Fuɗɗoode 9 - Dewtere Laamɗo Fulfulde Burkina Faso

¹ Laamɗo barkini Nuuhu e ɓiɓɓe muuɗum worɓe, wi'i: — Ndimee, ɓeydoɗon, keewon adunaaru.

² Daabaaji adunaaru fuu kulan on kullol manngol. Pooli e liƴƴi e huunde fuu ko wuuri ley adunaaru, mi wattii ɗum'en e juuɗe mooɗon.

³ Ko wuuri, ko sonnyata ley adunaaru fuu laatanoo on nyaamdu. Mi hokkii on ɗi hono no kokkirnoomi on haako hecco noon.

⁴ Ammaa taa nyaamee teewu ngondungu e ƴiiƴam, sabo yonki ley ƴiiƴam woni.

⁵ Si ndaaba maa neɗɗo rufii ƴiiƴam mooɗon, laatiiɗam yonki mon ɗaam fu, mi yomnitoto ɗum ɗam.

⁶ Barɗo ɓii-Aadama fuu kam du warete. Sabo Laamɗo tagirii ɓii-Aadama e alhaali muuɗum.

⁷ Onon le, ndimee, ɓeydoɗon, keewon adunaaru.

⁸ Laamɗo haaldi e Nuuhu e ɓiɓɓe mum worɓe ɓeen, wi'i:

⁹ — Joonin inan mi tabitinanan on amaana, onon e ƴuwdi mooɗon,

¹⁰ e ko wuuri, ko wondi e mooɗon fuu. Ɗum woni pooli e daabaaji wuro e kulle ladde, e daabaaji adunaaru jaltidinɗi e mooɗon ley laana ɗiin fuu.

¹¹ Inan amaana mo tabintinanmi on: ko tagaa fuu, halkirtaake ilam tufaanu katin. Ilam tuufaanu halkataa adunaaru katin.

¹² Laamɗo wi'i: — Inan maande amaana hakkunde am e mooɗon e ko woodi yonki, ko wondi e mooɗon fuu, faa e jamaanuuji fuu:

¹³ Mi waɗan ciɓ-ciɓongal hakkunde duule, faa laatoo maande amaana hakkunde am e adunaaru.

¹⁴ Nde ɓanginmi duule dow kammu, de ciɓ-ciɓongal ngaal funti hakkunde duule fu,

¹⁵ mi miccitoto amaana mo ngaɗumi hakkunde am e mooɗon e ko foofata fuu. Ilam tuufaanu waɗataa katin faa halka ko wuuri fuu.

¹⁶ Mi waɗan ciɓ-ciɓongal funta hakkunde duule de mi miccitoo amaana duumiiɗo mo ngaɗumi hakkunde am e ko wuuri ley adunaaru fuu.

¹⁷ Laamɗo wi'i Nuuhu: — Ciɓ-ciɓongal woni maande amaana mo ngaɗumi hakkunde am e ko wuuri ley adunaaru fuu.

Ɓiɓɓe Nuuhu

¹⁸ Ɓiɓɓe Nuuhu wurtiiɓe e laana ɓeen wo: Saam e Haam e Yaafet. Haam woni Baaba Kanaana.

¹⁹ Ɓee tato ngoni ɓiɓɓe Nuuhu. E maɓɓe lenyi cankitiiɗi e adunaaru ɗiin fuu ƴuuri.

²⁰ Nuuhu fuɗɗi remude, o waɗi ngesa inabooje.

²¹ Nyannde gomma o yari inaboojam faa o sulii, de o taartii ley hukum makko.

²² Haam baaba Kanaana yi'i bammum ɓanndu ɓoldu, de haalani sakiraaɓe muuɗum ɗiɗo wonnooɓe yaasin.

²³ Saam e Yaafet kooƴi kaddungal mbakkii de na njaara gaɗa gaɗalde faa cuurowi baaba muɓɓen. Iɓe ndaara gere goɗɗo taa ɓe nji'a baabiiɓe ɓanndu ɓoldu.

²⁴ Nde Nuuhu sulitinoo fu, nani ko ɓiyum koddaajo oon waɗi ɗuum

²⁵ de wi'i: — Laamɗo ittu Kanaana barke! O laatoo maccuɗo sakiraaɓe makko.

²⁶ O wi'i katin: Barke woodanii Joomiraaɗo, kanko woni Laamɗo Saam. Kanaana laatoo maccuɗo Saam!

²⁷ Laamɗo yaajin Yaafet, faa o jooɗoo ley hukumuuji Saam. Kanaana ka laatoo maccuɗo makko.

²⁸ Nuuhu wuuri duuɓi 350 caggal ilam tuufaanu.

²⁹ Duuɓi Nuuhu fuu wo 950 de maayi.