Fuɗɗoode 7 - Dewtere Laamɗo Fulfulde Burkina Faso

No Nuuhu naatiri laana mawka kaan

¹ Joomiraaɗo wi'i Nuuhu: — Naatu ley laana kaan, aan e koreeji maa fuu, sabo aan tan nji'umi wo ponnditiiɗo ley jamaanu oo.

² Kooƴaa daabaaji dagiiɗi ɗiin fuu jeɗɗi jeɗɗi, gorel e dewel de ɗi ngonda e maaɗa. Daabaaji ɗi ndagaaki ɗiin du ɗiɗi ɗiɗi, gorel e dewel.

³ Pooli piirooji du jeɗɗi jeɗɗi, gorel e dewel, faa sii majji heddoo ley adunaaru.

⁴ Sabo caggal balɗe jeɗɗi mi waɗan ƴuwoonde toɓira dow adunaaru balɗe 40 jemma e nyalooma. Noon piɗɗirammi ko tagumi ɗuum fuu dow mbeɗu leydi.

⁵ Nuuhu waɗi ko Joomiraaɗo yamiri ɗum ɗuum fuu.

⁶ Duuɓi 600 Nuuhu wondi wakkati ilam tuufaanu jippotonoo dow adunaaru ndeen.

⁷ Nuuhu e jom suudu muuɗum e ɓiɓɓe muuɗum worɓe e deekiraaɓe muɓɓen naati laana kaan faa kisa ilam tuufaanu.

⁸ Daabaaji dagiiɗi e ɗi ndagaaki e pooli e kulle ladooje

⁹ fuu naaddi e Nuuhu ley laana kaan. Ɗi naatiri ɗiɗi ɗiɗi, gorel e dewel, fodde no Laamɗo yamiri Nuuhu noon.

¹⁰ Caggal balɗe jeɗɗi ɗeen, ilam tuufaanu fuɗɗi na yoola adunaaru.

¹¹ Ley hitaande ndeen duuɓi Nuuhu wo 600. Nyannde sappo e jeɗɗi lewru ɗiɗaɓurdu, ilduɗe mawɗe cukkitorii semmbe, julanɗe kammu du omtii dow leydi.

¹² Ƴuwoonde toɓiri balɗe 40, jemma e nyalooma.

¹³ Wo nyannde ndeen Nuuhu naati ley laana kaan, kam e jom suudu muuɗum e ɓiɓɓe muuɗum Saam e Haam e Yaafet e rewɓe muɓɓen tato.

¹⁴ Kamɓe e kulle ladde fuu, ngel fuu e sii muuɗum e daabaaji wuro, ngel fuu e sii muuɗum e ko ladata, ngel fuu e sii muuɗum e pooli, ngel fuu e sii muuɗum, fuu ɓe naati ley laana kaan.

¹⁵ Ko foofata fuu, ɗiɗi ɗiɗi muɓɓen naandi e Nuuhu ley laana kaan.

¹⁶ Ɗi naatiri gorel e dewel no Laamɗo yamiri Nuuhu noon. Ndeen Joomiraaɗo ommbi dammbugal laana kaan gaɗa makko.

¹⁷ Ilam tuufaanu waɗiri balɗe 40 dow adunaaru. Ndiyam ɗaam wari heewi faa ɓanti laana kaan e leydi.

¹⁸ Diyeele ɗeen mawni, ɗe uddi leydi, laana kaan na huywa dow majje.

¹⁹ Iɗe ɓeydoroo semmbe dow leydi faa ɗe ngari ɗe njooli baamle toowɗe fuu.

²⁰ Diyeele ɗeen njooliri baamle ɗeen tooweefi piyanɗe 15.

²¹ Ko tagaa, ko waawi sottitinde dow leydi fuu halki: pooli e daabaaji wuro e kulle ladde e ko ladata e tagaaɓe fuu.

²² Ko foofata ko woodi yonki ley adunaaru fuu halki.

²³ Joomiraaɗo halki ko wuuri ley adunaaru fuu, ɗum woni yimɓe e daabaaji e ko ladata e pooli fuu. Nuuhu e ɓe wondi ley laana ɓeen tan ndaɗi.

²⁴ Diyeele ɗeen keddii ina cuddi leydi faa waɗi balɗe 150.