Limle 1 - Dewtere Laamɗo Fulfulde Burkina Faso

Limgal go'aɓal

¹ Hitaande ɗiɗaɓerde wurtagol Israa'iila'en leydi Misira, nyannde go'o lewru ɗiɗaɓurdu, Joomiraaɗo haaldi e Muusaa nder ladde Sinayi yoornde ley Hukum Ceniiɗo wi'i ɗum: —

² Limon Israa'iila'en haddi lenyi muɓɓen e cuuɗi muɓɓen fuu. Mbinndon inɗe worɓe fuu, gooto gooto.

³ Aan e Haaruuna, mbinndon inɗe worɓe ɓe duuɓi 20 yaade yeeso, hewtuɓe tiigaade kaɓitirɗe konu, fodde to njeyaa hakkunde geɓe konunkooɓe Israa'iila fuu.

⁴ Lenyol fuu hooreejo muuɗum gooto, wara wallita on.

⁵ Inan inɗe worɓe wallitooɓe on ɓeen: Lenyol Ruben, wo Elisur ɓii Cedehur.

⁶ Lenyol Simeyon, wo Celumiyel ɓii Surisaday.

⁷ Lenyol Yahuuda, wo Naasun ɓii Aminadaabu.

⁸ Lenyol Isakar, wo Netanel ɓii Suwar.

⁹ Lenyol Jabulon, wo Eliyaba ɓii Helon.

¹⁰ Lenyol Efrayim ɓii Yuusufi, wo Elisama ɓii Amihud. Lenyol Manasa ɓii Yuusufi, wo Gamaliyel ɓii Pedasur.

¹¹ Lenyol Benjamin, wo Abidaan ɓii Gedeyoni.

¹² Lenyol Dan, wo Ahiyeser ɓii Amisaday.

¹³ Lenyol Aser, wo Pagiyel ɓii Okoran.

¹⁴ Lenyol Gad, wo Eliyasaf ɓii De'uwel.

¹⁵ Lenyol Naftali, wo Ahira ɓii Enan.

¹⁶ Ɓee ngoni hooreeɓe lenyi Israa'iila'en, halfinaaɓe cuuɗi maamiraaɓe muɓɓen.

¹⁷ Muusaa e Haaruuna adi suɓaaɓe ɓeen faa mballita ɗum'en.

¹⁸ Ɓe kawrondini Israa'iila'en fuu nyannde go'o lewru ɗiɗaɓurdu. Worɓe hewtuɓe duuɓi 20 yaade yeeso fuu inɗe muɓɓen mbinndaa gooto gooto fodde lenyi muɓɓen e cuuɗi muɓɓen.

¹⁹ Noon Muusaa waɗiri limgal ngaal fodde no Joomiraaɗo yamiri ngal waɗiree ley ladde Sinayi yoornde toon.

²⁰ Lenyol Ruben, oon woni hammadiijo Israa'iila: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

²¹ wo ujunaaje capanɗe nay e jeegom e keme njoyo (46.500).

²² Lenyol Simeyon: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

²³ wo ujunaaje capanɗe joy e jeenay e keme tato (59.300).

²⁴ Lenyol Gad: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

²⁵ wo ujunaaje capanɗe nay e joy e keme njeegom e capanɗe njoyo (45.650).

²⁶ Lenyol Yahuuda: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

²⁷ wo ujunaaje capanɗe jeɗɗi e nay e keme njeegom (74.600).

²⁸ Lenyol Isakar: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

²⁹ wo ujunaaje capanɗe joy e nay e keme nayo (54.400).

³⁰ Lenyol Jabulon: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

³¹ wo ujunaaje capanɗe joy e jeɗɗi e keme nayo (57.400).

³² Lenyol Efrayim, ɓii Yuusufi: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

³³ wo ujunaaje capanɗe nay e keme njoyo (40.500).

³⁴ Lenyol Manasa, ɓii Yuusufi: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

³⁵ wo ujunaaje capanɗe tati e ɗiɗi e keme ɗiɗo (32.200).

³⁶ Lenyol Benjamin: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

³⁷ wo ujunaaje capanɗe tati e joy e keme nayo (35.400).

³⁸ Lenyol Dan: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

³⁹ wo ujunaaje capanɗe jeegom e ɗiɗi e keme njeɗɗo (62.700).

⁴⁰ Lenyol Aser: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

⁴¹ wo ujunaaje capanɗe nay e go'o e keme njoyo (41.500).

⁴² Lenyol Naftali: Worɓe ɓe duuɓi 20 yaade yeeso, hewtuɓe tiigaade kaɓitirɗe konu ɓe inɗe muɓɓen mbinndaa gooto gooto fodde cuuɗi muɓɓen fuu

⁴³ wo ujunaaje capanɗe joy e tati e keme nayo (53.400).

⁴⁴ Ɓee ngoni ɓe Muusaa e Haaruuna e hooreeɓe cuuɗi Israa'iila 12 ɓeen limi.

⁴⁵ Israa'iila'en worɓe waɗuɓe duuɓi 20 yaade yeeso, hewtuɓe tiigaade kaɓitirɗe konu limaaɓe fodde cuuɗi muɓɓen fuu,

⁴⁶ wo sordaasiiɓe ujunaaje keme jeegom e tati e keme njoyo e capanɗe njoyo (603.550).

Lenyol Lewi

⁴⁷ Lewinkooɓe limidaaka e lenyi Israa'iila keddiiɗi wakkati limgal ngaal

⁴⁸ sabo Joomiraaɗo haaldiino e Muusaa wi'i: —

⁴⁹ Taa mbinndaa lenyol Lewi, taa ɓe limdee e Israa'iila'en.

⁵⁰ Ammaa ɓe kalfinee hukum Keesuwal Amaana to kam e kujje feere feere ceniiɗe fuu ndesaa. Ɓe laatoo rondotooɓe hukum oon e kujje feere feere gonɗe ley muuɗum; ɓe koɗa ɓe piiloo hukum oon de ɓe kaybana ɗum.

⁵¹ Nde eggoton fuu, wo kamɓe njeyi huuncude hukum oon; wooɗi du ɗo koɗoton fuu, wo kamɓe njeyi darnude ɗum. Mo wanaa jeyaaɗo e maɓɓe de ɓadii ɗoon fuu wo bareteeɗo.

⁵² Israa'iila'en heddiiɓe du, mono fuu hoɗa nokkuure darappo lenyol muuɗum fodde to jeyaa hakkunde geɓe konunkooɓe Israa'iila.

⁵³ Lewinkooɓe kaa, koɗa piiloo Hukum oon taa tikkere am mawnde saama dow Israa'iila'en. Ɓe kakkilana hukum oon sanne.

⁵⁴ Israa'iila'en ngaɗiri no Joomiraaɗo yamiri Muusaa noon pay.