Lewinkooɓe 18 - Dewtere Laamɗo Fulfulde Burkina Faso

Jamirooje dow gondal ngal yaadataa e muuyɗe Joomiraaɗo

¹ Joomiraaɗo haaldi e Muusaa wi'i: —

² Kaaldaa e Israa'iila'en mbi'aa ɗum'en: Miin woni Joomiraaɗo, Laamɗo mooɗon.

³ Taa ngaɗon al'aadaaji leydi Misira to ngonnoɗon toon, wooɗi du taa njokkon al'aadaaji leydi Kanaana ndi njaaranmi on ndiin. Taa njokkon sariyaaji maɓɓe.

⁴ Wo jamirooje am tan ɗowtantoɗon, kaybanon ɗe, ngaɗon ko mbiimi. Miin woni Joomiraaɗo, Laamɗo mooɗon.

⁵ Njogitoɗon jamirooje am e sariyaaji am. Jogitiiɗo ɗe de waɗi ko ɗe mbi'i fuu wuuran saabe majje. Miin woni Joomiraaɗo.

⁶ Taa Israa'iilanke fay gooto fukkodoo e yaaye-gotoojo muuɗum debbo. Miin woni Joomiraaɗo.

⁷ Taa cemtiniraa bammaa fukkodaade e inna ma. Taa pukkodoɗaa e muuɗum sabo wo inna ma.

⁸ Taa cemtiniraa baaba ma fukkodaade e deekum goɗɗo sabo ɗuum wo semteende muuɗum.

⁹ Taa pukkodoɗaa e sakiike maaɗa debbo, kawtaaɗo inna maa baaba, dimaaɗo ley ɓaade ndeen e gere goɗɗo fuu.

¹⁰ Taa pukkodoɗaa e taana debbo ɓii ɓiya gorko maa ɓii ɓiya debbo sabo wo semteende ma aan e hoore maaɗa.

¹¹ Taa pukkodoɗaa e ɓii dee bammaa sabo imo jeydaa e bammaa, wo o sakiike maaɗa.

¹² Taa pukkodoɗaa e yaaye-gotoojo bammaa debbo sabo wo goggo maaɗa.

¹³ Taa pukkodoɗaa e sakiike inna ma debbo sabo wo inna maaɗa.

¹⁴ Taa cemtiniraa bappaanyo maaɗa e fukkodaade deekum. Taa ɓadoɗaa o fey sabo wo o goggo maaɗa.

¹⁵ Taa pukkodoɗaa e dee ɓiya gorko sabo wo a esum. Taa pukkodoɗaa e makko.

¹⁶ Taa pukkodoɗaa e dee sakiike maaɗa sabo wo ɗum semteende sakiike ma oon.

¹⁷ Taa pukkodoɗaa e debbo de njeccoɗaa e ɓiyum debbo maa taanum sabo wo ɓe hawtuɓe enɗam. Iɗum boni sanne.

¹⁸ Taa ɓaŋaa yaaye-gotoojo deeka. Taa pukkodoɗaa e muuɗum haddi nguurndam deeka oon fuu sabo ɗum waddan kiram hakkunde maɓɓe.

¹⁹ Taa pukkodoɗaa e debbo jiiɗo tuundi muuɗum sabo wo tuunɗo.

²⁰ Taa pukkodoɗaa e dee gondo maaɗa sabo ɗum tuuninte.

²¹ Taa kooƴaa ɓiya fay gooto cakkana tooru wi'eteendu Molek nduun de kuyfinaa innde Laamɗo maaɗa. Miin woni Joomiraaɗo.

²² Taa pukkodoɗaa e gorko bannda hono wo debbo sabo ɗuum na nyiddinii sanne.

²³ Taa pukkodoɗaa e ndaaba fay ngoota sabo a tuuninan hoore maaɗa saabe majjum. Taa debbo ɓattoo ndaaba faa fukkodoo e muuɗum, sabo iɗum boni sanne.

²⁴ Taa tuuniniron ko'e mooɗon e golleeji iri ɗiin sabo wo kanji caabanii lenyi ɗi ndiiwanmi yeeso mooɗon ɗiin laataade tuunɗi.

²⁵ Leydi ndiin laatake tuundi, saabe hakkeeji maɓɓe de njukkiimi ndi faa ndi tuuti yimɓe mayri.

²⁶ Njogitoɗon jamirooje am e sariyaaji am. Ndeentoɗon taa ngaɗon golleeji nyiddiniiɗi ɗiin onon Israa'iila'en e jananɓe jooɗiiɓe hakkunde mooɗon fuu.

²⁷ Wo saabe golleeji bonɗi ɗi jooɗinooɓe e mayri ngaɗannoo ɗiin de ndi laatii tuundi.

²⁸ Noon waɗata taa tuuninon leydi ndiin de ndi tuuta on onon du, hono no ndi tuutiri lenyi jooɗinooɗi e mayri arande noon.

²⁹ Gaɗuɗo gootel e golleeji nyiddiniiɗi ɗiin ko ɗi laatii fuu, ittetee e suudu bammum.

³⁰ Tinnee njogitee jamirooje am, ngaɗon ko mbiimi. Taa njokkon al'aadaaji nyiddiniiɗi gaɗetenooɗi illa on ngaraayno ɗiin. Noon waɗata taa tuunon. Wo miin woni Joomiraaɗo, Laamɗo mooɗon.