Limle 24 - Dewtere Laamɗo Fulfulde Burkina Faso

¹ Balaama faami Joomiraaɗo na haajaa barkinde Israa'iila. Saabe ɗuum o waɗaay dabarankaaku makko hono no arande noon. O wayliti o ƴeewi ladde ndeen.

² O ndaari, o tawi Israa'iila'en na koɗiri lenyol lenyol. Ruuhu Laamɗo jippii dow makko.

³ O waɗi annabaaku, o wi'i: Konngol Balaama ɓii Beyor, Konngol gorko mo yitere feertiinde,

⁴ Konngol nanoowo haalaaji Laamɗo, Ji'oowo ko Jom Baawɗe holli ɗum si hofake de gite muuɗum na peerti:

⁵ Hukumuuji maaɗa na mbooɗi, Yaakuuba! Cuuɗi maaɗa wo lobbi, Israa'iila.

⁶ Iɗi nandi e gooruuji juutuɗi, hono sardiŋeeji daande maayo, hono leɗɗe alowe ɗe Joomiraaɗo darni, hono leɗɗe seddere hunnduko ndiyam.

⁷ Ndiyam cawle maɓɓe heewi faa na rufa, Iɗam yarna gese faa wooɗa. Kaananke makko na ɓuri kaananke Agag. Teddeengal laamu makko na yaara yeeso.

⁸ Laamɗo wurtini mo Misira, imo jogii semmbe ngaari ladde. Imo seeka leyɗe kabdooje e makko. Imo hela ƴi'e muɓɓen, imo yuwira ɓe kure.

⁹ O ɗuppinto o waaloo hono laddeeru, Maa laddeeru rewru, moy waawi umminde ndu? Barke woodana barkinɗo ma, bone du woodana kuɗuɗo ma!

¹⁰ Ndeen Balak ɓernani Balaama sanne. O hellondiri juuɗe makko de o wi'i: — Mi noddii ma faa kuɗanaa kam ɓe ammaa nii woni kile tati aɗa hebbina ɓe barke!

¹¹ Ndelle yecca leydi maaɗa! Miɗo anniyiinoo teddinde ma teddeengal manngal ammaa Joomiraaɗo hokkaay ma ngal.

¹² Balaama jaabii mo wi'i: — Yalla mi haalanaayno nelaaɓe maaɗa ɓeen, mbiimi ɗum'en

¹³ fay si kokkuɗaa kam kaŋŋe e cardi suudu maaɗa fuu, mi waawaa luttude konngol Joomiraaɗo de mi waɗa ko wooɗi maa ko boni naa? Ko Joomiraaɗo holli kam tan kaalanmi.

¹⁴ Wooɗi joonin, mi yeccoto leydi am. Ngaraa mi haalane no yimɓe ɓeen ngaɗoyta yimɓe maaɗa ley ko waroyta.

No Balaama barkiniri Israa'iila nayaɓerde

¹⁵ Ndeen o waɗi annabaaku, o wi'i: Konngol Balaama ɓii Beyor, Konngol gorko mo yitere feertiinde,

¹⁶ Konngol nanoowo haalaaji Laamɗo, Gooduɗo anndal Laamɗo Toowɗo, Ji'oowo ko Jom Baawɗe holli ɗum, kofotooɗo e leydi de gite muuɗum na peerti.

¹⁷ Miɗo yi'a mo de wanaa joonin. Miɗo ndaara mo de wanaa to ɓadii. Hoodere wurtoto e Yaakuuba, Sawru laamu yaltan e Israa'iila. Indu hela le'e ko'e yimɓe Mo'ab, e tiiɗe ɓiɓɓe Siita.

¹⁸ Edom laatoto leydi njaalaandi, Seyir du, wayɓe njaaloto ɗum. Israa'iila golliran semmbe muuɗum.

¹⁹ Jaltoowo e Yaakuuba laamoto, de halka kedde huɓeere ndeen fuu.

Annabaaku Balaama dow wayɓe Israa'iila

²⁰ Balaama yi'i Amalek de waɗi annabaaku, wi'i: Amalek, ngo'aɓirdi e leyɗe, Cakitte maaɗa wo halkere.

²¹ Caggal ɗuum, o yi'i Keniyankooɓe de o waɗi annabaaku katin, o wi'i: Suudu maaɗa na semmbiɗi, nyimngo maaɗa na darii dow hayre.

²² Ammaa wo ɗum nyaamdu yiite, wooɗi du Asuura wattan on e maccungaaku.

²³ Katin o waɗi annabaaku makko, o wi'i: Wayyoo! Moy waawi wuurude caggal ko Laamɗo waɗata ɗuum?

²⁴ Laanaaji ndiyam ƴuuran Kittim, de ngaɗa Asuura ko boni, ɓe njukkoo Eber du ɓe kalka ɗum.

²⁵ Caggal ɗuum Balaama yeccii hooti. Balak du, adi laawol muuɗum.