joomiraaɗo wi'i Muusaa: — Njorfa ɓoggi e daaɗe hooreeɓe cuuɗi Israa'iila'en fuu yeeso am iɓe kucciti e naange faa tikkere am ndeen tottitoo Israa'iila.

⁵ Muusaa haaldi e sarotooɓe Israa'iila wi'i ɗum'en: — Mono e mooɗon fuu, wara hooreeɓe cuuɗi Israa'iila hokkuɓe ko'e muɓɓen tooru Ba'al ndu Peyor nduun!

⁶ Wakkati Israa'iila'en mbullitotonoo dammbugal Hukum Ceniiɗo ndeen, Israa'iilanke gooto yottodii e surbaajo Madiyanke, holli sakiraaɓe muuɗum yeeso Muusaa e gite jamaare Israa'iila fuu.

⁷ Almaami Pinehas ɓii Eliyajar taan Haaruuna ummodii e labbo hakkunde jamaare ndeen,

⁸ riiwi Israa'iilanke oon faa hewti hukum toon de yuwi ɓe ɗiɗo fuu. Debbo oon kaa o yuwi ɗum reedu. Ndeen masiiba caamannooɗo dow Israa'iila'en oon darii.

⁹ Tawi ɗum warii yimɓe ujunaaje noogay e nayo (24.000).

¹⁰ Joomiraaɗo haaldi e Muusaa wi'i: —

¹¹ Almaami Pinehas ɓii Eliyajar taan Haaruuna tottinii jukkungo am ngoon dow Israa'iila'en ko hirani kam hakkunde maɓɓe ɗum. Wo ɗuum haɗi kam halkude ɓe ɓe fuu wakkati tikkannoomi ɓe ndeen.

¹² Saabe majjum mbi'aa o mi hokkii o amaana am gaddoowo jam.

¹³ Amaana oon na woodani mo kanko e taaniraaɓe makko fuu, amaana tabintinoowo almaamaaku maɓɓe. Saabe o hiranii Laamɗo makko de o mooytani Israa'iila hakke mo ronndinoo oon.

¹⁴ Israa'iilanke baridaaɗo e surbaajo oon wo Simri ɓii Saalu, hooreejo lenyol Simeyon.

¹⁵ Surbaajo Madiyanke oon du wo Kosbi ɓii Suur, gooto e hooreeɓe cuuɗi Madiyana.

¹⁶ Joomiraaɗo haaldi e Muusaa wi'i: —

¹⁷ Kippee Madiyankooɓe, mbaron ɗum'en.

¹⁸ Ngaɗee noon sabo ɓe toonyorake on jambuuji maɓɓe ɗi ɓe ngaɗi ley Peyor, tawti kabaaru Kosbi ɓii hooreejo Madiyana sakiike maɓɓe baraaɗo nyannde jukkungo Israa'iila ley Peyor.

Limgal ɗiɗaɓal

¹⁹ Caggal masiiba oon,