Fuɗɗoode 8 - Dewtere Laamɗo Fulfulde Burkina Faso

Ɓeeɓugol ilam tuufaanu

¹ Laamɗo miccitii Nuuhu e kulle ladde e daabaaji wuro gonduɗi e muuɗum ley laana ɗiin fuu. O waɗi henndu wifi dow leydi de diyeele ɗeen puɗɗi ɓuytaade.

² Ilduɗe mawɗe ɗeen fuu ommbii, julanɗe kammu du cukki.

³ Caggal balɗe 150 ɗeen, ndiyam ɗaam ɓuytii faa famɗiti dow leydi.

⁴ Nyannde sappo e jeɗɗi lewru jeɗɗaɓurdu laana kaan jippii hakkunde baamle Ararat.

⁵ Ndiyam ɗaam heddii ina ɓeeɓa faa hewti go'o lewru sappoɓurdu. Nyannde go'o lewru nduun ko'e baamle ɗeen punti.

⁶ Caggal balɗe 40, Nuuhu omti feneetere nde waɗani laana kaan.

⁷ O yoofi daawuwal dilli. Daawuwal ngaal ina yaha ina warta faa ndiyam ɗaam re'i dow leydi.

⁸ O yoofi wuugaandu faa o faama yalla ndiyam ɗaam famɗitii dow leydi naa.

⁹ Ammaa wuugaandu nduun heɓaay fuu ɗo jippoo. Ndu yeccii to Nuuhu ley laana kaan, sabo ndiyam ɗaam ina heddii na hurri leydi fuu. Nuuhu foorti junngo mum, nanngi ndu, nanni ley laana kaan.

¹⁰ O doomi faa balɗe jeɗɗi katin, de o yoofi wuugaandu nduun.

¹¹ Wuugaandu nduun warti to makko kiiral naange ina wuufi haakolowol jaytun keccol. Ndeen Nuuhu faami ndiyam ɗaam famɗitii dow leydi.

¹² O doomi faa balɗe jeɗɗi goɗɗe, o yoofi wuugaandu nduun, de ndu wartaay to makko katin.

¹³ Nyannde go'o, lewru go'oɓurdu, ndiyam ɗaam hoorti. Nyannde ndeen tawi duuɓi Nuuhu wo 601. O omti laana kaan, o ndaari o tawi leydi sunndii.

¹⁴ Nyannde 27, lewru ɗiɗaɓurdu tawi leydi ndiin yoorii.

¹⁵ Laamɗo haaldi e Nuuhu, wi'i:

¹⁶ — Njaltee laana kaan, aan e jom suudu maa e ɓiɓɓe maaɗa worɓe e deekiraaɓe muɓɓen.

¹⁷ Ko wuuri, ko tagaa ko wondi e maa fuu, njaltida e maaɗa. Ɗuum woni pooli e daabaaji e ko wuuri ko ladata fuu. Ɗi ndima faa heewa, ɗi ɓeydoo faa ɗi ɗuuɗa ley adunaaru. Ɗum woni pooli e daabaaji e ko wuuri ko ladata fuu.

¹⁸ Nuuhu yaltidi e jom suudu muuɗum e ɓiɓɓe muuɗum e deekiraaɓe muɓɓen.

¹⁹ Daabaaji ɗiin e ko ladata e pooli, ko wuuri ley adunaaru, ngel fuu e sii muuɗum, mburtii ley laana kaan.

²⁰ Nuuhu mahani Joomiraaɗo sakkirde. O itti ley daabaaji dagiiɗi e pooli dagiiɗi ɗiin fuu, o hirsi, o waɗi sadaka buleteeɗo dow sakkirde ndeen.

²¹ Joomiraaɗo nani uurngol mbelngol, de wi'i ley miilo mum: — Mi huɗataa adunaaru saabe ɓii-Aadama katin, sabo ɓernde muuɗum ina anniyoo ko boni gilla wo cukalel. Mi halkataa ko wuuri fuu katin hono no ngaɗunoomi noon.

²² Haddi fuu leydi na heddii aawre e tayri, jaangol e nguli, ceeɗu e ndunngu, jemma e nyalooma, fuu celataa waɗude.