Lewinkooɓe 12 - Dewtere Laamɗo Fulfulde Burkina Faso

No debbo dimuɗo laaɓinirtee

¹ Joomiraaɗo haaldi e Muusaa wi'i: —

² Kaaldaa e Israa'iila'en mbi'aa ɗum'en: Si debbo rimii ɓiɗɗo gorko fu, laatoto tuunɗo faa hewta balɗe jeɗɗi hono no jiiɗo tuundi muuɗum noon.

³ Nyalaande jeetataɓerde ndeen, cukalel ngeel taadee.

⁴ Caggal ɗuum, sey debbo oon munya balɗe 33 de laaɓa e ƴiiƴam ɓeyngu muuɗum ɗaam. O jeyaa meemude huunde seniinde fay wootere, wooɗi du, o jeyaa yaade nokkuure seniinde faa nde wakkati oon faltii.

⁵ Si wo ɓiɗɗo debbo o rimi du, o heddoto o tuunɗo faa hewta jeɗɗiije ɗiɗi hono no jiiɗo tuundi muuɗum noon. Caggal ɗuum, sey o munya balɗe 66 de o laaɓa e ƴiiƴam ɓeyngu makko ɗaam.

⁶ Si balɗe laaɓineede makko ɗeen paltake, nde wo ɓiɗɗo gorko maa debbo o rimi fu, sey o wadda jawgel ngel ndunngu ngootu gaɗeteengel sadaka buleteeɗo naarude hukum Ceniiɗo. O wadda du nyaabal maa wuugaandu waɗeteendu sadaka laaɓinoowo. O hokka ɗi almaami.

⁷ Almaami oon sakka ɗi yeeso Joomiraaɗo faa o laaɓa e ƴiiƴam ɓeyngu makko ɗaam. Ndeen o laaɓii e ƴiiƴam makko ɗaam. Ndee woni yamiroore dow ɓeyɗo.

⁸ Si tawii o walaa baawɗe waddude jawgel ngeel fu, sey o wadda nyaabe ɗiɗi maa buugaali ɗiɗi. Wooturu waɗee sadaka buleteeɗo, heddiindu du, sadaka yaafeede. Noon almaami waɗiranta o faa o laaɓa e ƴiiƴam ɓeyngu makko ɗaam.