Isira 1 - Dewtere Laamɗo Fulfulde Burkina Faso

No Koores hokkiri laawol suudu Dewal Joomiraaɗo nyiɓitoree

¹ Ley hitaande go'aɓerde laamu Koores kaananke Persi, Joomiraaɗo meemi ɓernde makko. Joomiraaɗo waɗii ɗum faa konngol muuɗum ƴuurungol e hunnduko annabi Yeremiya tabita. Ɗum saabi de Koores nelani yimɓe leydi ndi laamii ndiin fuu mbi'ee:

² Inan ko miin Koores kaananke Persi mbiimi: Laamɗo Joomiraaɗo Toowɗo, hokkii kam laamuuji adunaaru fuu. O halfinii kam mi nyiɓitanoo mo suudu Dewal Mawndu nder Urusaliima nder leydi Yahuuda.

³ Neɗɗo fu jeyaaɗo e yimɓe makko hakkunde mooɗon, o barkina ɗum, o wonda e muuɗum. Joonin sanaa joomum yaha huɓeere Urusaliima ley leydi Yahuuda saabe nyiɓitagol suudu Dewal Joomiraaɗo, Laamɗo Israa'iila nduun, kanko woni Laamɗo gonɗo ley huɓeere Urusaliima.

⁴ Katin, hakkunde yimɓe makko heddiiɓe na mbuuri ɓeen, wonduɓe e muɓɓen mballira ɗum'en kaŋŋe e cardi e kujje feere feere e daabaaji e dokke yardaamuye saabe suudu Dewal Laamɗo ley Urusaliima nduun.

⁵ Ndeen ardiiɓe lenyol Yahuuda e Benyamin e almaami'en e Lewinkooɓe e ɓe Laamɗo meemii ɓernde muɓɓen fu, ummii faa koota nyiɓitowo suudu Dewal Joomiraaɗo ley huɓeere Urusaliima toon.

⁶ Wondiiɓe maɓɓe kokki ɓe kujje gaɗiraaɗe kaŋŋe e cardi e kujje feere feere e daabaaji e dokke yardaamuye keewɗe korsuɗe.

⁷ Ndeen Koores kaananke oon yaltini kujje ɗe Nebukannejar laaminooɗo Baabiila, ittunoo ley suudu Dewal Joomiraaɗo nder huɓeere Urusaliima, de yaari resowi ley suudu alla'en muuɗum.

⁸ Koores yamiri Mitreedat ndaaranoowo jawdi suudu laamu, wurtina ɗe, lima ɗe, de hokka ɗe Sesabasar ardiiɗo Yahuuda.

⁹ Inan adadu majje: Le'e kaŋŋe 30, ɗe cardi 1.000, e laɓe 29,

¹⁰ e jarduɗe kaŋŋe 30, e ɗe cardi 410, e kujje feere feere 1.000.

¹¹ Kujje gaɗiraaɗe kaŋŋe e cardi ɗeen fuu wo 5.400. Sesabasar wartiri ɗe fuu nde ɓe ƴuwunoo e maccungaaku ley leydi Baabiila ɓe ngarti huɓeere Urusaliima ndeen.