Lewinkooɓe 1 - Dewtere Laamɗo Fulfulde Burkina Faso

No sadaka buleteeɗo waɗirtee

¹ Joomiraaɗo noddi Muusaa ley hukum Ceniiɗo wi'i ɗum: —

² Kaaldaa e Israa'iila'en, mbi'aa ɗum'en: Si gooto mooɗon na haajaa waɗande Joomiraaɗo sadaka kirsamaari fu, itta ndi ley daabaaji muuɗum mawɗi maa pamari.

³ Si kirsamaari ndiin wo nagge fu, tawee wo ngaari ndi walaa malal. Ndi waddee dammbugal hukum Ceniiɗo faa ndi laatoo sadaka belɗo Joomiraaɗo.

⁴ Gaɗoowo sadaka oon yowa junngo muuɗum dow hoore mayri faa sadaka oon jaabee de hakkeeji muuɗum mooytee.

⁵ O hirsa ngaari ndiin yeeso Joomiraaɗo. Ɓiɓɓe Haaruuna, almaami'en ngadda ƴiiƴam mayri, mbicca piilol sakkirde wonnde dammbugal hukum Ceniiɗo ndeen.

⁶ Kirsamaari mbuleteendi ndiin huttee waɗee taƴe taƴe.

⁷ Ɓiɓɓe Almaami Haaruuna kuɓɓa yiite dow sakkirde ndeen de njowa leɗɗe dow mayre.

⁸ Ɓe ndeka kuse e hoore e ɓellere mayri fuu dow leɗɗe yiite sakkirde ndeen.

⁹ Kujje reedu e kolce mayri fuu lootee de almaami wula ɗum'en dow sakkirde ɗoon. Wo ɗum sadaka buleteeɗo, dokkal ngal uurngol muuɗum weli Joomiraaɗo.

¹⁰ Si sadaka buleteeɗo oon wo ndaaba pamara hono mbaalu maa mbeewa fu, joomum itta ndamndi maa njawdiri ndi walaa malal.

¹¹ Ndi hirsee yeeso Joomiraaɗo soɓɓirre sakkirde ndeen de ɓiɓɓe Haaruuna mbicca ƴiiƴam mayri piilna nde.

¹² O waɗa teewu mayri taƴe taƴe de almaami yowa taƴe ɗeen e hoore e ɓellere mayri fuu dow yiite sakkirde ndeen.

¹³ Kujje reedu e kolce mayri lootee de almaami wula ɗum'en dow mayre. Wo ɗum sadaka buleteeɗo, dokkal ngal uurngol muuɗum weli Joomiraaɗo.

¹⁴ Si sadaka buleteeɗo oon wo foondu fu, joomum itta ndu ley nyaabe maa buugaali muuɗum.

¹⁵ Almaami wadda ndu dow sakkirde, ɓoyla hoore mayru faa taƴa de wula nde dow yiite sakkirde ndeen. O waɗa ƴiiƴam mayru sirƴoo dow wecco sakkirde ndeen.

¹⁶ Caggal ɗuum o taƴa dummoodu mayru de o itta kujje reedu mayru fuu o faɗɗa ɗakkol sakkirde ndeen faro lettugal ɗo ndoondi ɓelle rufetee ɗoon.

¹⁷ Ndu feccee hakkunde, tawa ndu seedaay de almaami wula ndu dow leɗɗe dekiiɗe dow yiite sakkirde ndeen. Wo ɗum sadaka buleteeɗo, dokkal ngal uurngol muuɗum weli Joomiraaɗo.