Limle 12 - Dewtere Laamɗo Fulfulde Burkina Faso

No Mariyama e Haaruuna peliri Muusaa

¹ Mariyama e Haaruuna puɗɗi felude Muusaa saabe ɓaŋii debbo jeyaaɗo leydi Etiyopi.

² Ɓe mbi'i: — Yalla Muusaa tan Joomiraaɗo haaldi naa? Ndelle, o haaldaay e meeɗen enen kaa naa? Joomiraaɗo nani ko ɓe mbi'i ɗuum.

³ Tawi, Muusaa wo neɗɗo leeƴinkiniiɗo sanne mo hono muuɗum e leeƴinkinaare walaa ley duuniyaaru.

⁴ Wakkati oon pay Joomiraaɗo haaldi e Muusaa e Haaruuna e Mariyama, wi'i ɗum'en: — On tato fuu ngaron hukum Ceniiɗo toon. Ɓe ngari ɓe tato fuu.

⁵ Joomiraaɗo ɓangi ley ruulde, darii dammbugal hukum ɗoon, noddi Haaruuna e Mariyama ɓattoo.

⁶ O wi'i ɓe: — Kettindee ko kaalanammi on joonin ɗum: Si annabaajo na woodi hakkunde mooɗon fu, wo e ley holleede kollirammi ɗum hoore am, maa du e ley koyɗol kaaldirammi e muuɗum.

⁷ Ammaa Muusaa maccuɗo am, ɓurɗo hoolnaade ley suudu am fuu oon kaa, wanaa noon min ngondiri.

⁸ Miɗo haalda e muuɗum hunnduko e hunnduko, wanaa e holleede maa e ley sirri. Imo yi'a alhaali am. Ndelle, ko saabii de cuusuɗon felude maccuɗo am Muusaa?

⁹ Joomiraaɗo tikki sanne, dilli yoppi ɓe.

¹⁰ Nde ruulde ndeen dillunoo dow hukum oon fu, nyawu nguru nanngi Mariyama. Nguru makko rawni far hono haabu. Haaruuna yeeƴi ndaari mo, tawi o nyawrii nguru.

¹¹ Ndeen Haaruuna ŋaarii Muusaa, wi'i: — Joomam, miɗo ŋaare, taa accu hakke mo min ngaɗiri puuyndam oon saama dow ko'e amin.

¹² Taa ɓanndu Mariyama laatoo hono ɓanndu ɓinngel ngel rimdaaka e yonki, puɗɗungel nyolude.

¹³ Muusaa ƴepti daande muuɗum, wullitii Joomiraaɗo, wi'i: — Yaa, Laamɗo am, miɗo ŋaare, ndannaa mo!

¹⁴ Ndeen Joomiraaɗo wi'i Muusaa: — Si baabiiko tuttiinoo dow yeeso makko wanaa o heddodoto e semteende faa waɗa balɗe jeɗɗi naa? Ndelle mburtinee mo, njaaron mo yaasin hoɗorde, o jooɗoo toon balɗe jeɗɗi, de ngartiron mo.

¹⁵ Ndeen Mariyama wurtinaa ley hoɗorde ndeen, heddii yaasin mayre faa waɗi balɗe jeɗɗi. Yimɓe ɓeen du eggaay faa o wartiraa.

¹⁶ Caggal ɗuum, ɓe eggi Hajerot, ɓe koɗowi ley ladde Paran.