Limle 20 - Dewtere Laamɗo Fulfulde Burkina Faso

No ndiyam wurtorii e hayre Meriba

¹ Yimɓe Israa'iila fuu njottii ladde Sin ley lewru go'aɓurdu. Ɓe koɗi Kaades. Ɗoon Mariyama maayi de uwaa.

² Wakkati oon ɓe kunngii ndiyam de yimɓe fuu kawriti muurtani Muusaa e Haaruuna.

³ Ndeen ɓe pilii haɓdude e Muusaa iɓe mbi'aa: — Woowoy! Tawee min maayduno e sakiraaɓe amin yeeso Joomiraaɗo!

⁴ Ko saabii de ngadduɗon yimɓe Joomiraaɗo ley ladde ndee, naa faa kanton min, minen e dammuuli amin?

⁵ Ko saabii de ndillinɗon min Misira, ngadduɗon min nokkuure bonnde ndee? Ndee wanaa nokkuure jaɓoore aaweede gawri maa ƴibbe maa cabiije maa rummaneeje, nde walaa fay ndiyam ko yaree.

⁶ Muusaa e Haaruuna njoppi yimɓe ɓeen de njehi kofowii dammbugal hukum Ceniiɗo. Ndeen teddeengal Joomiraaɗo ɓangani ɓe.

⁷ Joomiraaɗo wi'i Muusaa: —

⁸ Hooƴu sawru maaɗa de aan e sakiike maaɗa Haaruuna kawrondinon jamaare Israa'iila. Kaaldon e hayre yeeso maɓɓe de nde yaltinana on ndiyam. Njaltinaa ndiyam e mayre faa ɓe njara, kamɓe e dammuuli maɓɓe fuu.

⁹ Muusaa hooƴi sawru nduun yeeso Joomiraaɗo fodde no wiiraa.

¹⁰ Kanko e Haaruuna ɓe kawrondini Israa'iila'en fuu ɗakkol hayre ndeen de o wi'i ɓe: — Kettinee onon muurtooɓe! Yalla min mburtinana on ndiyam e hayre ndee naa?

¹¹ Muusaa ɓanti junngo muuɗum de fiiri hayre ndeen sawru ndu tiigii nduun kile ɗiɗi. Ndiyam yaltirii semmbe. Israa'iila'en njari kam'en e dammuuli muɓɓen fuu.

¹² Ammaa Joomiraaɗo wi'i Muusaa e Haaruuna: — Saabe on koolaaki kam, on ndaardaay kam mi ceniiɗo yeeso Israa'iila'en, wanaa onon nannata yimɓe ɓee leydi ndi kokkumi ɗum'en ndiin.

¹³ Diyeele ɗeen inndirtee Meriba (ɗum na fiirta muurtere). Wo ɗoon Israa'iila'en muurtani Joomiraaɗo de kam du holli ɓe innde muuɗum seniinde.

No Edominkooɓe caloranii Israa'iila'en faltaade

¹⁴ Nde ɓe ngonnoo Kaades ndeen, Muusaa waɗi nelaaɓe njaha to kaananke Edom mbi'a ɗum: — Inan ko sakiike maaɗa Israa'iila wi'i: Aɗa anndi tampiri ndi min kawri fuu.

¹⁵ Maamiraaɓe amin njehiinoo leydi Misira ko ɓooyi. Min mbuuri toon duuɓi keewɗi ammaa Misirankooɓe torrii min sanne, minen e maamiraaɓe amin fuu.

¹⁶ Ndeen min mbullitii Joomiraaɗo de nani bojji amin. O neli maleyka wurtini min leydi Misira. Inan miɗen ngoni Kaades, galluure wonnde keerol leydi maaɗa.

¹⁷ Ndelle miɗo ŋaare accaa min peccita leydi maaɗa min paltoo. Min ndewataa ley gese demeteeɗe e gese cabiije fuu. Min njarataa fay ndiyam ɓulli mooɗon. Min ndewan laawol manngol tan, min celirtaa nano maa nyaamo faa min paltoo leydi maaɗa.

¹⁸ Kaananke Edom jaabii ɓe wi'i: — On peccitataa leydi am. Si on ciini du, min kawridan e mooɗon kaafaaje.

¹⁹ Israa'iila'en mbi'i mo: — Laawol manngol tan min ndewata min paltoo. Si minen maa fay dammuuli amin njarii ndiyam mooɗon fu, min njoɓan on. Ko min ŋaarotoo on woni accon min paltoo e koyɗe amin.

²⁰ Ammaa kaananke Edom jaabii ɓe wi'i: — On peccitataa leydi am! Ndeen Edominkooɓe kawridi e maɓɓe semmbe mawɗo e konunkooɓe ɗuuɗɓe.

²¹ Noon kaananke Edom saloranii Israa'iila'en feƴƴitinde leydi muuɗum, Israa'iila'en du mboɗɗii mo.

Maayde Haaruuna

^22-23 Jamaare Israa'iila ndeen dilli Kaades, yehi waamnde Hor keerol leydi Edom. Joomiraaɗo wi'i Muusaa e Haaruuna: —

²⁴ Haaruuna hawritowan e maamiraaɓe muuɗum. O heɓataa naatude leydi ndi podaniimi on ndiin ngam on ɗowtanaaki haala am to diyeele Meriba.

²⁵ Ndelle ƴeenyidaa e Haaruuna e ɓiyum Eliyajar waamnde Hor.

²⁶ Ittaa kaddule makko de ɓornaa ɗe ɓiyiiko sabo wo toon o heddotoo.

²⁷ Muusaa waɗi ko Joomiraaɗo yamiri ɗuum. Yeeso jamaare Israa'iila'en fuu, o dillidi e Haaruuna e ɓiyum o yaari ɗum'en dow waamnde Hor.

²⁸ Muusaa ɓorti kaddule Haaruuna de ɓorni ɗe Eliyajar. Haaruuna maayi dow waamnde toon. Muusaa e Eliyajar njippii.

²⁹ Israa'iila'en fuu paami Haaruuna maayii de mboyiri ɗum balɗe 30.